عبداللہ بن ابی قتادہ اپنے والد (ابوقتادہ رضی اللہ عنہ) کا یہ بیان نقل کرتے ہیں: ہم لوگ نبی اکرم صلی اللہ علیہ و آلہ وسلم کے ہمراہ سفر کر رہے تھے۔ لوگوں میں سے کسی نے کہا: یا رسول اللہ! اگر آپ ہمیں پڑاؤ کی اجازت دیں (تو مہربانی ہو گی)۔ نبی اکرم صلی اللہ علیہ و آلہ وسلم نے فرمایا: ”مجھے یہ اندیشہ ہے، تم لوگ نماز کے وقت سوئے رہ جاؤ گے۔“ سیدنا بلال رضی اللہ عنہ نے عرض کی: میں آپ لوگوں کو بیدار کر دوں گا، پھر وہ اپنی سواری کے ساتھ ٹیک لگا کر بیٹھ گئے۔ نبی اکرم صلی اللہ علیہ و آلہ وسلم اس وقت بیدار ہوئے جب سورج کا کنارہ نکل چکا تھا۔ آپ صلی اللہ علیہ و آلہ وسلم نے فرمایا: ”اے بلال! تم نے جو کہا تھا وہ کہاں گیا؟“ انہوں نے عرض کی: مجھ پر بھی نیند طاری ہو گئی تھی، اور یہ ایسی نیند تھی کہ اس طرح کی نیند مجھے کبھی نہیں آئی۔ نبی اکرم صلی اللہ علیہ و آلہ وسلم نے ارشاد فرمایا: ”تم اٹھو اور لوگوں کے درمیان نماز کا اعلان کرو۔“ جب سورج نکل آیا، روشن ہو گیا، تو نبی اکرم صلی اللہ علیہ و آلہ وسلم کھڑے ہوئے اور آپ صلی اللہ علیہ و آلہ وسلم نے ان لوگوں کو نماز پڑھائی۔ [صحیح ابن حبان/كِتَابُ الصَّلَاةِ/حدیث: 1579]