سیدنا ابن عباس رضی اللہ عنہما سے روایت ہے کہ ابوطالب زمزم کی مرمت کر رہے تھے اور نبی کریم صلی اللہ علیہ و آلہ وسلم بھی (تعمیر کے لیے) پتھر اٹھا کر لانے والوں میں شامل تھے، آپ صلی اللہ علیہ و آلہ وسلم اس وقت لڑکے تھے۔ نبی کریم صلی اللہ علیہ و آلہ وسلم نے اپنا تہبند (کمر سے کھول کر) کندھے پر رکھ لیا تاکہ پتھر کی رگڑ سے بچ سکیں (جس سے آپ صلی اللہ علیہ و آلہ وسلم کا ستر کھل گیا)، ابوطالب سے کہا گیا: اپنے بھتیجے کو سنبھالیے، وہ بے ہوش ہو گئے ہیں۔ جب نبی کریم صلی اللہ علیہ و آلہ وسلم بے ہوشی سے ہوش میں آئے تو ابوطالب نے آپ صلی اللہ علیہ و آلہ وسلم سے اس بے ہوشی کے بارے میں پوچھا، آپ صلی اللہ علیہ و آلہ وسلم نے فرمایا: ”میرے پاس ایک آنے والا آیا جس نے سفید کپڑے پہنے ہوئے تھے، اس نے مجھ سے کہا: اپنا ستر چھپاؤ۔“ ابن عباس رضی اللہ عنہما کہتے ہیں کہ یہ پہلی چیز تھی جو نبی کریم صلی اللہ علیہ و آلہ وسلم نے نبوت کے آثار میں سے دیکھی کہ آپ صلی اللہ علیہ و آلہ وسلم سے کہا گیا: ستر چھپاؤ، چنانچہ اس دن کے بعد سے آپ صلی اللہ علیہ و آلہ وسلم کا ستر کبھی (کسی نے) نہیں دیکھا۔
یہ حدیث صحیح الاسناد ہے لیکن شیخین نے اسے روایت نہیں کیا۔ اور اس کی شاہد حدیث سیدنا ابوطفیل رضی اللہ عنہ کی روایت ہے۔ [المستدرك على الصحيحين/كِتَابُ اللِّبَاسِ/حدیث: 7543]

سیدنا ابوطفیل رضی اللہ عنہ سے روایت ہے کہ جب بیت اللہ کی تعمیر ہو رہی تھی تو لوگ پتھر اٹھا کر لا رہے تھے اور نبی کریم صلی اللہ علیہ و آلہ وسلم بھی ان کے ساتھ پتھر لا رہے تھے، آپ صلی اللہ علیہ و آلہ وسلم نے اپنا کپڑا اٹھا کر اپنے کندھے پر رکھ لیا (تاکہ پتھر کی رگڑ سے بچ سکیں)، تو غیب سے آواز دی گئی: اپنا ستر برہنہ نہ کرو، چنانچہ آپ صلی اللہ علیہ و آلہ وسلم نے پتھر پھینک دیا اور اپنا کپڑا پہن لیا۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ اللِّبَاسِ/حدیث: 7544]

سیدنا بہز بن حکیم اپنے والد اور وہ اپنے دادا (سیدنا معاویہ بن حیدہ رضی اللہ عنہ) سے روایت کرتے ہیں، انہوں نے کہا: میں نے عرض کیا: اے اللہ کے رسول! ہماری ستر پوشی کے متعلق کیا حکم ہے، ہم اس میں سے کیا چھپائیں اور کیا چھوڑ دیں؟ آپ صلی اللہ علیہ و آلہ وسلم نے فرمایا: ”اپنی شرمگاہ کی حفاظت کرو سوائے اپنی بیوی کے یا اس کے جو تمہاری ملکیت میں ہو (لونڈی)۔“ میں نے عرض کیا: بتائیے کہ اگر لوگ ایک دوسرے کے ساتھ ملے ہوئے (بھیڑ میں) ہوں؟ آپ صلی اللہ علیہ و آلہ وسلم نے فرمایا: ”اگر تم اس کی طاقت رکھتے ہو کہ اسے کوئی نہ دیکھ سکے تو کوئی بھی اسے ہرگز نہ دیکھے۔“ میں نے عرض کیا: بتائیے اگر ہم میں سے کوئی تنہا ہو؟ آپ صلی اللہ علیہ و آلہ وسلم نے فرمایا: ”اللہ تعالیٰ اس بات کا زیادہ حقدار ہے کہ اس سے حیا کی جائے۔“ اور آپ صلی اللہ علیہ و آلہ وسلم نے اپنا ہاتھ اپنی شرمگاہ پر رکھا۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ اللِّبَاسِ/حدیث: 7545]