الادب المفرد

سیدنا سعد رضی اللہ عنہ کے تین بیٹوں سے روایت ہے کہ مکہ مکرمہ میں رسول اللہ صلی اللہ علیہ و آلہ وسلم سیدنا سعد رضی اللہ عنہ کی عیادت کے لیے تشریف لے گئے تو وہ رو پڑے۔ آپ صلی اللہ علیہ و آلہ وسلم نے فرمایا: ”تم کیوں روتے ہو؟“ انہوں نے کہا: مجھے ڈر ہے کہ میں اس زمین میں فوت ہو جاؤں گا جہاں سے ہجرت کی تھی جیسا کہ سعد بن خولہ رضی اللہ عنہ فوت ہوئے ہیں۔ آپ صلی اللہ علیہ و آلہ وسلم نے دعا فرمائی: «اللَّهُمَّ اشْفِ سَعْدًا» ”اے اللہ سعد کو شفا عطا فرما۔“ آپ صلی اللہ علیہ و آلہ وسلم نے تین مرتبہ دعا کی۔ انہوں نے کہا: میرے پاس مال و دولت کی فراوانی ہے اور میری وارث صرف میری بیٹی ہے۔ کیا میں اپنے تمام مال کے بارے میں فی سبیل اللہ وصیت کر دوں؟ آپ صلی اللہ علیہ و آلہ وسلم نے فرمایا: ”نہیں۔“ انہوں نے عرض کیا: دو تہائی کی؟ آپ صلی اللہ علیہ و آلہ وسلم نے فرمایا: ”نہیں۔“ انہوں نے کہا: آدھے مال کی؟ آپ صلی اللہ علیہ و آلہ وسلم نے فرمایا: ”نہیں۔“ انہوں نے کہا: ایک تہائی کی کر سکتا ہوں؟ آپ صلی اللہ علیہ و آلہ وسلم نے فرمایا: ”تیسرے حصے کی کر لو، ویسے تیسرے حصے کی بھی ہے زیادہ۔ تیرا مال میں سے صدقہ کرنا بھی صدقہ ہے، اور تیرا اہل و عیال پر خرچ کرنا بھی صدقہ ہے، اور جو تیری بیوی تیرا کھانا کھائے وہ بھی تیرے حق میں صدقہ ہے، اور تم اپنے اہل و عیال کو خوش حال چھوڑ کر دنیا سے جاؤ یہ اس سے کہیں بہتر ہے کہ تم انہیں اس حال میں چھوڑو کہ وہ لوگوں کے سامنے ہاتھ پھیلاتے پھریں۔“ اور آپ صلی اللہ علیہ و آلہ وسلم نے اپنے ہاتھ سے اشارہ فرمایا۔ [الادب المفرد/كِتَابُ/حدیث: 520]