Mustadrak al-Hakim

سیدنا ابو سعید خدری رضی اللہ عنہ بیان کرتے ہیں کہ رسول اللہ صلی اللہ علیہ و آلہ وسلم کو کھجور کی شاخیں ہاتھ میں تھامنا پسند تھا، ایک دن آپ صلی اللہ علیہ و آلہ وسلم مسجد میں داخل ہوئے جبکہ آپ کے ہاتھ میں ایسی ہی ایک شاخ تھی، آپ صلی اللہ علیہ و آلہ وسلم نے مسجد کے قبلہ والی دیوار پر کچھ تھوک کے نشانات دیکھے تو انہیں کھرچ کر صاف کر دیا، پھر لوگوں کی طرف غصے کی حالت میں متوجہ ہو کر فرمایا: "کیا تم میں سے کوئی یہ پسند کرتا ہے کہ کوئی آدمی اس کے سامنے کھڑا ہو کر اس کے چہرے پر تھوک دے؟ جب تم میں سے کوئی نماز کے لیے کھڑا ہوتا ہے تو وہ اپنے رب کے سامنے ہوتا ہے اور فرشتہ اس کی دائیں جانب ہوتا ہے، لہٰذا وہ اپنے سامنے یا دائیں جانب نہ تھوکے بلکہ اپنے بائیں قدم کے نیچے یا بائیں جانب تھوکے، اور اگر تھوک کا غلبہ ہو جائے تو اپنے کپڑے کے پلو میں اس طرح کر لے۔" اور آپ صلی اللہ علیہ و آلہ وسلم نے کپڑے کو ایک دوسرے پر تہہ کر کے دکھایا۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابِ الْإِمَامَةِ وَصَلَاةِ الْجَمَاعَةِ/حدیث: 956]