حدثني محمد بن صالح بن هانئ، حدثنا محمد بن إسماعيل بن مِهْران، حدثنا هارون بن سعيد الأَيْلي، حدثني خالد بن نِزَار، حدثنا القاسم بن مبرور، عن يونس بن يزيد، عن هشام بن عُرْوة، عن أبيه، عن عائشة قالت: شكا الناسُ إلى رسول الله صلى الله عليه و آله وسلم قُحُوطَ المطر، فأمر بمِنبَر فوضع له في المصلَّى، ووَعَدَ الناس يومًا يخرُجون فيه، قالت عائشة: فخرج رسول الله صلى الله عليه و آله وسلم حين بَدَا حاجبُ الشمس، فقعد على المِنبَر فكبَّر وحَمِدَ الله ثم قال:"إنكم شَكَوتم جَدْبَ ديارِكم، واستِئخارَ المطرِ عن إبّانِ زمانِه، وقد أَمَرَكم الله أن تَدْعُوه، ووَعَدَكم أن يستجيبَ لكم" ثم قال:" ﴿الْحَمْدُ لِلَّهِ رَبِّ الْعَالَمِينَ (2) الرَّحْمَنِ الرَّحِيمِ (3) مَالِكِ يَوْمِ الدِّينِ﴾، لا إله إلا الله، يَفعلُ ما يريد، اللهم أنتَ الله لا إله إلّا أنتَ الغنيُّ ونحن الفقراء، أنزِلْ علينا الغَيْث، واجعلْ ما أنزلتَ لنا قوةً وبَلاغًا إلى حِين"، ثم رَفَعَ يديه، فلم يَزَلْ في الرفع حتى بَدَا بياضُ إبْطَيه، ثم حوَّل إلى الناس ظَهرَه وقَلَبَ - أو حوَّل - رِداءَه وهو رافعٌ يديه، ثم أقبَلَ على الناس ونَزَلَ فصلى ركعتين، فأنشأَ الله سحابًا فرَعَدَتْ وبَرَقَتْ، ثم أمطَرَتْ بإذن الله، فلم يأتِ مسجدَه حتى سالتِ السُّيول، فلمَّا رأى سُرعتَهم إلى الكِنِّ ضَحِكَ حتى بَدَتْ نواجِذُه، فقال:"أشهدُ أن الله على كل شيءٍ قدير، وأني عبدُ الله ورسولُه" (1) .
هذا حديث صحيح على شرط الشيخين، ولم يُخرجاه.
Translation: طلحہ بابر
ہشام بن عروہ اپنے والد سے اور وہ سیدہ عائشہ رضی اللہ عنہا سے روایت کرتے ہیں، انہوں نے فرمایا: لوگوں نے رسول اللہ صلی اللہ علیہ و آلہ وسلم سے بارش نہ ہونے کی شکایت کی، تو آپ صلی اللہ علیہ و آلہ وسلم نے ایک منبر کا حکم دیا جو آپ صلی اللہ علیہ و آلہ وسلم کے لیے عیدگاہ میں رکھ دیا گیا، اور آپ صلی اللہ علیہ و آلہ وسلم نے لوگوں سے ایک دن کا وعدہ کیا جس میں وہ سب نکلیں۔ سیدہ عائشہ رضی اللہ عنہا فرماتی ہیں: رسول اللہ صلی اللہ علیہ و آلہ وسلم اس وقت نکلے جب سورج کا کنارہ ظاہر ہوا، پس آپ صلی اللہ علیہ و آلہ وسلم منبر پر بیٹھے، اللہ کی تکبیر اور حمد بیان کی پھر فرمایا: ”تم نے اپنے علاقوں کی قحط سالی اور بارش کے اپنے مقررہ وقت سے تاخیر کی شکایت کی ہے، اور بے شک اللہ نے تمہیں حکم دیا ہے کہ تم اس سے دعا کرو اور اس نے تم سے وعدہ کیا ہے کہ وہ تمہاری دعا قبول فرمائے گا۔“ پھر آپ صلی اللہ علیہ و آلہ وسلم نے دعا فرمائی: ﴿الْحَمْدُ لِلَّهِ رَبِّ الْعَالَمِينَ الرَّحْمَنِ الرَّحِيمِ مَالِكِ يَوْمِ الدِّينِ﴾ «لَا إِلٰهَ إِلَّا اللّٰهُ، يَفْعَلُ مَا يُرِيدُ، اللَّهُمَّ أَنْتَ اللّٰهُ لَا إِلٰهَ إِلَّا أَنْتَ الْغَنِيُّ وَنَحْنُ الْفُقَرَاءُ، أَنْزِلْ عَلَيْنَا الْغَيْثَ، وَاجْعَلْ مَا أَنْزَلْتَ لَنَا قُوَّةً وَبَلَاغًا إِلَى حِينٍ» ”سب تعریفیں اللہ کے لیے ہیں جو تمام جہانوں کا پالنے والا ہے، نہایت مہربان، بہت رحم کرنے والا ہے، جزا کے دن کا مالک ہے۔ اللہ کے سوا کوئی معبود نہیں، وہ جو چاہتا ہے کرتا ہے، اے اللہ! تو ہی اللہ ہے، تیرے سوا کوئی معبود نہیں، تو غنی ہے اور ہم محتاج ہیں، ہم پر بارش نازل فرما اور جو کچھ تو ہم پر نازل فرمائے اسے ہمارے لیے ایک مدت تک قوت اور پہنچنے کا ذریعہ بنا دے۔“ پھر آپ صلی اللہ علیہ و آلہ وسلم نے اپنے ہاتھ اٹھائے اور انہیں اتنی دیر تک اٹھائے رکھا کہ آپ صلی اللہ علیہ و آلہ وسلم کی بغلوں کی سفیدی ظاہر ہونے لگی، پھر آپ صلی اللہ علیہ و آلہ وسلم نے لوگوں کی طرف اپنی پیٹھ پھیر لی اور اپنے ہاتھ اٹھائے ہوئے ہی اپنی چادر کو پلٹا، پھر آپ صلی اللہ علیہ و آلہ وسلم لوگوں کی طرف متوجہ ہوئے اور نیچے اترے اور دو رکعت نماز پڑھائی، پس اللہ تعالیٰ نے بادل پیدا کیے جن میں گرج اور چمک تھی، پھر اللہ کے حکم سے بارش ہوئی، اور آپ صلی اللہ علیہ و آلہ وسلم ابھی اپنی مسجد تک نہیں پہنچے تھے کہ نالے بہہ نکلے، پس جب آپ صلی اللہ علیہ و آلہ وسلم نے لوگوں کو سائے کی طرف جلدی بھاگتے ہوئے دیکھا تو آپ صلی اللہ علیہ و آلہ وسلم ہنس پڑے یہاں تک کہ آپ صلی اللہ علیہ و آلہ وسلم کے مبارک دانت ظاہر ہو گئے، پھر آپ صلی اللہ علیہ و آلہ وسلم نے فرمایا: ”میں گواہی دیتا ہوں کہ بے شک اللہ ہر چیز پر پوری قدرت رکھنے والا ہے، اور بے شک میں اللہ کا بندہ اور اس کا رسول ہوں۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ الِاسْتِسْقَاءِ/حدیث: 1240]
تخریج الحدیث
[ترقيم الرساله 1240] [ترقيم الشركة 1229]
