Mustadrak al-Hakim

طلحہ نضری رضی اللہ عنہ سے روایت ہے، انہوں نے کہا: ہم میں سے جب کوئی شخص مدینہ آتا اور اس کا وہاں کوئی واقف کار (عریف) ہوتا تو وہ اپنے اس واقف کار کے ہاں ٹھہر جاتا، لیکن اگر اس کا وہاں کوئی واقف کار نہ ہوتا تو وہ صفہ میں قیام کرتا، چنانچہ میں مدینہ آیا اور میرا وہاں کوئی واقف کار نہیں تھا، پس میں صفہ میں ٹھہر گیا، وہاں رسول اللہ صلی اللہ علیہ و آلہ وسلم کی جانب سے ہمیں روزانہ دو آدمیوں کے درمیان کھجور کا ایک مد (تقریباً 625 گرام) دیا جاتا تھا اور آپ صلی اللہ علیہ و آلہ وسلم ہمیں موٹا سوتی کپڑا (خنف) پہناتے تھے، ایک دن رسول اللہ صلی اللہ علیہ و آلہ وسلم نے ہمیں دن کی کوئی نماز پڑھائی، جب آپ صلی اللہ علیہ و آلہ وسلم نے سلام پھیرا تو اہل صفہ نے دائیں بائیں سے آپ صلی اللہ علیہ و آلہ وسلم کو آواز دی: یا رسول اللہ! ان کھجوروں نے ہمارے پیٹ جلا دیے ہیں اور ہمارے یہ موٹے کپڑے بھی پھٹ گئے ہیں، تب رسول اللہ صلی اللہ علیہ و آلہ وسلم اپنے منبر کی طرف مڑے اور اس پر تشریف فرما ہوئے، پھر اللہ کی حمد و ثنا بیان کی اور ان سختیوں کا ذکر کیا جو آپ صلی اللہ علیہ و آلہ وسلم نے اپنی قوم سے برداشت کیں، یہاں تک کہ فرمایا: ”بلاشبہ مجھ پر اور میرے ساتھی پر دس سے زائد ایسے دن گزرے ہیں جب میرے اور اس کے پاس کھانے کے لیے پیلو کے پھل «البَرِير» کے سوا کچھ نہ تھا“ - راوی کہتے ہیں کہ میں نے ابو حرب سے پوچھا: یہ «البَرِير» کیا چیز ہے؟ انہوں نے کہا: یہ رسول اللہ صلی اللہ علیہ و آلہ وسلم کی خوراک یعنی پیلو کے درخت کا پھل تھا - (آپ صلی اللہ علیہ و آلہ وسلم نے سلسلہ کلام جاری رکھتے ہوئے فرمایا:) ”پھر ہم اپنے ان انصاری بھائیوں کے پاس آئے جن کی بڑی خوراک کھجوریں ہیں، تو انہوں نے اس میں ہماری غمخواری کی، اللہ کی قسم! اگر میں تمہارے لیے روٹی اور گوشت پاتا تو ضرور تمہیں اس سے سیر کر دیتا، لیکن امید ہے کہ تم ایسا زمانہ پاؤ گے جب تم میں سے کسی کے پاس صبح و شام (کھانے کے) بڑے بڑے پیالے لائے جائیں گے“، راوی کہتے ہیں کہ صحابہ نے عرض کیا: یا رسول اللہ! کیا ہم اس دن بہتر ہوں گے یا آج کے دن؟ آپ صلی اللہ علیہ و آلہ وسلم نے فرمایا: ”بلکہ تم آج کے دن بہتر ہو، تم آج ایک دوسرے سے محبت کرنے والے ہو جبکہ اس دن تم ایک دوسرے کی گردنیں مارو گے“ - راوی کا خیال ہے کہ آپ صلی اللہ علیہ و آلہ وسلم نے یہ بھی فرمایا: ”تم ایک دوسرے سے بغض رکھو گے“ -
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الْهِجْرَةِ/حدیث: 4336]