Mustadrak al-Hakim

سیدنا انس بن مالک رضی اللہ عنہ سے روایت ہے، انہوں نے کہا: میں رسول اللہ صلی اللہ علیہ و آلہ وسلم کی خدمت کیا کرتا تھا، ایک مرتبہ رسول اللہ صلی اللہ علیہ و آلہ وسلم کی بارگاہ میں بھنا ہوا پرندہ پیش کیا گیا، تو آپ صلی اللہ علیہ و آلہ وسلم نے دعا فرمائی: ”اے اللہ! اپنی مخلوق میں سے جو تجھے سب سے زیادہ محبوب ہو، اسے میرے پاس بھیج دے تاکہ وہ میرے ساتھ مل کر یہ پرندہ تناول کرے۔“ سیدنا انس رضی اللہ عنہ کہتے ہیں کہ میں نے (اپنے جی میں) دعا کی: اے اللہ! وہ شخص انصار میں سے کوئی ہو۔ اتنے میں سیدنا علی رضی اللہ عنہ آگئے، میں نے کہا: رسول اللہ صلی اللہ علیہ و آلہ وسلم کسی ضرورت (کام) میں مصروف ہیں، وہ دوبارہ آئے تو میں نے پھر کہا: رسول اللہ صلی اللہ علیہ و آلہ وسلم کسی ضرورت میں مصروف ہیں، وہ جب (تیسری بار) آئے تو رسول اللہ صلی اللہ علیہ و آلہ وسلم نے فرمایا: ”دروازہ کھول دو۔“ پس وہ داخل ہوئے تو آپ صلی اللہ علیہ و آلہ وسلم نے دریافت فرمایا: ”تمہیں میرے پاس آنے سے کس چیز نے روکے رکھا؟“ انہوں نے عرض کیا: یہ آخری تیسری مرتبہ تھی کہ انس نے مجھے یہ کہہ کر واپس کر دیا کہ آپ کسی کام میں مصروف ہیں۔ رسول اللہ صلی اللہ علیہ و آلہ وسلم نے (انس رضی اللہ عنہ سے) پوچھا: ”تمہیں اس طرزِ عمل پر کس چیز نے ابھارا؟“ میں نے عرض کیا: اے اللہ کے رسول! میں نے آپ کی دعا سن لی تھی، اس لیے میری خواہش تھی کہ وہ خوش نصیب شخص میری قوم (انصار) میں سے کوئی ہو۔ رسول اللہ صلی اللہ علیہ و آلہ وسلم نے فرمایا: ”بے شک انسان اپنی قوم سے محبت رکھتا ہے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا، اسے سیدنا انس رضی اللہ عنہ سے ان کے شاگردوں کی ایک جماعت نے روایت کیا ہے جن کی تعداد تیس سے زائد ہے، نیز اس کی تائید میں سیدنا علی، سیدنا ابوسعید خدری اور سیدنا سفینہ رضی اللہ عنہم سے بھی صحیح روایات موجود ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4700]