Mustadrak al-Hakim

سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ و آلہ وسلم نے اپنے اصحاب کے درمیان بھائی چارہ قائم کیا، پس آپ صلی اللہ علیہ و آلہ وسلم نے سیدنا ابوبکر اور سیدنا عمر رضی اللہ عنہما کے درمیان، سیدنا طلحہ اور سیدنا زبیر رضی اللہ عنہما کے درمیان، اور سیدنا عثمان بن عفان اور سیدنا عبدالرحمن بن عوف رضی اللہ عنہما کے درمیان بھائی چارہ کروا دیا، تو سیدنا علی رضی اللہ عنہ نے عرض کیا: یا رسول اللہ! آپ نے تو اپنے صحابہ کے درمیان بھائی چارہ قائم کر دیا، تو میرا بھائی کون ہے؟ رسول اللہ صلی اللہ علیہ و آلہ وسلم نے ارشاد فرمایا: ”اے علی! کیا تم اس بات پر راضی نہیں ہو کہ میں تمہارا بھائی بنوں؟“ ابن عمر رضی اللہ عنہما کہتے ہیں کہ سیدنا علی رضی اللہ عنہ نہایت قوی اور بہادر تھے، سیدنا علی رضی اللہ عنہ نے عرض کیا: کیوں نہیں یا رسول اللہ! تو رسول اللہ صلی اللہ علیہ و آلہ وسلم نے ارشاد فرمایا: ”تم دنیا اور آخرت میں میرے بھائی ہو۔“ [المستدرك على الصحيحين/كِتَابُ الْهِجْرَةِ/حدیث: 4335]