سورۃ رکوع 3 (آیات 33–62) — تفہیم القرآن

The Holy Qur'an

اَفَرَءَیۡتَ الَّذِیۡ تَوَلّٰی ﴿ۙ۳۳﴾ وَ اَعۡطٰی قَلِیۡلًا وَّ اَکۡدٰی ﴿۳۴﴾ اَعِنۡدَہٗ عِلۡمُ الۡغَیۡبِ فَہُوَ یَرٰی ﴿۳۵﴾ اَمۡ لَمۡ یُنَبَّاۡ بِمَا فِیۡ صُحُفِ مُوۡسٰی ﴿ۙ۳۶﴾ وَ اِبۡرٰہِیۡمَ الَّذِیۡ وَفّٰۤی ﴿ۙ۳۷﴾ اَلَّا تَزِرُ وَازِرَۃٌ وِّزۡرَ اُخۡرٰی ﴿ۙ۳۸﴾ وَ اَنۡ لَّیۡسَ لِلۡاِنۡسَانِ اِلَّا مَا سَعٰی ﴿ۙ۳۹﴾ وَ اَنَّ سَعۡیَہٗ سَوۡفَ یُرٰی ﴿۪۴۰﴾ ثُمَّ یُجۡزٰىہُ الۡجَزَآءَ الۡاَوۡفٰی ﴿ۙ۴۱﴾ وَ اَنَّ اِلٰی رَبِّکَ الۡمُنۡتَہٰی ﴿ۙ۴۲﴾ وَ اَنَّہٗ ہُوَ اَضۡحَکَ وَ اَبۡکٰی ﴿ۙ۴۳﴾ وَ اَنَّہٗ ہُوَ اَمَاتَ وَ اَحۡیَا ﴿ۙ۴۴﴾ وَ اَنَّہٗ خَلَقَ الزَّوۡجَیۡنِ الذَّکَرَ وَ الۡاُنۡثٰی ﴿ۙ۴۵﴾ مِنۡ نُّطۡفَۃٍ اِذَا تُمۡنٰی ﴿۪۴۶﴾ وَ اَنَّ عَلَیۡہِ النَّشۡاَۃَ الۡاُخۡرٰی ﴿ۙ۴۷﴾ وَ اَنَّہٗ ہُوَ اَغۡنٰی وَ اَقۡنٰی ﴿ۙ۴۸﴾ وَ اَنَّہٗ ہُوَ رَبُّ الشِّعۡرٰی ﴿ۙ۴۹﴾ وَ اَنَّہٗۤ اَہۡلَکَ عَادَۨ ا الۡاُوۡلٰی ﴿ۙ۵۰﴾ وَ ثَمُوۡدَا۠ فَمَاۤ اَبۡقٰی ﴿ۙ۵۱﴾ وَ قَوۡمَ نُوۡحٍ مِّنۡ قَبۡلُ ؕ اِنَّہُمۡ کَانُوۡا ہُمۡ اَظۡلَمَ وَ اَطۡغٰی ﴿ؕ۵۲﴾ وَ الۡمُؤۡتَفِکَۃَ اَہۡوٰی ﴿ۙ۵۳﴾ فَغَشّٰہَا مَا غَشّٰی ﴿ۚ۵۴﴾ فَبِاَیِّ اٰلَآءِ رَبِّکَ تَتَمَارٰی ﴿۵۵﴾ ہٰذَا نَذِیۡرٌ مِّنَ النُّذُرِ الۡاُوۡلٰی ﴿۵۶﴾ اَزِفَتِ الۡاٰزِفَۃُ ﴿ۚ۵۷﴾ لَیۡسَ لَہَا مِنۡ دُوۡنِ اللّٰہِ کَاشِفَۃٌ ﴿ؕ۵۸﴾ اَفَمِنۡ ہٰذَا الۡحَدِیۡثِ تَعۡجَبُوۡنَ ﴿ۙ۵۹﴾ وَ تَضۡحَکُوۡنَ وَ لَا تَبۡکُوۡنَ ﴿ۙ۶۰﴾ وَ اَنۡتُمۡ سٰمِدُوۡنَ ﴿۶۱﴾ فَاسۡجُدُوۡا لِلّٰہِ وَ اعۡبُدُوۡا ﴿٪ٛ۶۲﴾

Translation

ترجمہ: سید ابو الاعلیٰ مودودی

پھر اے نبیؐ، تم نے اُس شخص کو بھی دیکھا جو راہ خدا سے پھر گیا ﴿۳۳﴾ اور تھوڑا سا دے کر رک گیا ﴿۳۴﴾ کیا اس کے پاس غیب کا علم ہے کہ وہ حقیقت کو دیکھ رہا ہے؟ ﴿۳۵﴾ کیا اُسے اُن باتوں کی کوئی خبر نہیں پہنچی جو موسیٰؑ کے صحیفوں ﴿۳۶﴾ اور اُس ابراہیمؑ کے صحیفوں میں بیان ہوئی ہیں جس نے وفا کا حق ادا کر دیا؟ ﴿۳۷﴾ "یہ کہ کوئی بوجھ اٹھانے والا دوسرے کا بوجھ نہیں اٹھائے گا ﴿۳۸﴾ اور یہ کہ انسان کے لیے کچھ نہیں ہے مگر وہ جس کی اُس نے سعی کی ہے ﴿۳۹﴾ اور یہ کہ اس کی سعی عنقریب دیکھی جائے گی ﴿۴۰﴾ اور اس کی پوری جزا اسے دی جائے گی ﴿۴۱﴾ اور یہ کہ آخر کار پہنچنا تیرے رب ہی کے پاس ہے ﴿۴۲﴾ اور یہ کہ اُسی نے ہنسایا اور اُسی نے رلایا ﴿۴۳﴾ اور یہ کہ اُسی نے موت دی اور اُسی نے زندگی بخشی ﴿۴۴﴾ اور یہ کہ اُسی نے نر اور مادہ کا جوڑا پیدا کیا ﴿۴۵﴾ ایک بوند سے جب وہ ٹپکائی جاتی ہے ﴿۴۶﴾ اور یہ کہ دوسری زندگی بخشنا بھی اُسی کے ذمہ ہے ﴿۴۷﴾ اور یہ کہ اُسی نے غنی کیا اور جائداد بخشی ﴿۴۸﴾ اور یہ کہ وہی شعریٰ کا رب ہے ﴿۴۹﴾ اور یہ کہ اُسی نے عاد اولیٰ کو ہلاک کیا ﴿۵۰﴾ اور ثمود کو ایسا مٹایا کہ ان میں سے کسی کو باقی نہ چھوڑا ﴿۵۱﴾ اور اُن سے پہلے قوم نوحؑ کو تباہ کیا کیونکہ وہ تھے ہی سخت ظالم و سرکش لوگ ﴿۵۲﴾ اور اوندھی گرنے والی بستیوں کو اٹھا پھینکا ﴿۵۳﴾ پھر چھا دیا اُن پر وہ کچھ جو (تم جانتے ہی ہو کہ) کیا چھا دیا ﴿۵۴﴾ پس اے مخاطب، اپنے رب کی کن کن نعمتوں میں تو شک کرے گا؟" ﴿۵۵﴾ یہ ایک تنبیہ ہے پہلے آئی ہوئی تنبیہات میں سے ﴿۵۶﴾ آنے والی گھڑی قریب آ لگی ہے ﴿۵۷﴾ اللہ کے سوا کوئی اُس کو ہٹا نے والا نہیں ﴿۵۸﴾ اب کیا یہی وہ باتیں ہیں جن پر تم اظہار تعجب کرتے ہو؟ ﴿۵۹﴾ ہنستے ہو اور روتے نہیں ہو؟ ﴿۶۰﴾ اور گا بجا کر انہیں ٹالتے ہو؟ ﴿۶۱﴾ جھک جاؤ اللہ کے آگے اور بندگی بجا لاؤ ﴿۶۲﴾

ترجمہ: مولانا محمد جوناگڑھی

کیا آپ نے اسے دیکھا جس نے منھ موڑ لیا ﴿۳۳﴾ اور بہت کم دیا اور ہاتھ روک لیا ﴿۳۴﴾ کیا اسے علم غیب ہے کہ وه (سب کچھ) دیکھ رہا ہے؟ ﴿۳۵﴾ کیا اسے اس چیز کی خبر نہیں دی گئی جو موسیٰ (علیہ السلام) کے ﴿۳۶﴾ اور وفادار ابراہیم (علیہ السلام) کے صحیفوں میں تھا ﴿۳۷﴾ کہ کوئی شخص کسی دوسرے کا بوجھ نہ اٹھائے گا ﴿۳۸﴾ اور یہ کہ ہر انسان کے لیے صرف وہی ہے جس کی کوشش خود اس نے کی ﴿۳۹﴾ اور یہ کہ بیشک اس کی کوشش عنقریب دیکھی جائے گی ﴿۴۰﴾ پھر اسے پورا پورا بدلہ دیا جائے گا ﴿۴۱﴾ اور یہ کہ آپ کے رب ہی کی طرف پہنچنا ہے ﴿۴۲﴾ اور یہ کہ وہی ہنساتا ہے اور وہی رﻻتا ہے ﴿۴۳﴾ اور یہ کہ وہی مارتا ہے اور جلاتا ہے ﴿۴۴﴾ اور یہ کہ اسی نے جوڑا یعنی نر ماده پیدا کیا ہے ﴿۴۵﴾ نطفہ سے جبکہ وه ٹپکایا جاتا ہے ﴿۴۶﴾ اور یہ کہ اسی کے ذمہ دوباره پیدا کرنا ہے ﴿۴۷﴾ اور یہ کہ وہی مالدار بناتا ہے اور سرمایہ دیتا ہے ﴿۴۸﴾ اور یہ کہ وہی شعریٰ (ستارے) کا رب ہے ﴿۴۹﴾ اور یہ کہ اس نے عاد اول کو ہلاک کیا ہے ﴿۵۰﴾ اور ﺛمود کو بھی (جن میں سے) ایک کو بھی باقی نہ رکھا ﴿۵۱﴾ اور اس سے پہلے قوم نوح کو، یقیناً وه بڑے ﻇالم اور سرکش تھے ﴿۵۲﴾ اور مؤتفکہ (شہر یا الٹی ہوئی بستیوں کو) اسی نے الٹ دیا ﴿۵۳﴾ پھر اس پر چھا دیا جو چھایا ﴿۵۴﴾ پس اے انسان تو اپنے رب کی کس کس نعمت کے بارے میں جھگڑے گا؟ ﴿۵۵﴾ یہ (نبی) ڈرانے والے ہیں پہلے ڈرانے والوں میں سے ﴿۵۶﴾ آنے والی گھڑی قریب آ گئی ہے ﴿۵۷﴾ اللہ کے سوا اس کا (وقت معین پر کھول) دکھانے واﻻ اور کوئی نہیں ﴿۵۸﴾ پس کیا تم اس بات سے تعجب کرتے ہو ﴿۵۹﴾ اور ہنس رہے ہو؟ روتے نہیں؟ ﴿۶۰﴾ (بلکہ) تم کھیل رہے ہو ﴿۶۱﴾ اب اللہ کے سامنے سجدے کرو اور (اسی) کی عبادت کرو ﴿۶۲﴾

ترجمہ: فتح محمد جالندھری

بھلا تم نے اس شخص کو دیکھا جس نے منہ پھیر لیا ﴿۳۳﴾ اور تھوڑا سا دیا (پھر) ہاتھ روک لیا ﴿۳۴﴾ کیا اس کے پاس غیب کا علم ہے کہ وہ اس کو دیکھ رہا ہے ﴿۳۵﴾ کیا جو باتیں موسیٰ کے صحیفوں میں ہیں ان کی اس کو خبر نہیں پہنچی ﴿۳۶﴾ اور ابراہیمؑ کی جنہوں نے (حق طاعت ورسالت) پورا کیا ﴿۳۷﴾ یہ کہ کوئی شخص دوسرے (کے گناہ) کا بوجھ نہیں اٹھائے گا ﴿۳۸﴾ اور یہ کہ انسان کو وہی ملتا ہے جس کی وہ کوشش کرتا ہے ﴿۳۹﴾ اور یہ کہ اس کی کوشش دیکھی جائے گی ﴿۴۰﴾ پھر اس کو اس کا پورا پورا بدلا دیا جائے گا ﴿۴۱﴾ اور یہ کہ تمہارے پروردگار ہی کے پاس پہنچنا ہے ﴿۴۲﴾ اور یہ کہ وہ ہنساتا اور رلاتا ہے ﴿۴۳﴾ اور یہ کہ وہی مارتا اور جلاتا ہے ﴿۴۴﴾ اور یہ کہ وہی نر اور مادہ دو قسم (کے حیوان) پیدا کرتا ہے ﴿۴۵﴾ (یعنی) نطفے سے جو (رحم میں) ڈالا جاتا ہے ﴿۴۶﴾ اور یہ کہ (قیامت کو) اسی پر دوبارہ اٹھانا لازم ہے ﴿۴۷﴾ اور یہ کہ وہی دولت مند بناتا اور مفلس کرتا ہے ﴿۴۸﴾ اور یہ کہ وہی شعریٰ کا مالک ہے ﴿۴۹﴾ اور یہ کہ اسی نے عاد اول کو ہلاک کر ڈالا ﴿۵۰﴾ اور ثمود کو بھی۔ غرض کسی کو باقی نہ چھوڑا ﴿۵۱﴾ اور ان سے پہلے قوم نوحؑ کو بھی۔ کچھ شک نہیں کہ وہ لوگ بڑے ہی ظالم اور بڑے ہی سرکش تھے ﴿۵۲﴾ اور اسی نے الٹی ہوئی بستیوں کو دے پٹکا ﴿۵۳﴾ پھر ان پر چھایا جو چھایا ﴿۵۴﴾ تو (اے انسان) تو اپنے پروردگار کی کون سی نعمت پر جھگڑے گا ﴿۵۵﴾ یہ (محمدﷺ) بھی اگلے ڈر سنانے والوں میں سے ایک ڈر سنانے والے ہیں ﴿۵۶﴾ آنے والی (یعنی قیامت) قریب آ پہنچی ﴿۵۷﴾ اس (دن کی تکلیفوں) کو خدا کے سوا کوئی دور نہیں کرسکے گا ﴿۵۸﴾ اے منکرین خدا) کیا تم اس کلام سے تعجب کرتے ہو؟ ﴿۵۹﴾ اور ہنستے ہو اور روتے نہیں؟ ﴿۶۰﴾ اور تم غفلت میں پڑ رہے ہو ﴿۶۱﴾ تو خدا کے آگے سجدہ کرو اور (اسی کی) عبادت کرو ﴿۶۲﴾

ترجمہ: احمد رضا خان بریلوی

تو کیا تم نے دیکھا جو پھر گیا ﴿۳۳﴾ اور کچھ تھوڑا سا دیا اور روک رکھا ﴿۳۴﴾ کیا اس کے پاس غیب کا علم ہے تو وہ دیکھ رہا ہے ﴿۳۵﴾ کیا اسے اس کی خبر نہ آئی جو صحیفوں میں ہے موسیٰ کے ﴿۳۶﴾ اور ابراہیم کے جو پورے احکام بجالایا ﴿۳۷﴾ کہ کوئی بوجھ اٹھانے والی جان دوسری کا بوجھ نہیں اٹھاتی ﴿۳۸﴾ اور یہ کہ آدمی نہ پاے گا مگر اپنی کوشش ﴿۳۹﴾ اور یہ کہ اس کی کو شش عنقر یب دیکھی جاے گی ﴿۴۰﴾ پھر اس کا بھرپور بدلا دیا جائے گا ﴿۴۱﴾ اور یہ کہ بیشک تمہارے رب ہی کی طرف انتہا ہے ﴿۴۲﴾ اور یہ کہ وہی ہے جس نے ہنسایا اور رلایا ﴿۴۳﴾ اور یہ کہ وہی ہے جس نے مارا اور جِلایا ﴿۴۴﴾ اور یہ کہ اسی نے دو جوڑے بنائے نر اور مادہ ﴿۴۵﴾ نطفہ سے جب ڈالا جائے ﴿۴۶﴾ اور یہ کہ اسی کے ذمہ ہے پچھلا اٹھانا (دوبارہ زندہ کرنا) ﴿۴۷﴾ اور یہ کہ اسی نے غنیٰ دی اور قناعت دی ﴿۴۸﴾ او ریہ کہ وہی ستارہ شِعریٰ کا رب ہے ﴿۴۹﴾ اور یہ کہ اسی نے پہلی عاد کو ہلاک فرمایا ﴿۵۰﴾ اور ثمود کو تو کوئی باقی نہ چھوڑا ﴿۵۱﴾ اور ان سے پہلے نوح کی قوم کو بیشک وہ ان سے بھی ظالم اور سرکش تھے ﴿۵۲﴾ اور اس نے الٹنے والی بستی کو نیچے گرایا ﴿۵۳﴾ تو اس پر چھایا جو کچھ چھایا ﴿۵۴﴾ تو اے سننے والے اپنے رب کی کون سی نعمتوں میں شک کرے گا، ﴿۵۵﴾ یہ ایک ڈر سنانے والے ہیں اگلے ڈرانے والوں کی طرح ﴿۵۶﴾ پاس آئی پاس آنے والی ﴿۵۷﴾ اللہ کے سوا اس کا کوئی کھولنے والا نہیں ﴿۵۸﴾ تو کیا اس بات سے تم تعجب کرتے ہو ﴿۵۹﴾ اور ہنستے ہو اور روتے نہیں ﴿۶۰﴾ اور تم کھیل میں پڑے ہو، ﴿۶۱﴾ تو اللہ کے لیے سجدہ اور اس کی بندگی کرو ﴿۶۲﴾

ترجمہ: علامہ محمد حسین نجفی

(اے رسول(ص)) کیا آپ(ص) نے اس شخص کو دیکھا ہے جس نے رُوگردانی کی۔ ﴿۳۳﴾ اس نے تھوڑا سا (مال) دیا اور پھر ہاتھ روک لیا۔ ﴿۳۴﴾ کیا اس کے پاس غیب کا علم ہے پس وہ دیکھ رہا ہے؟ ﴿۳۵﴾ کیا اسے اس بات کی خبر نہیں پہنچی جو موسیٰ (ع) کے صحیفوں میں ہے۔ ﴿۳۶﴾ اور اس ابراہیم (ع) کے صحیفوں میں جس نے وفاداری کا حق ادا کر دیا۔ ﴿۳۷﴾ کہ کوئی بوجھ اٹھانے والا کسی دوسرے کا بوجھ نہیں اٹھائے گا۔ ﴿۳۸﴾ اور یہ کہ انسان کے لئے وہی کچھ ہے جس کی وہ کوشش کرتا ہے۔ ﴿۳۹﴾ اور اس کی سعی و کوشش عنقریب دیکھی جائے گی۔ ﴿۴۰﴾ اور پھر اسے پوری جزا دی جائے گی۔ ﴿۴۱﴾ اور یہ کہ سب کی انتہا آپ(ص) کے پروردگار کی طرف ہے۔ ﴿۴۲﴾ بےشک وہی ہنساتا ہے اور رلاتا ہے۔ ﴿۴۳﴾ اور وہی مارتا ہے اور جِلاتا ہے۔ ﴿۴۴﴾ اور یہ کہ اسی نے نر اور مادہ کے جوڑے پیدا کئے۔ ﴿۴۵﴾ (وہ بھی) ایک نطفہ سے (جو رحم میں) ٹپکایا جاتا ہے۔ ﴿۴۶﴾ اور بیشک دوبارہ پیدا کرنا اسی (اللہ) کے ذمہ ہے۔ ﴿۴۷﴾ اور یہ کہ وہی سرمایہ دار بناتا ہے اور وہی فقیر و نادار بناتا ہے۔ ﴿۴۸﴾ اور یہ کہ وہ شعریٰ نامی ستارے کا پروردگار ہے۔ ﴿۴۹﴾ اور یہ کہ اسی نے عادِ اول (قومِ ہود) کو ہلاک کیا۔ ﴿۵۰﴾ اور ثمود کو بھی اس طرح ہلاک کیا کہ کسی کو باقی نہیں چھوڑا۔ ﴿۵۱﴾ اوران سب سے پہلے قومِ نوح(ع) کو بھی (برباد کیا) بےشک وہ بڑے ظالم اور بڑے سرکش تھے۔ ﴿۵۲﴾ (لوط (ع)) کی الٹی ہوئی ان (بستیوں) کو بھی دے مارا۔ ﴿۵۳﴾ پس ان (بستیوں) کو ڈھانک لیا اس (آفت) نے جس نے ڈھانک لیا۔ ﴿۵۴﴾ پس تو اے مخاطب اپنے پروردگار کی کن کن نعمتوں میں شک کرے گا۔ ﴿۵۵﴾ یہ (رسول(ص)) بھی ڈرانے والا ہے پہلے ڈرانے والے (رسولوں(ع)) سے۔ ﴿۵۶﴾ قریب آنے والی (قیامت) قریب آگئی ہے۔ ﴿۵۷﴾ اللہ کے سوا اس کا کوئی ہٹانے والانہیں ہے۔ ﴿۵۸﴾ کیا تم اس بات سے تعجب کرتے ہو؟ ﴿۵۹﴾ اور ہنستے ہو اور روتے نہیں۔ ﴿۶۰﴾ اور تم غفلت میں مدہوش ہو۔ ﴿۶۱﴾ پس اللہ کے لئے سجدہ کرو اور(اسی کی) عبادت کرو۔ ﴿۶۲﴾

Tafsir

تفہیم القرآن مولانا مودودیؒ

(رکوع۳) پھر اے نبیؐ ، تم نے اُس شخص کو بھی دیکھا جو راہ ِ خدا سے پھر گیا اور تھوڑا سا دے کر رُک گیا ۔³⁴ کیا اس کے پاس غیب کا علم ہے کہ وہ حقیقت کو دیکھ رہا ہے؟³⁵ کیا اُسے اُن باتوں کی کوئی خبر نہیں پہنچی جو موسٰیؑ کے صحیفوں اور اُس ابراہیمؑ کے صحیفوں میں بیان ہوئی ہیں جس نے وفا کا حق ادا کر دیا؟³⁶
”یہ کہ کوئی بوجھ اٹھا نے والا دوسرے کا بوجھ نہیں اٹھائے گا،³⁷
اور یہ کہ انسان کے لیے کچھ نہیں ہے مگر وہ جس کی اس نے سعی کی ہے،³⁸
اور یہ کہ اس کی سعی عنقریب دیکھی جائے گی³⁹ اور اس کی پوری جزا اسے دی جائے گی،
اور یہ کہ آخر کا پہنچنا تیرے رب ہی کے پاس ہے،
اور یہ کہ اُسی نے ہنسایا اور اُسی نے رلایا،⁴⁰
اور یہ کہ اُسی نے مو ت دی اور اُسی نے زندگی بخشی،
اور یہ کہ اُسی نےنراور مادہ کا جوڑا پیدا کیا ایک بُوند سے جب وہ ٹپکائی جاتی ہے،⁴¹
اور یہ کہ دوسری زندگی بخشنا بھی اُسی کے ذمّہ ہے،⁴²
اور یہ کہ اُسی نے غنی کیا اور جائیداد بخشی،⁴³
اور یہ کہ وہی شِعریٰ کا ربّ ہے،⁴⁴
اور یہ کہ اُسی نے عادِ اولیٰ⁴⁵ کو ہلاک کیا ، اور ثمود کو ایسا مٹایا کہ ان میں سے کسی کو باقی نہ چھوڑا، اور اُن سے پہلے قومِ نوحؑ کو تباہ کیا کیونکہ وہ تھے ہی سخت ظالم و سرکش لوگ، اور اَوندھی گرنے والی بستیوں کو اُٹھا پھینکا، پھر چھا دیا اُن پر وہ کچھ جو (تم جانتے ہی ہو کہ ) کیا چھا دیا۔⁴⁶
⁴⁷ پس اے مخاطب ، اپنے رب کی کن کن نعمتوں میں تُو شک کرے گا“؟⁴⁸
یہ ایک تنبیہ ہے پہلے آئی ہوئی تنبیہات میں سے ۔ آنے والی گھڑی قریب آلگی ہے،⁵⁰ اللہ کے سوا کوئی اُس کو ہٹانے والا نہیں۔ ⁵¹ اب کیا یہی وہ باتیں ہیں جن پر تم اظہارِ تعجّب کرتے ہو؟⁵² ہنستے ہو اور روتے نہیں ہو؟ اور گا بجا کر انہیں ٹالتے ہو؟⁵³ جُھک جاؤ اللہ کے آگے اور بندگی بجا لاؤ۔⁵⁴ ؏۳ السجدة

تفسیر ابن کثیر حافظ ابن کثیرؒ

آیات 33–41

منافق و کافر کا نفسیاتی تجزیہ ٭٭

اللہ تعالیٰ ان لوگوں کی مذمت کر رہا ہے جو اللہ کی فرمانبرداری سے منہ موڑ لیں، سچ نہ کہیں، نہ نماز ادا کریں بلکہ جھٹلائیں، اعراض کریں، راہ اللہ بہت ہی کم خرچ کریں، دل کو نصیحت قبول کرنے والا نہ بنائیں، کبھی کچھ کہنا مان لیا پھر رسیاں کاٹ کر الگ ہو گئے۔ عرب «اَکْدیٰ» اس وقت کہتے ہیں مثلًا کچھ لوگ کنواں کھود رہے ہوں درمیان میں کوئی سخت چٹان آ جائے اور وہ دستبردار ہو جائیں۔ فرماتا ہے کیا اس کے پاس علم غیب ہے جس سے اس نے جان لیا کہ اگر میں راہ للہ اپنا زر و مال دوں گا تو خالی ہاتھ رہ جاؤں گا؟ یعنی دراصل یوں نہیں بلکہ یہ صدقے، نیکی اور بھلائی سے ازروئے بخل، طمع، خود غرضی، نامردی و بےدلی کے رک رہا ہے۔ حدیث میں ہے { اے بلال! خرچ کر اور عرش والے سے فقیر بنا دینے کا ڈر نہ رکھ۔ } ۱؎ [طبرانی:1020:ضعیف] ‏‏‏‏ خود قرآن میں ہے آیت «وَمَا أَنفَقْتُم مِّن شَيْءٍ فَهُوَ يُخْلِفُهُ وَهُوَ خَيْرُ‌ الرَّ‌ازِقِينَ» ۱؎ [34-سبأ:39] ‏‏‏‏ ’ تم جو کچھ خرچ کرو گے اللہ تعالیٰ تمہیں اس کا بدلہ دے گا اور وہی بہترین رازق ہے۔ ‘ «وَفَّىٰ» کے معنی ایک تو یہ کئے گئے ہیں کہ انہیں حکم کیا گیا تھا وہ سب انہوں نے پہنچا دیا، دوسرے معنی یہ کئے گئے ہیں کہ جو حکم ملا اسے بجا لائے۔ ٹھیک یہ ہے کہ یہ دونوں ہی معنی درست ہیں جیسے اور آیت میں ہے «وَإِذِ ابْتَلَىٰ إِبْرَ‌اهِيمَ رَ‌بُّهُ بِكَلِمَاتٍ فَأَتَمَّهُنَّ قَالَ إِنِّي جَاعِلُكَ لِلنَّاسِ إِمَامًا» ۱؎ [2-البقرة:124] ‏‏‏‏، ’ ابراہیم (‏‏‏‏علیہ السلام) کو جب کبھی جس کسی آزمائش کے ساتھ اس کے رب نے آزمایا آپ نے کامیابی کے ساتھ اس میں نمبر لیے۔ ‘ یعنی ہر حکم کو بجا لائے، ہر منع سے رکے رہے، رب کی رسالت پوری طرح پہنچا دی پس اللہ نے انہیں امام بنا کر دوسروں کا ان کا تابعدار بنا دیا۔

جیسے ارشاد ہوا ہے «ثُمَّ أَوْحَيْنَا إِلَيْكَ أَنِ اتَّبِعْ مِلَّةَ إِبْرَاهِيمَ حَنِيفًا وَمَا كَانَ مِنَ الْمُشْرِكِينَ» ۱؎ [16-النحل:123] ‏‏‏‏ ’ پھر ہم نے تیری طرف وحی کی کہ ملت ابراہیم حنیف کی پیروی کر جو مشرک نہ تھا۔ ‘ ابن جریر کی ایک مرفوع حدیث میں ہے کہ نبی کریم صلی اللہ علیہ وسلم نے اس آیت کی تفسیر میں فرمایا کہ { ہر روز وہ دن نکلتے ہی چار رکعت ادا کیا کرتے تھے یہی ان کی وفا داری تھی۔ } ۱؎ [ضعیف جدا] ‏‏‏‏ ترمذی میں ایک حدیث قدسی ہے کہ { اے ابن آدم! اول دن میں تو میرے لئے چار رکعت ادا کر لے میں آخر دن تک تیری کفایات کروں گا۔} ۱؎ [سنن ترمذي:385،قال الشيخ الألباني:صحیح] ‏‏‏‏ ابن ابی حاتم کی ایک حدیث میں ہے کہ نبی کریم صلی اللہ علیہ وسلم نے فرمایا: { ابراہیم علیہ السلام کے لیے لفظ «وَفَّى» اس لیے فرمایا کہ وہ ہر صبح شام ان کلمات کو پڑھا کرتے تھے آیت «فَسُـبْحٰنَ اللّٰهِ حِيْنَ تُمْسُوْنَ وَحِيْنَ تُصْبِحُوْنَ» ۱؎ [30-الروم:17] ‏‏‏‏ یہاں تک کہ نبی کریم صلی اللہ علیہ وسلم نے آیت ختم کی۔ } ۱؎ [سنن ترمذي:1358،قال الشيخ الألباني:صحیح] ‏‏‏‏ پھر بیان ہورہا ہے کہ «صحف ابراہیم و موسیٰ» میں کیا تھا؟ ان میں یہ تھا کہ جس کسی نے اپنی جان پر ظلم کیا مثلاً شرک و کفر کیا یا گناہ صغیرہ یا کبیرہ کیا تو اس کا وبال خود اس پر ہے اس کا یہ بوجھ کوئی اور نہ اٹھائے گا۔

جیسے قرآن کریم میں ہے «وَاِنْ تَدْعُ مُثْقَلَةٌ اِلٰى حِمْلِهَا لَا يُحْمَلْ مِنْهُ شَيْءٌ وَّلَوْ كَانَ ذَا قُرْبٰى اِنَّمَا تُنْذِرُ الَّذِيْنَ يَخْشَوْنَ رَبَّهُمْ بالْغَيْبِ وَاَقَامُوا الصَّلٰوةَ وَمَنْ تَزَكّٰى فَاِنَّمَا يَتَزَكّٰى لِنَفْسِهٖ وَاِلَى اللّٰهِ الْمَصِيْرُ» ۱؎ [35-فاطر:18] ‏‏‏‏، ’ اگر کوئی بوجھل اپنے بوجھ کی طرف کسی کو بلائے گا تو اس میں سے کچھ نہ اٹھایا جائے گا اگرچہ وہ قرابت دار ہو۔ ‘ ان صحیفوں میں یہ بھی تھا کہ انسان کے لیے صرف وہی ہے جو اس نے حاصل کیا یعنی جس طرح اس پر دوسرے کا بوجھ نہیں لادا جائے گا، دوسروں کی بداعمالیوں میں یہ بھی نہیں پکڑا جائے گا اور اسی طرح دوسرے کی نیکی بھی اسے کچھ فائدہ نہ دے گی۔ امام شافعی رحمہ اللہ اور ان کے متعبین نے اس آیت سے استدلال کیا ہے کہ قرآن خوانی کا ثواب مردوں کا پہنچایا جائے تو نہیں پہنچتا اس لیے کہ نہ تو یہ ان کا عمل ہے، نہ کسب، یہی وجہ ہے کہ رسول اللہ صلی اللہ علیہ وسلم نے نہ اس کا جواز بیان کیا، نہ اپنی امت کو اس پر رغبت دلائی، نہ انہیں اس پر آمادہ کیا، نہ تو کسی صریح فرمان کے ذریعہ سے، نہ کسی اشارے کنائیے سے، ٹھیک اسی طرح صحابہ کرام رضوان اللہ علیہم اجمعین میں سے کسی ایک سے یہ ثابت نہیں کہ انہوں نے قرآن پڑھ کر اس کے ثواب کا ہدیہ میت کے لیے بھیجا ہو اگر یہ نیکی ہوتی اور مطابق شرع عمل ہوتا تو ہم سے بہت زیادہ سبقت نیکیوں کی طرف کرنے والے صحابہ کرام تھے (‏‏‏‏رضی اللہ عنہم اجمعین)۔ ساتھ ہی یہ بات بھی یاد رکھنی چاہیئے کہ نیکیوں کے کام قرآن حدیث کے صاف فرمان صحیح ثابت ہوتے ہیں کسی قسم کے رائے اور قیاس کا ان میں کوئی دخل نہیں، ہاں دعا اور صدقہ کا ثواب میت کو پہنچتا ہے، اس پر اجماع ہے اور شارع علیہ السلام کے الفاظ سے ثابت ہے جو حدیث صحیح مسلم شریف میں سیدنا ابوہریرہ رضی اللہ عنہ کی روایت سے مروی ہے کہ {رسول اللہ صلی اللہ علیہ وسلم نے فرمایا: ”انسان کے مرنے پر اس کے اعمال منقطع ہو جاتے ہیں لیکن تین چیزیں نیک اولاد جو اس کے لیے دعا کرتی رہے یا وہ صدقہ جو اس کے انتقال کے بعد بھی جاری رہے یا وہ علم جس سے نفع اٹھایا جاتا رہے“ }۔ ۱؎ [صحیح مسلم:1631] ‏‏‏‏

اس کا یہ مطلب ہے کہ درحقیقت یہ تینوں چیزیں بھی خود میت کی سعی اس کی کوشش اور اس کا عمل ہیں، یعنی کسی اور کے عمل کا اجر اسے نہیں پہنچ رہا۔ صحیح حدیث میں ہے کہ { سب سے بہتر انسان کا کھانا وہ ہے جو اس نے اپنے ہاتھوں سے حاصل کیا ہو، اس کی اپنی کمائی ہو اور انسان کی اولاد بھی اسی کی کمائی اور اسی کی حاصل کردہ چیز ہے۔ } ۱؎ [سنن ترمذي:1357،قال الشيخ الألباني:صحیح] ‏‏‏‏ پس ثابت ہوا کہ نیک اولاد جو اس کے مرنے کے بعد اس کے لیے دعا کرتی ہے وہ دراصل اسی کا عمل ہے، اسی طرح صدقہ جاریہ مثلاً وقف وغیرہ کہ وہ بھی اسی کے عمل کا اثر ہے اور اسی کا کیا ہوا وقف ہے۔ خود قرآن فرماتا ہے آیت «اِنَّا نَحْنُ نُـحْيِ الْمَوْتٰى وَنَكْتُبُ مَا قَدَّمُوْا وَاٰثَارَهُمْ وَكُلَّ شَيْءٍ اَحْصَيْنٰهُ فِيْٓ اِمَامٍ مُّبِيْنٍ» ۱؎ [36-يس:12] ‏‏‏‏، یعنی ’ ہم مردوں کا زندہ کرتے ہیں اور لکھتے ہیں جو آگے بھیج چکے اور جو نشان ان کے پیچھے رہے۔ ‘ اس سے ثابت ہوتا ہے کہ ان کے اپنے پیچھے چھوڑے ہوئے نشانات نیک کا ثواب انہیں پہنچتا رہتا ہے، رہا وہ علم جسے اس نے لوگوں میں پھیلایا اور اس کے انتقال کے بعد بھی لوگ اس پر عامل اور کاربند رہے وہ بھی اصل اسی کی سعی اور اسی کا عمل ہے جو اس کے تابعداری کریں ان سب کے برابر اجر کے اسے اجر ملتا ہے درآنحالیکہ ان کے اجر گھٹتے نہیں۔ ۱؎ [صحیح مسلم:2674] ‏‏‏‏ پھر فرماتا ہے اس کی کوشش قیامت کے دن جانچی جائے گی اس دن اس کا عمل دیکھا جائے گا جیسے فرمایا «وَقُلِ اعْمَلُوْا فَسَيَرَى اللّٰهُ عَمَلَكُمْ وَرَسُوْلُهٗ وَالْمُؤْمِنُوْنَ وَسَتُرَدُّوْنَ اِلٰى عٰلِمِ الْغَيْبِ وَالشَّهَادَةِ فَيُنَبِّئُكُمْ بِمَا كُنْتُمْ تَعْمَلُوْنَ» ۱؎ [9-التوبة:105] ‏‏‏‏، یعنی ’ کہہ دے کہ تم عمل کئے جاؤ گے پھر وہ تمہیں تمہارے اعمال سے خبردار کرے گا ‘ یعنی ہر نیکی کی جزا اور ہر بدی کی سزا دے گا یہاں بھی فرمایا پھر اس کا پورا پورا بدلہ دیا جائے گا۔

آیات 42–45

سب کی آخری منزل اللہ تعالٰی ادراک سے بلند ہے ٭٭

فرمان ہے کہ بازگشت آخر اللہ کی طرف ہے۔ قیامت کے دن سب کو لوٹ کر اسی کے سامنے پیش ہونا ہے۔ سیدنا معاذ رضی اللہ عنہ نے قبیلہ بنی اود میں خطبہ پڑھتے ہوئے فرمایا: ”اے بنی اود! میں اللہ کے پیغمبر صلی اللہ علیہ وسلم کا قاصد بن کر تمہاری طرف آیا ہوں تم یقین کرو کہ تمہارا سب کا لوٹنا اللہ کی طرف ہے، پھر یا تو جنت میں پہنچائے جاؤ یا جہنم میں دھکیلے جاؤ۔“ بغوی میں ہے { نبی کریم صلی اللہ علیہ وسلم نے اس آیت کی تفسیر میں فرمایا: ”اللہ تعالیٰ کی ذات میں فکر کرنا جائز نہیں“ }۔ ۱؎ [بغوی فی التفسیر:232/4:ضعیف] ‏‏‏‏ جیسے اور حدیث میں ہے { مخلوق پر غور بھری نظریں ڈالو لیکن ذات خالق میں گہرے نہ اترو، اسے عقل و ادراک فکر و ذہن نہیں پا سکتا۔ } ۱؎ [بغوی فی التفسیر:232/4:ضعیف] ‏‏‏‏ گو ان لفظوں سے یہ حدیث محفوظ نہیں، مگر صحیح حدیث میں یہ بھی مضمون موجود ہے، اس میں ہے کہ { شیطان کسی کے پاس آتا ہے اور کہتا ہے اسے کس نے پیدا کیا؟ پھر اسے کس نے پیدا کیا؟ یہاں تک کہ کہتا ہے اللہ تعالیٰ کو کس نے پیدا کیا؟ جب تم میں سے کسی کے دل میں یہ وسوسہ پیدا ہوا تو «اعُوذُ بِاللّهِ مِن الشِّیطانِ الرَّجِیمِ» پڑھ لے اور اس خیال کو دل سے دور کر دے۔ } ۱؎ [صحیح بخاری:3276] ‏‏‏‏ سنن کی ایک حدیث میں ہے { مخلوقات اللہ میں غور و فکر کرو لیکن ذات اللہ میں غور و فکر نہ کرو، سنو اللہ تعالیٰ نے ایک فرشتہ پیدا کیا ہے جس کے کان کی لو سے لے کر مونڈھے تک تین سو سال کا راستہ ہے او کما قال۔ } ۱؎ [صحیح مسلم:134] ‏‏‏‏ پھر فرماتا ہے کہ بندوں میں ہنسنے رونے کا مادہ اور ان کے اسباب بھی اسی نے پیدا کئے ہیں جو بالکل مختلف ہیں وہی موت و حیات کا خالق ہے۔ جیسے فرمایا «الَّذِي خَلَقَ الْمَوْتَ وَالْحَيَاةَ» ۱؎ [67-الملک:2] ‏‏‏‏ ’ اس نے موت و حیات کو پیدا کیا اسی نے نطفہ سے ہر جاندار کو جوڑ جوڑ بنایا ‘۔

آیات 46–55

جیسے اور جگہ فرمان ہے «أَيَحْسَبُ الْإِنسَانُ أَن يُتْرَكَ سُدًى أَلَمْ يَكُ نُطْفَةً مِّن مَّنِيٍّ يُمْنَىٰ ثُمَّ كَانَ عَلَقَةً فَخَلَقَ فَسَوَّىٰ فَجَعَلَ مِنْهُ الزَّوْجَيْنِ الذَّكَرَ وَالْأُنثَىٰ أَلَيْسَ ذَٰلِكَ بِقَادِرٍ عَلَىٰ أَن يُحْيِيَ الْمَوْتَىٰ» ۱؎ [75-القيامة:40-36] ‏‏‏‏، ’ کیا انسان سمجھتا ہے کہ وہ بےکار چھوڑ دیا جائے گا؟، کیا وہ منی کا قطرہ نہ تھا، جو (‏‏‏‏رحم میں) ٹپکایا جاتا ہے؟، پھر کیا وہ بستہ خون نہ تھا؟، پھر اللہ نے اسے پیدا کیا اور درست کیا اور اس سے جوڑے یعنی نرو مادہ بنائے، کیا (‏‏‏‏ایسی قدرتوں والا) اللہ اس بات پر قادر نہیں کہ مردوں کو زندہ کر دے۔‘ پھر فرماتا ہے اسی پر دوبارہ زندہ کرنا، یعنی جیسے اس نے ابتداء پیدا کیا اسی طرح مار ڈالنے کے بعد دوبارہ کی پیدائش بھی اسی کے ذمہ ہے، اسی نے اپنے بندوں کو غنی بنا دیا اور مال ان کے قبضہ میں دے دیا ہے جو ان کے پاس ہی بطور پونجی کے رہتا ہے۔

اکثر مفسرین کے کلام کا خلاصہ اس مقام پر یہی ہے گو بعض سے مروی ہے کہ اس نے مال دیا اور غلام دئیے، اس نے دیا اور خوش ہوا، اسے غنی بنا کر اور مخلوق کو اس کا دست نگر بنا دیا، جسے چاہا غنی کیا، جسے چاہا فقیر لیکن یہ پچھلے دونوں قول لفظ سے کچھ زیادہ مطابقت نہیں رکھتے۔ «شعریٰ» اس روشن ستارے کا نام ہے جسے «مِرْزَم الْجَوْزَاء» بھی کہتے ہیں بعض عرب اس کی پرستش کرتے تھے۔ عاد و اولیٰ یعنی قوم ہود کو جسے عاد بن ارم بن سام بن نوح بھی کہا جاتا ہے اسی نے ان کی نافرمانی کی بنا پر تباہ کر دیا۔ جیسے فرمایا «أَلَمْ تَرَ كَيْفَ فَعَلَ رَبُّكَ بِعَادٍ إِرَمَ ذَاتِ الْعِمَادِ الَّتِي لَمْ يُخْلَقْ مِثْلُهَا فِي الْبِلَادِ» ۱؎ [89-الفجر:6-8] ‏‏‏‏، یعنی ’ کیا تو نے نہیں دیکھا کہ تیرے رب نے عاد کے ساتھ کیا کیا؟ ‘ یعنی ارم کے ساتھ جو بڑے قدآور تھے جن کا مثل شہروں میں پیدا نہیں کیا گیا تھا یہ قوم بڑی قوی اور زور آور تھی ساتھ ہی اللہ کی بڑی نافرمان اور رسول سے بڑی سرتاب تھی۔ «وَأَمَّا عَادٌ فَأُهْلِكُوا بِرِيحٍ صَرْصَرٍ عَاتِيَةٍ سَخَّرَهَا عَلَيْهِمْ سَبْعَ لَيَالٍ وَثَمَانِيَةَ أَيَّامٍ حُسُومًا» ۱؎ [69-الحاقة:6،7] ‏‏‏‏ ان پر ہوا کا عذاب آیا جو سات راتیں اور آٹھ دن برابر رہا، اسی طرح ثمودیوں کو بھی اس نے ہلاک کر دیا جس میں سے ایک بھی باقی نہ بچا اور ان سے پہلے قوم نوح تباہ ہو چکی ہے جو بڑے ناانصاف اور شریر تھے اور لوط کی بستیاں جنہیں رحمن و قہار نے زیر و زبر کر دیا اور آسمانی پتھروں سے سب بدکاروں کا ہلاک کر دیا انہیں ایک چیز نے ڈھانپ لیا یعنی (‏‏‏‏پتھروں نے) اور آیت میں ہے «وَأَمْطَرْنَا عَلَيْهِم مَّطَرًا فَسَاءَ مَطَرُ الْمُنذَرِينَ» ۱؎ [26-الشعراء:173] ‏‏‏‏ ’ جن کا مینہ ان پر برسا اور برے حالوں تباہ ہوئے۔ ‘ ان بستیوں میں چار لاکھ آدمی آباد تھے، آبادی کی کل زمین کی آگ اور گندھک اور تیل بن کر ان پر بھڑک اٹھی۔ قتادہ رحمہ اللہ کا یہی قول ہے جو بہت غریب سند سے ابن ابی حاتم میں مروی ہے۔ پھر فرمایا: ’ پھر تو اے انسان! اپنے رب کی کس کس نعمت پر جھگڑے گا؟ ‘ بعض کہتے ہیں خطاب نبی کریم صلی اللہ علیہ وسلم سے ہے لیکن خطاب کو عام رکھنا بہت اولیٰ ہے ابن جریر رحمہ اللہ بھی عام رکھنے کو ہی پسند فرماتے ہیں۔۱؎ [تفسیر ابن جریر الطبری:540/11] ‏‏‏‏

آیات 56–62

”نذیر“ کا مفہوم ، نذیر کہتے کسے ہیں ٭٭

یہ خوف اور ڈر سے آگاہ کرنے والے ہیں۔ یعنی نبی کریم صلی اللہ علیہ وسلم ، آپ صلی اللہ علیہ وسلم کی رسالت بھی ایسی ہی ہے جیسے آپ صلی اللہ علیہ وسلم سے پہلے رسولوں کی رسالت تھی۔ جیسے اور آیت میں ہے «قُلْ مَا كُنْتُ بِدْعًا مِّنَ الرُّسُلِ وَمَآ اَدْرِيْ مَا يُفْعَلُ بِيْ وَلَا بِكُمْ اِنْ اَتَّبِــعُ اِلَّا مَا يُوْحٰٓى اِلَيَّ وَمَآ اَنَا اِلَّا نَذِيْرٌ مُّبِيْنٌ» ۱؎ [46-الأحقاف:9] ‏‏‏‏ یعنی ’ میں کوئی نیا رسول تو ہوں نہیں رسالت مجھ سے شروع نہیں ہوئی بلکہ دنیا میں مجھ سے پہلے بھی بہت سے رسول آ چکے ہیں، قریب آنے والی کا وقت آئے گا یعنی قیامت قریب آ گئی، نہ تو اسے کوئی دفع کر سکے، نہ اس کے آنے کے صحیح وقت معین کا کسی کو علم ہے۔‘

«نذیر» عربی میں اسے کہتے ہیں مثلاً ایک جماعت ہے جس میں سے ایک شخص نے کوئی ڈراؤنی چیز دیکھی اور اپنی قوم کو اس سے آگاہ کرتا ہے یعنی ڈر اور خوف سنانے والا۔ جیسے اور آیت میں ہے «اِنْ هُوَ اِلَّا نَذِيْرٌ لَّكُمْ بَيْنَ يَدَيْ عَذَابٍ شَدِيْدٍ» ۱؎ [34-سبأ:46] ‏‏‏‏ ’ میں تمہیں سخت عذاب سے مطلع کرنے والا ہوں۔ ‘ حدیث میں ہے { تمہیں کھلم کھلا ڈرانے والا ہوں۔ } ۱؎ [صحیح بخاری:9482] ‏‏‏‏ یعنی جس طرح کوئی شخص کسی برائی کو دیکھ لے کہ وہ قوم کے قریب پہنچ چکی ہے اور پھر جس حالت میں ہو اسی میں دوڑا بھاگا آ جائے اور قوم کو دفعۃً متنبہ کر دے کہ دیکھو وہ بلا آ رہی ہے، فوراً تدارک کر لو اسی طرح قیامت کے ہولناک عذاب بھی لوگوں کی غفلت کی حالت میں ان سے بالکل قریب ہو گئے ہیں اور نبی کریم صلی اللہ علیہ وسلم ان عذابوں سے ہوشیار کر رہے ہیں جیسے اس کے بعد کی سورت میں ہے «اِقْتَرَبَتِ السَّاعَةُ وَانْشَقَّ الْقَمَرُ» ۱؎ [54-القمر:1] ‏‏‏‏ ’ قیامت قریب آ چکی۔‘

مسند احمد کی حدیث میں ہے { لوگو! گناہوں کو چھوٹا اور حقیر جاننے سے بچو، سنو چھوٹے چھوٹے گناہوں کی مثال ایسی ہے جیسے ایک قافلہ کسی جگہ اترا سب ادھر ادھر چلے گئے اور لکڑیاں سمیٹ کر تھوڑی تھوڑی لے آئے، تو چاہے ہر ایک کے پاس لکڑیاں کم کم ہیں لیکن جب وہ سب جمع کر لی جائیں تو ایک انبار لگ جاتا ہے جس سے دیگیں پک جائیں اسی طرح چھوٹے چھوٹے گناہ جمع ہو کر ڈھیر لگ جاتا ہے اور اچانک اس گنہگار کو پکڑ لیتا ہے اور ہلاک ہو جاتا ہے۔ } اور حدیث میں ہے { میری اور قیامت کی مثال ایسی ہے پھر آپ صلی اللہ علیہ وسلم نے اپنی شہادت کی اور درمیان کی انگلی اٹھا کر ان کا فاصلہ دکھایا میری اور قیامت کی مثال دو ساعتوں کی سی ہے میری اور آخرت کے دن کی مثال ٹھیک اسی طرح ہے جس طرح ایک قوم نے کسی شخص کو اطلاع لانے کے لیے بھیجا اس نے دشمن کے لشکر کو بالکل نزدیک کی کمین گاہ میں چھاپہ مارنے کے لیے تیار دیکھا یہاں تک کہ اسے ڈر لگا کہ میرے پہنچنے سے پہلے ہی کہیں یہ نہ پہنچ جائیں تو وہ ایک ٹیلے پر چڑھ گیا اور وہیں کپڑا ہلا ہلا کر انہیں اشارے سے بتا دیا کہ خبردار ہو جاؤ دشمن سر پر موجود ہے پس میں ایسا ہی ڈرانے والا ہوں۔ } ۱؎ [مسند احمد:331/5:صحیح] ‏‏‏‏ اس حدیث کی شہادت میں اور بھی بہت سی حسن اور صحیح حدیثیں موجود ہیں۔ پھر مشرکین کے اس فعل پر انکار فرمایا کہ وہ قرآن سنتے ہیں مگر اعراض کرتے ہیں اور بےپرواہی برتتے ہیں، بلکہ اس کی رحمت سے تعجب کے ساتھ انکار کر بیٹھتے ہیں اور اس سے مذاق سنتے اور ہنسی کرنے لگتے ہیں۔ چاہیئے یہ تھا کہ مثل ایمان داروں کے اسے سن کر روتے عبرت حاصل کرتے جیسے مومنوں کی حالت بیان فرمائی کہ وہ اس کلام اللہ شریف کو سن کر روتے دھوتے سجدہ میں گر پڑتے ہیں اور خشوع وخضوع میں بڑھ جاتے ہیں۔

سیدنا ابن عباس رضی اللہ عنہما فرماتے ہیں «سَمَد» گانے کو کہتے ہیں یہ یمنی لغت ہے آپ سے «سَامِدُوْنَ» کے معنی اعراض کرنے والے اور تکبر کرنے والے بھی مروی ہیں، علی اور حسن رضی اللہ عنہما فرماتے ہیں غفلت کرنے والے۔ پھر اپنے بندوں کا حکم دیتا ہے کہ ’ توحید و اخلاص کے پابند رہو خضوع، خلوص اور توحید کے ماننے والے بن جاؤ ‘۔

صحیح بخاری شریف میں ہے { نبی کریم صلی اللہ علیہ وسلم نے، مسلمانوں نے، مشرکوں نے اور جن و انس نے سورۃ النجم کے سجدے کے موقعہ پر سجدہ کیا }۔ ۱؎ [صحیح بخاری:7462] ‏‏‏‏ مسند احمد میں ہے کہ { مکہ میں رسول اللہ صلی اللہ علیہ وسلم نے سورۃ النجم پڑھی پس آپ صلی اللہ علیہ وسلم نے سجدہ کیا اور ان لوگوں نے بھی جو آپ صلی اللہ علیہ وسلم کے پاس تھے }، راوی حدیث مطلب بن ابی وداعہ کہتے ہیں میں نے اپنا سر اٹھایا اور سجدہ نہ کیا، یہ اس وقت تک مسلمان نہیں ہوئے تھے اسلام کے بعد جس کسی کی زبانی اس سورۃ مبارکہ کی تلاوت سنتے سجدہ کرتے۔ [مسند احمد:400/6:حسن] ‏‏‏‏ یہ حدیث نسائی شریف میں بھی ہے۔ ۱؎ [سنن نسائی:959:حسن] ‏‏‏‏

← Previous Rukoo (2) Full Surah Next Rukoo →