Sunan Daraqutni

سیدنا جابر رضی اللہ عنہ بیان کرتے ہیں: ایک صاحب کا انتقال ہو گیا، ہم نے انہیں غسل دیا، کفن دیا، انہیں خوشبو لگائی اور اسے جبرائیل علیہ السلام کی جگہ کے پاس رکھ دیا، جہاں جنازے رکھے جاتے تھے، پھر ہم نے نبی کریم صلی اللہ علیہ و آلہ وسلم کو اس بارے میں بتایا، تاکہ آپ اس کی نماز جنازہ ادا کریں، پھر نبی کریم صلی اللہ علیہ و آلہ وسلم ہمارے ساتھ چند قدم چل کر آئے، پھر آپ نے فرمایا: ”شاید تمہارے ساتھی کے ذمہ کچھ قرض تھا۔“ لوگوں نے عرض کی: ”جی ہاں، دو دینار تھے۔“ تو نبی کریم صلی اللہ علیہ و آلہ وسلم واپس مڑنے لگے، ہم میں سے ایک صاحب، جن کا نام ابوقتادہ تھا، انہوں نے آپ صلی اللہ علیہ و آلہ وسلم کی خدمت میں عرض کی: ”یا رسول اللہ! ان دونوں (دیناروں) کی ادائیگی میرے ذمہ ہے۔“ تو نبی کریم صلی اللہ علیہ و آلہ وسلم نے ارشاد فرمایا: ”ان دونوں کی ادائیگی تمہارے ذمہ ہے اور تمہارے مال میں سے ہو گی، اور (وصول کرنے والے) شخص کا حق تمہارے ذمہ ہے، یہ مرحوم ان دونوں سے بری ہے۔“ تو سیدنا ابوقتادہ نے عرض کی: ”جی ہاں۔“ تو نبی کریم صلی اللہ علیہ و آلہ وسلم نے اس شخص کی نماز جنازہ ادا کی، اس کے بعد نبی کریم صلی اللہ علیہ و آلہ وسلم کی جب بھی سیدنا ابوقتادہ سے ملاقات ہوئی، آپ صلی اللہ علیہ و آلہ وسلم نے ان سے یہی دریافت کیا: ”تم نے ان دو دیناروں کا کیا کیا؟“ آخر کار جب سیدنا ابوقتادہ نے آپ صلی اللہ علیہ و آلہ وسلم کو بتایا: ”یا رسول اللہ! میں نے ان دونوں کو ادا کر دیا ہے۔“ تو نبی کریم صلی اللہ علیہ و آلہ وسلم نے ارشاد فرمایا: ”اب اس شخص کو ٹھنڈک نصیب ہوئی ہے۔“ [سنن الدارقطني/ كِتَابُ الْبُيُوعِ/حدیث: 3084]