Mustadrak al-Hakim

سیدنا عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ و آلہ وسلم نے سیدہ میمونہ بنت حارث سے نکاح فرمایا اور مکہ میں تین دن قیام کیا، تیسرے دن حویطب بن عبدالعزیٰ قریش کے چند افراد کے ساتھ حاضر ہوئے اور کہنے لگے: ”آپ کی مہلت ختم ہو گئی ہے لہٰذا اب ہمارے شہر سے نکل جائیے“، آپ صلی اللہ علیہ و آلہ وسلم نے فرمایا: ”تمہارا کیا حرج ہے اگر تم مجھے یہاں رہنے دو تاکہ میں تمہارے درمیان ہی رخصتی کی تقریب کروں اور تمہارے لیے کھانا تیار کروں جس میں تم بھی شریک ہو؟“ انہوں نے کہا: ”ہمیں آپ کے کھانے کی کوئی ضرورت نہیں، آپ یہاں سے نکل جائیے“، چنانچہ آپ صلی اللہ علیہ و آلہ وسلم سیدہ میمونہ رضی اللہ عنہا کو لے کر نکلے یہاں تک کہ مقامِ سرف پر ان کی رخصتی فرمائی۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا، اور اللہ کی قضا و قدر سے یہ بات تعجب خیز ہے کہ رسول اللہ صلی اللہ علیہ و آلہ وسلم نے سیدہ میمونہ رضی اللہ عنہا کے ساتھ مقامِ سرف پر خلوت فرمائی اور عمرہ قضا سے واپسی پر انہیں مدینہ لے گئے، وہ آپ صلی اللہ علیہ و آلہ وسلم کے نکاح میں رہیں یہاں تک کہ آپ صلی اللہ علیہ و آلہ وسلم فتح مکہ کے لیے نکلے، آپ صلی اللہ علیہ و آلہ وسلم انہیں ساتھ لے کر گئے یہاں تک کہ طائف فتح ہوا اور آپ مدینہ واپس آئے، پھر بعد میں سیدہ میمونہ کی وفات اسی مقامِ سرف پر ہوئی جہاں نکاح کے وقت رسول اللہ صلی اللہ علیہ و آلہ وسلم نے ان سے پہلی شب گزاری تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6963]