اُم المؤمنین سیدہ حفصہ رضی اللہ تعالیٰ عنہا سے روایت ہے کہ جب صبح کی اذان ہو چکی ہوتی تو رسول اللہ صلی اللہ علیہ و آلہ وسلم جماعت کھڑی ہونے سے پہلے دو ہلکی رکعتیں پڑھتے تھے۔ [موطا امام مالك رواية يحييٰ/كِتَابُ صَلَاةِ اللَّيْلِ/حدیث: 282]

اُم المؤمنین سیدہ عائشہ صدیقہ رضی اللہ تعالیٰ عنہا سے روایت ہے کہ رسول اللہ صلی اللہ علیہ و آلہ وسلم فجر کی سنتوں کو جلدی پڑھتے تھے یہاں تک کہ میں کہتی تھی کہ آپ صلی اللہ علیہ و آلہ وسلم نے سورۃ الفاتحہ بھی پڑھی یا نہیں۔
امام مالک رحمہ اللہ اور ایک طائفہ نے کہا کہ فجر کی سنتوں میں صرف سورۂ فاتحہ پر قناعت کرے، یعنی بعد فاتحہ کے سورۃ نہ پڑھے، لیکن جمہور علماء کے نزدیک سورۃ پڑھے اور یہی صواب ہے۔ [موطا امام مالك رواية يحييٰ/كِتَابُ صَلَاةِ اللَّيْلِ/حدیث: 283]

ابوسلمہ بن عبدالرحمٰن سے روایت ہے کہ لوگوں نے تکبیر سنی تو کھڑے ہو کر سنتیں پڑھنے لگے، تب رسول اللہ صلی اللہ علیہ و آلہ وسلم نکلے اور فرمایا کہ: ”کیا دو دو نمازیں ایک ساتھ؟ کیا دو دو نمازیں ایک ساتھ؟“ اور آپ صلی اللہ علیہ و آلہ وسلم نے فرمایا: ”یہ تو صبح کی نماز میں شامل وہ دو رکعتیں ہیں جو صبح سے قبل پڑھی جاتی ہیں۔“ [موطا امام مالك رواية يحييٰ/كِتَابُ صَلَاةِ اللَّيْلِ/حدیث: 284]

امام مالک رحمہ اللہ کو یہ بات پہنچی کہ سیدنا عبداللہ بن عمر رضی اللہ تعالیٰ عنہما کی فجر کی دو سنیتں فوت ہوگئیں تو انہوں نے سورج نکلنے کے بعد وہ پڑھ لیں۔ [موطا امام مالك رواية يحييٰ/كِتَابُ صَلَاةِ اللَّيْلِ/حدیث: 285]

حضرت قاسم بن محمد سے بھی ایسا ہی مروی ہے۔ [موطا امام مالك رواية يحييٰ/كِتَابُ صَلَاةِ اللَّيْلِ/حدیث: 286]