موطا امام مالک (روایۃ یحیی)

ابن شہاب سے روایت ہے کہ چند عورتیں رسول اللہ صلی اللہ علیہ و آلہ وسلم کے زمانے میں مسلمان ہو جاتی تھیں اپنے ملک میں، ہجرت نہیں کرتی تھیں اور خاوند ان کے کافر ہوتے تھے، انہی عورتوں میں سے ایک عاتکہ تھیں جو ولید بن مغیرہ کی بیٹی تھیں اور صفوان بن امیہ کے نکاح میں تھیں، وہ فتح مکّہ کے روز مسلمان ہوئیں اور ان کے خاوند صفوان بھاگ گئے۔ رسول اللہ صلی اللہ علیہ و آلہ وسلم نے ان کے چچا زاد بھائی وہب بن عمیر کو اپنی چادر نشانی کے واسطے دے کر صفوان کے پاس بھیجا اور ان کو امان دی اور اسلام کی طرف بلایا، اور یہ کہلا بھیجا کہ میرے پاس آؤ اگر تمہای خوشی ہو تو، مسلمان ہونا نہیں تو تم کو دو مہینے کی مہلت ملے گی۔ جب صفوان رسول اللہ صلی اللہ علیہ و آلہ وسلم کے پاس آپ صلی اللہ علیہ و آلہ وسلم کی چادر لے کر آئے تو لوگوں کے سامنے پکار اٹھے: اے محمد! وہب بن عمیر میرے پاس تمہاری چادر لے کر آئے، اور مجھ سے کہا کہ تم نے مجھ کو بلایا ہے اس شرط پر کہ اگر میں چاہوں تو مسلمان ہو جاؤں، نہیں تو مجھ کو دو مہینے کی مہلت ملے گی۔ آپ صلی اللہ علیہ و آلہ وسلم نے فرمایا: ”اُترو اے ابو وہب!“ صفوان نے کہا: قسم خدا کی! میں کبھی نہ اتروں گا جب تک تم مجھ سے بیان نہ کرو گے کہ وہب بن عمیر کا پیام صحیح ہے۔ آپ صلی اللہ علیہ و آلہ وسلم نے فرمایا: ”وہ تو کیا میں تمہیں چار مہینے کی مہلت دیتا ہوں۔“ پھر رسول اللہ صلی اللہ علیہ و آلہ وسلم قبیلہ ہوازن کی طرف حنین میں گئے اور آپ صلی اللہ علیہ و آلہ وسلم نے صفوان سے کچھ ہتھیار اور سامان عاریت مانگا۔ صفوان نے کہا: آپ خوشی سے مانگتے ہیں یا زبردستی سے؟ آپ صلی اللہ علیہ و آلہ وسلم نے فرمایا: ”خوشی سے۔“ صفوان نے ہتھیار اور سامان دئیے۔ پھر رسول اللہ صلی اللہ علیہ و آلہ وسلم لوٹے اور صفوان کفر ہی کی حالت میں آپ صلی اللہ علیہ و آلہ وسلم کے ساتھ رہے جنگِ حنین میں، اور طائف میں، اور عورت ان کی مسلمان رہیں، مگر آپ صلی اللہ علیہ و آلہ وسلم نے ان کی عورت کو ان سے نہ چھڑایا یہاں تک کہ صفوان بھی مسلمان ہوگئے اور ان کی عورت بدستور ان کے پاس رہیں۔ [موطا امام مالك رواية يحييٰ/كِتَابُ النِّكَاحِ/حدیث: 1118]