Mustadrak al-Hakim

بشیر بن نہیک بیان کرتے ہیں کہ مجھے رسول اللہ صلی اللہ علیہ و آلہ وسلم کے ایک بشیر (خوشخبری دینے والے صحابی) نے بتایا جن کا نام جاہلیت میں زحم بن معبد تھا، رسول اللہ صلی اللہ علیہ و آلہ وسلم نے ان سے پوچھا: ”تمہارا نام کیا ہے؟“ انہوں نے کہا: زحم بن معبد۔ آپ صلی اللہ علیہ و آلہ وسلم نے فرمایا: ”تم بشیر ہو“، چنانچہ یہی ان کا نام پڑ گیا۔ وہ بیان کرتے ہیں کہ ایک بار میں رسول اللہ صلی اللہ علیہ و آلہ وسلم کے ساتھ پیدل چل رہا تھا کہ آپ صلی اللہ علیہ و آلہ وسلم نے فرمایا: ”اے ابن خصاصیہ! تم اللہ سے کس بات کا شکوہ کرتے ہو؟ تم رسول اللہ صلی اللہ علیہ و آلہ وسلم کے ساتھ پیدل چل رہے ہو۔“ میں نے عرض کیا: میں اللہ سے کسی بات کا شکوہ نہیں کرتا، اس نے میرے ساتھ ہر طرح کی بھلائی کی ہے۔ پھر آپ صلی اللہ علیہ و آلہ وسلم مشرکین کی قبروں کے پاس آئے اور تین بار فرمایا: ”یہ لوگ بہت سی بھلائی سے پیچھے رہ گئے۔“ پھر مسلمانوں کی قبروں پر آئے اور تین بار فرمایا: ”ان لوگوں نے بہت سی بھلائی پا لی۔“ آپ صلی اللہ علیہ و آلہ وسلم چل رہے تھے کہ اچانک آپ کی نظر ایک شخص پر پڑی جو قبروں کے درمیان جوتے پہن کر چل رہا تھا، آپ صلی اللہ علیہ و آلہ وسلم نے فرمایا: ”اے بالوں والے جوتے «السِّبْتِيَّتَيْنِ» والے! تجھ پر افسوس، اپنے یہ جوتے اتار دے۔“ اس شخص نے دیکھا اور جب رسول اللہ صلی اللہ علیہ و آلہ وسلم کو پہچان لیا تو اپنے جوتے اتار کر پھینک دیے۔ [المستدرك على الصحيحين/كِتَابُ الْجَنَائِزِ/حدیث: 1396]