سیدنا جابر بن عبداللہ انصاری رضی اللہ عنہ سے روایت ہے کہ ہم رسول اللہ صلی اللہ علیہ و آلہ وسلم کی خدمت میں حاضر تھے کہ اچانک ایک شخص سونے کے انڈے جیسی کوئی چیز لے کر آیا اور عرض کیا: ”اے اللہ کے رسول! یہ مجھے ایک کان سے ملی ہے، اسے قبول فرمائیے، یہ صدقہ ہے اور میرے پاس اس کے سوا کوئی مال نہیں ہے“، رسول اللہ صلی اللہ علیہ و آلہ وسلم نے اس سے اعراض فرمایا، پھر وہ آپ صلی اللہ علیہ و آلہ وسلم کے دائیں جانب سے آیا اور وہی بات کہی، آپ صلی اللہ علیہ و آلہ وسلم نے پھر اعراض فرمایا، پھر وہ بائیں جانب سے آیا تو آپ صلی اللہ علیہ و آلہ وسلم نے پھر رخ موڑ لیا، پھر وہ پیچھے سے آیا تو رسول اللہ صلی اللہ علیہ و آلہ وسلم نے وہ (سونا) اس سے لے لیا اور اسے اس کی طرف (ایسے انداز میں) اچھالا کہ اگر وہ اسے لگ جاتا تو اسے تکلیف پہنچتی یا وہ زخمی ہو جاتا، پھر رسول اللہ صلی اللہ علیہ و آلہ وسلم نے فرمایا: ”تم میں سے کوئی اپنا سارا مال لے کر آتا ہے اور کہتا ہے کہ یہ صدقہ ہے، پھر (خود محتاج ہو کر) بیٹھ جاتا ہے اور لوگوں کے سامنے ہاتھ پھیلاتا ہے، بہترین صدقہ وہ ہے جو اپنی ضرورت پوری ہونے کے بعد خوشحالی میں سے دیا جائے۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الزَّكَاةِ/حدیث: 1521]

سیدنا ابوسعید خدری رضی اللہ عنہ سے روایت ہے کہ ایک شخص مسجد میں داخل ہوا تو نبی کریم صلی اللہ علیہ و آلہ وسلم نے (اس کی خستہ حالی دیکھ کر صحابہ کو) حکم دیا کہ اس کے لیے کپڑے ڈالیں، چنانچہ لوگوں نے کپڑے ڈالے تو آپ صلی اللہ علیہ و آلہ وسلم نے اس کے لیے ان میں سے دو کپڑوں کا حکم فرمایا، پھر آپ صلی اللہ علیہ و آلہ وسلم نے صدقہ کی ترغیب دی تو اس شخص نے وہی دو کپڑے (صدقے کے لیے) پیش کر دیے، اس پر آپ صلی اللہ علیہ و آلہ وسلم نے اسے پکارا اور فرمایا: ”اپنے دو کپڑے (واپس) لے لو۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الزَّكَاةِ/حدیث: 1522]