Mustadrak al-Hakim

سیدنا سفیان بن وہب خولانی رضی اللہ عنہ سے روایت ہے کہ میں نے رسول اللہ صلی اللہ علیہ و آلہ وسلم کو یہ فرماتے ہوئے سنا: ”سو سال کا عرصہ نہیں آئے گا مگر زمین کی پشت پر (موجودہ لوگوں میں سے) کوئی بھی باقی نہیں رہے گا“۔ راوی کہتے ہیں کہ میں نے یہ بات حجیرہ سے بیان کی، پھر عبداللہ بن حجیرہ، عبدالعزیز بن مروان کے پاس گئے، سفیان رضی اللہ عنہ کو بھی بلوایا گیا جبکہ وہ بہت بوڑھے ہو چکے تھے، عبدالعزیز نے ان سے اس حدیث کے بارے میں پوچھا تو انہوں نے اسے بیان کر دیا، عبدالعزیز نے کہا: شاید آپ صلی اللہ علیہ و آلہ وسلم کی مراد یہ تھی کہ جو لوگ اس وقت آپ صلی اللہ علیہ و آلہ وسلم کے ساتھ موجود تھے ان میں سے سو سال مکمل ہونے پر کوئی باقی نہیں رہے گا؟ سفیان رضی اللہ عنہ نے کہا: میں نے رسول اللہ صلی اللہ علیہ و آلہ وسلم کو اسی طرح فرماتے ہوئے سنا ہے۔
یہ حدیث صحیح الاسناد ہے، لیکن شیخین نے اسے روایت نہیں کیا۔ اور اس بات کی واضح دلیل کہ امیر المؤمنین سیدنا علی بن ابی طالب رضی اللہ عنہ نے سیدنا ابومسعود عقبہ بن عمرو انصاری رضی اللہ عنہ کو جو بات کہی اور عبدالعزیز بن مروان نے جو سفیان بن وہب خولانی رضی اللہ عنہ سے کہا وہ درست تھا، وہ درج ذیل حدیث ہے: [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8731]