Mustadrak al-Hakim

سیدنا ابوہریرہ رضی اللہ عنہ سے روایت ہے کہ میں جب بھی حسین بن علی رضی اللہ عنہما کو دیکھتا ہوں تو میری آنکھوں سے آنسو بہنے لگتے ہیں، اور یہ اس لیے ہے کہ ایک دن رسول اللہ صلی اللہ علیہ و آلہ وسلم گھر سے نکلے، مجھے مسجد میں پایا، میرا ہاتھ پکڑا اور مجھ پر ٹیک لگائی، میں آپ کے ساتھ چل پڑا یہاں تک کہ آپ بنو قینقاع کے بازار پہنچے، آپ صلی اللہ علیہ و آلہ وسلم نے مجھ سے کوئی بات نہیں کی، وہاں چکر لگایا اور دیکھا، پھر واپس آئے اور میں بھی آپ کے ساتھ واپس آیا، آپ مسجد میں گوٹ مار کر بیٹھ گئے اور مجھ سے فرمایا: ”چھوٹے بچے کو میرے پاس بلاؤ“، پس حسین دوڑتے ہوئے آئے اور آپ صلی اللہ علیہ و آلہ وسلم کی گود میں گر گئے، پھر انہوں نے اپنا ہاتھ رسول اللہ صلی اللہ علیہ و آلہ وسلم کی داڑھی مبارک میں ڈالا، تو رسول اللہ صلی اللہ علیہ و آلہ وسلم حسین کا منہ کھول کر اپنا لعابِ دہن ان کے منہ میں ڈالنے لگے اور فرمانے لگے: «اللَّهُمَّ إِنِّي أُحِبُّهُ فَأَحِبَّهُ» ”اے اللہ! میں اس سے محبت کرتا ہوں پس تو بھی اس سے محبت فرما۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4883]