سورۃ رکوع 1 (آیات 1–35) — تفہیم القرآن

القرآن المجيد

سَاَلَ سَآئِلٌۢ بِعَذَابٍ وَّاقِعٍ ۙ﴿۱﴾ لِّلۡکٰفِرِیۡنَ لَیۡسَ لَہٗ دَافِعٌ ۙ﴿۲﴾ مِّنَ اللّٰہِ ذِی الۡمَعَارِجِ ؕ﴿۳﴾ تَعۡرُجُ الۡمَلٰٓئِکَۃُ وَ الرُّوۡحُ اِلَیۡہِ فِیۡ یَوۡمٍ کَانَ مِقۡدَارُہٗ خَمۡسِیۡنَ اَلۡفَ سَنَۃٍ ۚ﴿۴﴾ فَاصۡبِرۡ صَبۡرًا جَمِیۡلًا ﴿۵﴾ اِنَّہُمۡ یَرَوۡنَہٗ بَعِیۡدًا ۙ﴿۶﴾ وَّ نَرٰىہُ قَرِیۡبًا ؕ﴿۷﴾ یَوۡمَ تَکُوۡنُ السَّمَآءُ کَالۡمُہۡلِ ۙ﴿۸﴾ وَ تَکُوۡنُ الۡجِبَالُ کَالۡعِہۡنِ ۙ﴿۹﴾ وَ لَا یَسۡـَٔلُ حَمِیۡمٌ حَمِیۡمًا ﴿ۚۖ۱۰﴾ یُّبَصَّرُوۡنَہُمۡ ؕ یَوَدُّ الۡمُجۡرِمُ لَوۡ یَفۡتَدِیۡ مِنۡ عَذَابِ یَوۡمِئِذٍۭ بِبَنِیۡہِ ﴿ۙ۱۱﴾ وَ صَاحِبَتِہٖ وَ اَخِیۡہِ ﴿ۙ۱۲﴾ وَ فَصِیۡلَتِہِ الَّتِیۡ تُــٔۡوِیۡہِ ﴿ۙ۱۳﴾ وَ مَنۡ فِی الۡاَرۡضِ جَمِیۡعًا ۙ ثُمَّ یُنۡجِیۡہِ ﴿ۙ۱۴﴾ کَلَّا ؕ اِنَّہَا لَظٰی ﴿ۙ۱۵﴾ نَزَّاعَۃً لِّلشَّوٰی ﴿ۚۖ۱۶﴾ تَدۡعُوۡا مَنۡ اَدۡبَرَ وَ تَوَلّٰی ﴿ۙ۱۷﴾ وَ جَمَعَ فَاَوۡعٰی ﴿۱۸﴾ اِنَّ الۡاِنۡسَانَ خُلِقَ ہَلُوۡعًا ﴿ۙ۱۹﴾ اِذَا مَسَّہُ الشَّرُّ جَزُوۡعًا ﴿ۙ۲۰﴾ وَّ اِذَا مَسَّہُ الۡخَیۡرُ مَنُوۡعًا ﴿ۙ۲۱﴾ اِلَّا الۡمُصَلِّیۡنَ ﴿ۙ۲۲﴾ الَّذِیۡنَ ہُمۡ عَلٰی صَلَاتِہِمۡ دَآئِمُوۡنَ ﴿۪ۙ۲۳﴾ وَ الَّذِیۡنَ فِیۡۤ اَمۡوَالِہِمۡ حَقٌّ مَّعۡلُوۡمٌ ﴿۪ۙ۲۴﴾ لِّلسَّآئِلِ وَ الۡمَحۡرُوۡمِ ﴿۪ۙ۲۵﴾ وَ الَّذِیۡنَ یُصَدِّقُوۡنَ بِیَوۡمِ الدِّیۡنِ ﴿۪ۙ۲۶﴾ وَ الَّذِیۡنَ ہُمۡ مِّنۡ عَذَابِ رَبِّہِمۡ مُّشۡفِقُوۡنَ ﴿ۚ۲۷﴾ اِنَّ عَذَابَ رَبِّہِمۡ غَیۡرُ مَاۡمُوۡنٍ ﴿۲۸﴾ وَ الَّذِیۡنَ ہُمۡ لِفُرُوۡجِہِمۡ حٰفِظُوۡنَ ﴿ۙ۲۹﴾ اِلَّا عَلٰۤی اَزۡوَاجِہِمۡ اَوۡ مَا مَلَکَتۡ اَیۡمَانُہُمۡ فَاِنَّہُمۡ غَیۡرُ مَلُوۡمِیۡنَ ﴿ۚ۳۰﴾ فَمَنِ ابۡتَغٰی وَرَآءَ ذٰلِکَ فَاُولٰٓئِکَ ہُمُ الۡعٰدُوۡنَ ﴿ۚ۳۱﴾ وَ الَّذِیۡنَ ہُمۡ لِاَمٰنٰتِہِمۡ وَ عَہۡدِہِمۡ رٰعُوۡنَ ﴿۪ۙ۳۲﴾ وَ الَّذِیۡنَ ہُمۡ بِشَہٰدٰتِہِمۡ قَآئِمُوۡنَ ﴿۪ۙ۳۳﴾ وَ الَّذِیۡنَ ہُمۡ عَلٰی صَلَاتِہِمۡ یُحَافِظُوۡنَ ﴿ؕ۳۴﴾ اُولٰٓئِکَ فِیۡ جَنّٰتٍ مُّکۡرَمُوۡنَ ﴿ؕ٪۳۵﴾

الترجمة

ترجمہ: سید ابو الاعلیٰ مودودی

مانگنے والے نے عذاب مانگا ہے، (وہ عذاب) جو ضرور واقع ہونے والا ہے ﴿۱﴾ کافروں کے لیے ہے، کوئی اُسے دفع کرنے والا نہیں ﴿۲﴾ اُس خدا کی طرف سے ہے جو عروج کے زینوں کا مالک ہے ﴿۳﴾ ملائکہ اور روح اُس کے حضور چڑھ کر جاتے ہیں ایک ایسے دن میں جس کی مقدار پچاس ہزار سال ہے ﴿۴﴾ پس اے نبیؐ، صبر کرو، شائستہ صبر ﴿۵﴾ یہ لوگ اُسے دور سمجھتے ہیں ﴿۶﴾ اور ہم اسے قریب دیکھ رہے ہیں ﴿۷﴾ (وہ عذاب اُس روز ہوگا) جس روز آسمان پگھلی ہوئی چاندی کی طرح ہو جائے گا ﴿۸﴾ اور پہاڑ رنگ برنگ کے دھنکے ہوئے اون جیسے ہو جائیں گے ﴿۹﴾ اور کوئی جگری دوست اپنے جگری دوست کو نہ پوچھے گا ﴿۱۰﴾ حالانکہ وہ ایک دوسرے کو دکھائے جائیں گے مجرم چاہے گا کہ اس دن کے عذاب سے بچنے کے لیے اپنی اولاد کو ﴿۱۱﴾ اپنی بیوی کو، اپنے بھائی کو ﴿۱۲﴾ اپنے قریب ترین خاندان کو جو اسے پناہ دینے والا تھا ﴿۱۳﴾ اور روئے زمین کے سب لوگوں کو فدیہ میں دیدے اور یہ تدبیر اُسے نجات دلا دے ﴿۱۴﴾ ہرگز نہیں وہ تو بھڑکتی ہوئی آگ کی لپٹ ہوگی ﴿۱۵﴾ جو گوشت پوست کو چاٹ جائے گی ﴿۱۶﴾ پکار پکار کر اپنی طرف بلائے گی ہر اُس شخص کو جس نے حق سے منہ موڑا اور پیٹھ پھیری ﴿۱۷﴾ اور مال جمع کیا اور سینت سینت کر رکھا ﴿۱۸﴾ انسان تھڑدلا پیدا کیا گیا ہے ﴿۱۹﴾ جب اس پر مصیبت آتی ہے تو گھبرا اٹھتا ہے ﴿۲۰﴾ اور جب اسے خوشحالی نصیب ہوتی ہے تو بخل کرنے لگتا ہے ﴿۲۱﴾ مگر وہ لوگ (اِس عیب سے بچے ہوئے ہیں) جو نماز پڑھنے والے ہیں ﴿۲۲﴾ جو اپنی نماز کی ہمیشہ پابندی کرتے ہیں ﴿۲۳﴾ جن کے مالوں میں، ﴿۲۴﴾ سائل اور محروم کا ایک حق مقرر ہے ﴿۲۵﴾ جو روز جزا کو برحق مانتے ہیں ﴿۲۶﴾ جو اپنے رب کے عذاب سے ڈرتے ہیں ﴿۲۷﴾ کیونکہ اُن کے رب کا عذاب ایسی چیز نہیں ہے جس سے کوئی بے خوف ہو ﴿۲۸﴾ جو اپنی شرمگاہوں کی حفاظت کرتے ہیں ﴿۲۹﴾ بجز اپنی بیویوں یا اپنی مملوکہ عورتوں کے جن سے محفوظ نہ رکھنے میں ان پر کوئی ملامت نہیں ﴿۳۰﴾ البتہ جو اس کے علاوہ کچھ اور چاہیں وہی حد سے تجاوز کرنے والے ہیں ﴿۳۱﴾ جو اپنی امانتوں کی حفاظت اور اپنے عہد کا پاس کرتے ہیں ﴿۳۲﴾ جو اپنی گواہیوں میں راست بازی پر قائم رہتے ہیں ﴿۳۳﴾ اور جو اپنی نماز کی حفاظت کرتے ہیں ﴿۳۴﴾ یہ لوگ عزت کے ساتھ جنت کے باغوں میں رہیں گے ﴿۳۵﴾

Translation: Tafheem-ul-Quran - Maududi

A beseecher besought the visitation of chastisement, ﴿1﴾ (a chastisement meant) for the unbelievers, one which none can avert; ﴿2﴾ a chastisement from Allah, the Lord of the ascending steps, ﴿3﴾ by which the angels and the Spirit ascend to Him in one Day the duration of which is fifty thousand years. ﴿4﴾ So, (O Prophet), persevere with gracious perseverance. ﴿5﴾ Verily they think that the chastisement is far off, ﴿6﴾ while We think that it is near at hand. ﴿7﴾ It shall befall on a Day whereon the sky will become like molten brass, ﴿8﴾ and the mountains will become like dyed tufts of wool, ﴿9﴾ and no bosom friend will enquire about any of his bosom friends ﴿10﴾ although they shall be within sight of one another. The guilty one would fain ransom himself from the torment of that Day by offering his children, ﴿11﴾ and his spouse and his brother, ﴿12﴾ and his kinsfolk who had stood by him, ﴿13﴾ and all persons of the earth, if only he could thus save himself. ﴿14﴾ By no means! It will be the fierce flame ﴿15﴾ that will strip off the scalp. ﴿16﴾ It shall insistently summon him who turned his back and retreated, ﴿17﴾ and amassed wealth and covetously hoarded it. ﴿18﴾ Verily man is impatient by nature: ﴿19﴾ bewailing when evil befalls him, ﴿20﴾ and tight-fisted when good fortune visits him, ﴿21﴾ except those that pray, ﴿22﴾ and are constant in their Prayer; ﴿23﴾ and those in whose wealth there is a known right ﴿24﴾ for those that ask and those that are dispossessed, ﴿25﴾ those who firmly believe in the Day of Recompense, ﴿26﴾ and fear the chastisement of their Lord– ﴿27﴾ surely the chastisement of their Lord is a thing none can feel secure from – ﴿28﴾ and those who guard their private parts, ﴿29﴾ except in regard to their spouses and those whom their right hands possess, for in regard to them they are not reproachable, ﴿30﴾ but any who seeks to go beyond that, it is indeed they who are the transgressors, ﴿31﴾ and those who fulfil their trusts and their covenants, ﴿32﴾ and those who are upright in their testimonies; ﴿33﴾ and who take due care of their Prayer: ﴿34﴾ all these shall live honourably in the Gardens. ﴿35﴾

ترجمہ: مولانا محمد جوناگڑھی

ایک سوال کرنے والے نے اس عذاب کا سوال کیا جو واضح ہونے واﻻ ہے ﴿۱﴾ کافروں پر، جسے کوئی ہٹانے واﻻ نہیں ﴿۲﴾ اس اللہ کی طرف سے جو سیڑھیوں واﻻ ہے ﴿۳﴾ جس کی طرف فرشتے اور روح چڑھتے ہیں ایک دن میں جس کی مقدار پچاس ہزار سال کی ہے ﴿۴﴾ پس تو اچھی طرح صبر کر ﴿۵﴾ بیشک یہ اس (عذاب) کو دور سمجھ رہے ہیں ﴿۶﴾ اور ہم اسے قریب ہی دیکھتے ہیں ﴿۷﴾ جس دن آسمان مثل تیل کی تلچھٹ کے ہو جائے گا ﴿۸﴾ اور پہاڑ مثل رنگین اون کے ہو جائیں گے ﴿۹﴾ اور کوئی دوست کسی دوست کو نہ پوچھے گا ﴿۱۰﴾ (حاﻻنکہ) ایک دوسرے کو دکھا دیئے جائیں گے، گناهگار اس دن کے عذاب کے بدلے فدیے میں اپنے بیٹوں کو ﴿۱۱﴾ اپنی بیوی کو اور اپنے بھائی کو ﴿۱۲﴾ اور اپنے کنبے کو جو اسے پناه دیتا تھا ﴿۱۳﴾ اور روئے زمین کے سب لوگوں کو دینا چاہے گا تاکہ یہ اسے نجات دﻻ دے ﴿۱۴﴾ (مگر) ہرگز یہ نہ ہوگا، یقیناً وه شعلہ والی (آگ) ہے ﴿۱۵﴾ جو منھ اور سر کی کھال کھینچ ﻻنے والی ہے ﴿۱۶﴾ وه ہر اس شخص کو پکارے گی جو پیچھے ہٹتا اور منھ موڑتا ہے ﴿۱۷﴾ اور جمع کرکے سنبھال رکھتا ہے ﴿۱۸﴾ بیشک انسان بڑے کچے دل واﻻ بنایا گیا ہے ﴿۱۹﴾ جب اسے مصیبت پہنچتی ہے تو ہڑبڑا اٹھتا ہے ﴿۲۰﴾ اور جب راحت ملتی ہے تو بخل کرنے لگتا ہے ﴿۲۱﴾ مگر وه نمازی ﴿۲۲﴾ جو اپنی نماز پر ہمیشگی کرنے والے ہیں ﴿۲۳﴾ اور جن کے مالوں میں مقرره حصہ ہے ﴿۲۴﴾ مانگنے والوں کا بھی اور سوال سے بچنے والوں کا بھی ﴿۲۵﴾ اور جو انصاف کے دن پر یقین رکھتے ہیں ﴿۲۶﴾ اور جو اپنے رب کے عذاب سے ڈرتے رہتے ہیں ﴿۲۷﴾ بیشک ان کے رب کا عذاب بے خوف ہونے کی چیز نہیں ﴿۲۸﴾ اور جو لوگ اپنی شرم گاہوں کی (حرام سے) حفاﻇت کرتے ہیں ﴿۲۹﴾ ہاں ان کی بیویوں اور لونڈیوں کے بارے میں جن کے وه مالک ہیں انہیں کوئی ملامت نہیں ﴿۳۰﴾ اب جو کوئی اس کے علاوه (راه) ڈھونڈے گا توایسے لوگ حد سے گزر جانے والے ہوں گے ﴿۳۱﴾ اور جو اپنی امانتوں کا اور اپنے قول و قرار کا پاس رکھتے ہیں ﴿۳۲﴾ اور جو اپنی گواہیوں پر سیدھے اور قائم رہتے ہیں ﴿۳۳﴾ اور جو اپنی نمازوں کی حفاﻇت کرتے ہیں ﴿۳۴﴾ یہی لوگ جنتوں میں عزت والے ہوں گے ﴿۳۵﴾

ترجمہ: فتح محمد جالندھری

ایک طلب کرنے والے نے عذاب طلب کیا جو نازل ہو کر رہے گا ﴿۱﴾ (یعنی) کافروں پر (اور) کوئی اس کو ٹال نہ سکے گا ﴿۲﴾ (اور وہ) خدائے صاحب درجات کی طرف سے (نازل ہوگا) ﴿۳﴾ جس کی طرف روح (الامین) اور فرشتے پڑھتے ہیں (اور) اس روز (نازل ہوگا) جس کا اندازہ پچاس ہزار برس کا ہوگا ﴿۴﴾ (تو تم کافروں کی باتوں کو) قوت کے ساتھ برداشت کرتے رہو ﴿۵﴾ وہ ان لوگوں کی نگاہ میں دور ہے ﴿۶﴾ اور ہماری نظر میں نزدیک ﴿۷﴾ جس دن آسمان ایسا ہو جائے گا جیسے پگھلا ہوا تانبا ﴿۸﴾ اور پہاڑ (ایسے) جیسے (دھنکی ہوئی) رنگین اون ﴿۹﴾ اور کوئی دوست کسی دوست کا پرسان نہ ہوگا ﴿۱۰﴾ ایک دوسرے کو سامنے دیکھ رہے ہوں گے (اس روز) گنہگار خواہش کرے گا کہ کسی طرح اس دن کے عذاب کے بدلے میں (سب کچھ) دے دے یعنی اپنے بیٹے ﴿۱۱﴾ اور اپنی بیوی اور اپنے بھائی ﴿۱۲﴾ اور اپنا خاندان جس میں وہ رہتا تھا ﴿۱۳﴾ اور جتنے آدمی زمین میں ہیں (غرض) سب (کچھ دے دے) اور اپنے تئیں عذاب سے چھڑا لے ﴿۱۴﴾ (لیکن) ایسا ہرگز نہیں ہوگا وہ بھڑکتی ہوئی آگ ہے ﴿۱۵﴾ کھال ادھیڑ ڈالنے والی ﴿۱۶﴾ ان لوگوں کو اپنی طرف بلائے گی جنہوں نے (دین حق سے) اعراض کیا ﴿۱۷﴾ اور (مال) جمع کیا اور بند کر رکھا ﴿۱۸﴾ کچھ شک نہیں کہ انسان کم حوصلہ پیدا ہوا ہے ﴿۱۹﴾ جب اسے تکلیف پہنچتی ہے تو گھبرا اٹھتا ہے ﴿۲۰﴾ اور جب آسائش حاصل ہوتی ہے تو بخیل بن جاتا ہے ﴿۲۱﴾ مگر نماز گزار ﴿۲۲﴾ جو نماز کا التزام رکھتے (اور بلاناغہ پڑھتے) ہیں ﴿۲۳﴾ اور جن کے مال میں حصہ مقرر ہے ﴿۲۴﴾ (یعنی) مانگنے والے کا۔ اور نہ مانگے والے والا کا ﴿۲۵﴾ اور جو روز جزا کو سچ سمجھتے ہیں ﴿۲۶﴾ اور جو اپنے پروردگار کے عذاب سے خوف رکھتے ہیں ﴿۲۷﴾ بےشک ان کے پروردگار کا عذاب ہے ہی ایسا کہ اس سے بےخوف نہ ہوا جائے ﴿۲۸﴾ اور جو اپنی شرمگاہوں کی حفاظت کرتے ہیں ﴿۲۹﴾ مگر اپنی بیویوں یا لونڈیوں سے کہ (ان کے پاس جانے پر) انہیں کچھ ملامت نہیں ﴿۳۰﴾ اور جو لوگ ان کے سوا اور کے خواستگار ہوں وہ حد سے نکل جانے والے ہیں ﴿۳۱﴾ اور جو اپنی امانتوں اور اقراروں کا پاس کرتے ہیں ﴿۳۲﴾ اور جو اپنی شہادتوں پر قائم رہتے ہیں ﴿۳۳﴾ اور جو اپنی نماز کی خبر رکھتے ہیں ﴿۳۴﴾ یہی لوگ باغہائے بہشت میں عزت واکرام سے ہوں گے ﴿۳۵﴾

ترجمہ: احمد رضا خان بریلوی

ایک مانگنے والا وہ عذاب مانگتا ہے، ﴿۱﴾ جو کافروں پر ہونے والا ہے، اس کا کوئی ٹالنے والا نہیں، ﴿۲﴾ وہ ہوگا اللہ کی طرف سے جو بلندیوں کا مالک ہے ﴿۳﴾ ملائکہ اور جبریل اس کی بارگاہ کی طرف عروج کرتے ہیں وہ عذاب اس دن ہوگا جس کی مقدار پچاس ہزار برس ہے ﴿۴﴾ تو تم اچھی طرح صبر کرو، ﴿۵﴾ وہ اسے دور سمجھ رہے ہیں ﴿۶﴾ اور ہم اسے نزدیک دیکھ رہے ہیں ﴿۷﴾ جس دن آسمان ہوگا جیسی گلی چاندی، ﴿۸﴾ اور پہاڑ ایسے ہلکے ہوجائیں گے جیسے اون ﴿۹﴾ اور کوئی دوست کسی دوست کی بات نہ پوچھے گا ﴿۱۰﴾ ہوں گے انہیں دیکھتے ہوئے مجرم آرزو کرے گا، کاش! اس دن کے عذاب سے چھٹنے کے بدلے میں دے دے اپنے بیٹے، ﴿۱۱﴾ اور اپنی جورو اور اپنا بھائی، ﴿۱۲﴾ اور اپنا کنبہ جس میں اس کی جگہ ہے، ﴿۱۳﴾ اور جتنے زمین میں ہیں سب پھر یہ بدلہ دنیا اسے بچالے، ﴿۱۴﴾ ہرگز نہیں وہ تو بھڑکتی آگ ہے، ﴿۱۵﴾ کھال اتار لینے والی بلارہی ہے ﴿۱۶﴾ اس کو جس نے پیٹھ دی اور منہ پھیرا ﴿۱۷﴾ اور جوڑ کر سینت رکھا (محفوظ کرلیا) ﴿۱۸﴾ بیشک آدمی بنایا گیا ہے بڑا بے صبرا حریص، ﴿۱۹﴾ جب اسے برائی پہنچے تو سخت گھبرانے والا، ﴿۲۰﴾ اور جب بھلائی پہنچے تو روک رکھنے والا ﴿۲۱﴾ مگر نمازی، ﴿۲۲﴾ جو اپنی نماز کے پابند ہیں ﴿۲۳﴾ اور وہ جن کے مال میں ایک معلوم حق ہے ﴿۲۴﴾ اس کے لیے جو مانگے اور جو مانگ بھی نہ سکے تو محروم رہے ﴿۲۵﴾ اور ہو جو انصاف کا دن سچ جانتے ہیں ﴿۲۶﴾ اور وہ جو اپنے رب کے عذاب سے ڈر رہے ہیں، ﴿۲۷﴾ بیشک ان کے رب کا عذاب نڈر ہونے کی چیز نہیں ﴿۲۸﴾ اور ہو جو اپنی شرمگاہوں کی حفاظت کرتے ہیں، ﴿۲۹﴾ مگر اپنی بیبیوں یا اپنے ہاتھ کے مال کنیزوں سے کہ ان پر کچھ ملامت نہیں، ﴿۳۰﴾ تو جو ان دو کے سوا اور چاہے وہی حد سے بڑھنے والے ہیں ﴿۳۱﴾ اور وہ جو اپنی امانتوں اور اپنے عہد کی حفاظت کرتے ہیں ﴿۳۲﴾ اور وہ جو اپنی گواہیوں پر قائم ہیں ﴿۳۳﴾ اور وہ جو اپنی نماز کی حفاظت کرتے ہیں ﴿۳۴﴾ یہ ہیں جن کا باغوں میں اعزاز ہوگا ﴿۳۵﴾

ترجمہ: علامہ محمد حسین نجفی

ایک سوال کرنے والے نے اس عذاب کا سوال کیا۔ ﴿۱﴾ جو کافروں پر واقع ہونے والا ہے (اور) اسے کوئی ٹالنے والانہیں ہے۔ ﴿۲﴾ جو اس خدا کی طرف سے ہے جو بلندی کے زینوں والا ہے۔ ﴿۳﴾ فرشتے اور روح اس کی بارگاہ میں ایک ایسے دن میں چڑھ کر جاتے ہیں جس کی مقدار پچاس ہزار سال ہے۔ ﴿۴﴾ (اے نبی(ص)) پس آپ(ص) بہترین صبر کیجئے۔ ﴿۵﴾ یہ لوگ تو اس (روز) کو بہت دور سمجھتے ہیں۔ ﴿۶﴾ مگر ہم اسے بالکل قریب دیکھ رہے ہیں۔ ﴿۷﴾ جس دن آسمان پگھلی ہوئی دھات کی طرح ہو جائے گا۔ ﴿۸﴾ اور پہاڑ دھنکی ہوئی رُوئی کی مانند ہو جائیں گے۔ ﴿۹﴾ اور کوئی دوست کسی دو ست کو نہ پو چھے گا۔ ﴿۱۰﴾ حالانکہ وہ ایک دوسرے کو دکھائے جائیں گے مجرم چاہے گا کہ اس دن کے عذاب سے بچنے کیلئے اپنے بیٹوں، ﴿۱۱﴾ اپنی بیوی اور اپنے بھائی، ﴿۱۲﴾ اور اپنے قریبی کنبہ جو اسے پناہ دینے والا ہے۔ ﴿۱۳﴾ اور رُوئے زمین کے سب لوگوں کو فدیہ میں دے دے اور پھر یہ (فدیہ) اسے نجات دلا دے۔ ﴿۱۴﴾ ہرگز نہیں وہ تو بھڑکتی ہوئی آگ کا شعلہ ہے۔ ﴿۱۵﴾ جو کھال کو ادھیڑ کر رکھ دے گا۔ ﴿۱۶﴾ اور ہر اس شخص کو (اپنی طرف) بلائے گا جو پیٹھ پھرائے گااور رُوگردانی کرے گا۔ ﴿۱۷﴾ اور جس نے (مال) جمع کیا اور پھر اسے سنبھال کر رکھا۔ ﴿۱۸﴾ بےشک انسان بےصبرا پیدا ہوا ہے۔ ﴿۱۹﴾ جب اسے کوئی تکلیف پہنچتی ہے تو وہ بہت گھبرا جاتا ہے۔ ﴿۲۰﴾ اورجب اسے خوشحالی نصیب ہوتی ہے تو بہت بُخل کرتا ہے۔ ﴿۲۱﴾ مگر وہ نمازی (اس عیب سے محفوظ ہیں)۔ ﴿۲۲﴾ جو اپنی نمازوں پر مُداومَت کرتے ہیں۔ ﴿۲۳﴾ اورجن کے مالوں میں مقررہ حق ہے۔ ﴿۲۴﴾ سا ئل اور محروم کا۔ ﴿۲۵﴾ اور جو جزا و سزا کے دن کی تصدیق کرتے ہیں۔ ﴿۲۶﴾ اور جو اپنے پروردگار کے عذاب سے ڈرتے رہتے ہیں۔ ﴿۲۷﴾ کیونکہ ان کے پروردگار کا عذاب وہ چیز ہے جس سے کسی کو مطمئن نہیں ہونا چاہئے۔ ﴿۲۸﴾ اور جو اپنی شرم گاہوں کی حفاظت کرتے ہیں۔ ﴿۲۹﴾ سوائے اپنی بیویوں کے یا اپنی مملوکہ کنیزوں کے کہ اس میں ان پر کوئی ملامت نہیں ہے۔ ﴿۳۰﴾ اور جو اس سے آگے بڑھے وہ حد سے تجاوز کرنے والے ہیں۔ ﴿۳۱﴾ اورجو اپنی امانتوں اورعہد و پیمان کا لحاظ رکھتے ہیں۔ ﴿۳۲﴾ اور جو اپنی گواہیوں پر قائم رہتے ہیں۔ ﴿۳۳﴾ اور جو اپنی نمازوں کی حفاظت کرتے ہیں۔ ﴿۳۴﴾ یہی وہ لوگ ہیں جو عزت کے ساتھ باغہائے بہشت میں رہیں گے۔ ﴿۳۵﴾

التفسير

تفہیم القرآن مولانا مودودیؒ

شروع اللہ کے نام سے جو بڑا مہربان اور نہایت رحم والا ہے مانگنے والےنے عذاب مانگا ہے، ¹ (وہ عذاب)جو ضرور واقع ہونے والا ہے، کافروں کے لیے ہے، کوئی اُسے دفع کرنے والا نہیں، اُس خدا کی طرف سے ہے جو عروج کے زینوں کا مالک ہے۔ ² ملائکہ اور رُوح ³ اُس کے حضور چڑھ کر جاتے ہیں ²⁷ ایک ایسے دن میں جس کی مقدار پچاس ہزار سال ہے۔ ⁵ پس اے نبیؐ ، صبر کرو، شائستہ صبر۔ ⁶ یہ لوگ اُسے دُور سمجھتے ہیں اور ہم اسے قریب دیکھ رہے ہیں۔ ⁷ (وہ عذاب اُس روز ہو گا)جس ⁸ روز آسمان پگھلی ہوئی چاندی کی طرح ہو جائے گا اور پہاڑ رنگ برنگ کے دُھنکے ہوئے اُون جیسے ہوجائیں گے۔ ¹⁰ اور کوئی جگری دوست اپنے جگری دوست کو نہ پوچھے گا حالانکہ وہ ایک دُوسرے کو دکھائے جائیں گے۔ ¹¹ مجرم چاہے گا کہ اس دن کے عذاب سے بچنے کے لیے اپنی اولاد کو، اپنی بیوی کو، اپنے بھائی کو ، اپنے قریب ترین خاندان کو جو اسے پناہ دینے والا تھا، اور رُوئے زمین کے سب لوگوں کو فدیہ میں دے دے اور یہ تدبیر اُسے نجات دلا دے۔ ہر گز نہیں۔ وہ تو بھڑکتی ہوئی آگ کی لپٹ ہوگی جو گوشت پوست کو چاٹ جائے گی ، پکار پکار کر اپنی طرف بلائے گی ہر اُس شخص کو جس نے حق سے منہ موڑا اور پیٹھ پھیری اور مال جمع کیا اور سینت سینت کر رکھا۔ ¹²
انسان تھُڑ دِلا پیدا کیا گیا ہے، ¹³ جب اس پر مصیبت آتی ہے تو گھبرا اُٹھتا ہے اور جب اسے خوشحالی نصیب ہوتی ہے تو بُخل کرنے لگتا ہے۔ مگر وہ لوگ (اِس عیب سے بچے ہوئے ہیں)جو نماز پڑھنے والے ہیں، ¹⁴ جو اپنی نماز کی ہمیشہ پابندی کرتے ہیں، ¹⁵ جن کے مالوں میں سائل اور محروم کا ایک مقرر حق ہے، ¹⁶ جو روزِ جزا کو بر حق مانتے ہیں، ¹⁷ جو اپنے ربّ کے عذاب سے ڈرتے ہیں ¹⁸ کیونکہ اُن کے ربّ کا عذاب ایسی چیز نہیں ہے جس سے کوئی بے خوف ہو، جو اپنی شرمگاہوں کی حفاظت کرتے ہیں¹⁹ ۔۔۔۔ بجز اپنی بیویوں کے یا اپنی مملوکہ عورتوں کے جن سے محفوظ نہ رکھنے میں ان پر کو ئی ملامت نہیں، البتہ جو اس کے علاوہ کچھ اور چاہیں وہی حد سے تجاوز کرنے والے ہیں ²⁰ ۔۔۔۔ جو اپنی امانتوں کی حفاظت اور اپنے عہد کا پاس کرتے ہیں، ²¹ جو اپنی گواہیوں میں راست بازی پر قائم رہتے ہیں، ²² اور جو اپنی نماز کی حفاظت کرتے ہیں۔ ²³ یہ لوگ عزت کے ساتھ جنّت کے باغوں میں رہیں گے۔ ؏۱

Tafheem ul Quran Sayyid Abul A'la Maududi

A demander has demanded a torment,¹ which must befall. It is for the disbelievers. There is none to avert it. It will come from that God Who is the Owner of the Steps of Ascent.² The angels and the Spirit³ ascend to His Presence⁴ in a day whose measure is fifty thousand years⁵ So, have patience, O Prophet, a graceful patience.⁶ They think it is far off, but We see it as near at hand.⁷ (The torment shall befall on the Day)⁸ when the heavens shall be like molten silver,⁹ and the mountains like carded wool of different colors.¹⁰ And no close friend shall ask after his close friend, though they will be shown to each other.¹¹ To save himself from the torment of that Day, the culprit shall wish to give his children, his wife, his brother, his kinsfolk who gave him shelter, and all the people of the earth, in ransom that this device might rescue him. No, never! It will be the flame of the blazing Fire, that will eat up the very flesh. It shall summon to itself every such person who drew away and turned his back and amassed wealth and guarded it jealously.¹² Indeed, man has been created impatient.¹³ When affliction befalls him, he becomes fretful, and when good fortune falls to his lot he becomes stingy. But those people (are an exception) who are the performers of salat.¹⁴ Who are steadfast and ever constant in regard to their salat.¹⁵ In whose wealth there is a due share of the beggar and the needy.¹⁶ Who believe in the reality of the Day of Recompense.¹⁷ Who dread the torment of their Lord.¹⁸ For from the torment of their Lord none can feel secure; who guard their private parts.¹⁹ Except with regard to their wives and those women who are legally in their possession, for in their case they are not blameworthy, but those who go beyond this are indeed transgressors.²⁰ Who keep their trusts and honor their promises.²¹ Who bear true witnesses.²² And who strictly guard their salat.²³ These are they who shall live with honor in the Gardens of Paradise.

تفسیر ابن کثیر حافظ ابن کثیرؒ

آیات 1–7

کافروں کا عذاب الٰہی طلب کرنا ٭٭

«بِعَذَابٍ» میں جو «ب» ہے وہ بتا رہا ہے کہ یہاں فعل کی تضمین ہے گویا کہ فعل مقدر ہے یعنی یہ کافر عذاب کے واقع ہونے کی طلب میں جلدی کر رہے ہیں، جیسے اور جگہ ہے «‏‏‏‏وَيَسْتَعْجِلُوْنَكَ بالْعَذَابِ وَلَنْ يُّخْلِفَ اللّٰهُ وَعْدَهٗ وَاِنَّ يَوْمًا عِنْدَ رَبِّكَ كَاَلْفِ سَنَةٍ مِّمَّا تَعُدُّوْنَ» ‏‏‏‏۱؎ [22-الحج:47] ‏‏‏‏ یعنی ’ یہ عذاب مانگنے میں عجلت کر رہے ہیں اور اللہ تعالیٰ ہرگز وعدہ خلافی نہیں کرتا ‘، یعنی اس کا عذاب یقیناً اپنے وقت مقررہ پر آ کر ہی رہے گا۔ نسائی میں سیدنا ابن عباس رضی اللہ عنہما سے وارد ہے کہ ”کافروں نے اللہ کا عذاب مانگا جو ان پر یقیناً آنے والا ہے“، یعنی آخرت میں۔ ان کی اس طلب کے الفاظ بھی دوسری جگہ قرآن میں منقول ہیں کہتے ہیں «اللّٰهُمَّ اِنْ كَانَ هٰذَا هُوَ الْحَقَّ مِنْ عِنْدِكَ فَاَمْطِرْ عَلَيْنَا حِجَارَةً مِّنَ السَّمَاءِ اَوِ ائْتِنَا بِعَذَابٍ اَلِيْمٍ» ‏‏‏‏۱؎ [8-الإنفال:32] ‏‏‏‏ یعنی ’ الٰہی اگر یہ تیرے پاس سے حق ہے تو ہم پر آسمان سے پتھر برسا یا ہمارے پاس کوئی درد ناک عذاب لا ‘۔ ابن جریر رحمہ اللہ وغیرہ کہتے ہیں کہ ”اس سے مراد وہ عذاب کی وادی ہے جو قیامت کے دن عذابوں سے بہہ نکلے گی“، لیکن یہ قول ضعیف ہے اور مطلب سے بہت دور ہے صحیح قول پہلا ہی ہے جس پر روش کلام کی دلالت ہے۔ پھر فرماتا ہے کہ ’ وہ عذاب کافروں کے لیے تیار ہے اور ان پر آ پڑنے والا ہے جب آ جائے گا تو اسے دور کرنے والا نہیں اور نہ کسی میں اتنی طاقت ہے کہ اسے ہٹا سکے ‘۔

معارج سے مراد ٭٭

«‏‏‏‏مِّنَ اللّٰهِ ذِي الْمَعَارِجِ» ۱؎ [70-المعارج:3] ‏‏‏‏ کے معنی سیدنا ابن عباس رضی اللہ عنہما کی تفسیر کے مطابق ”درجوں والا ہے“، یعنی بلندیوں اور بزرگیوں والا اور مجاہد رحمہ اللہ فرماتے ہیں ”مراد معارج سے آسمان کی سیڑھیاں ہیں“، قتادہ رحمہ اللہ کہتے ہیں ”فضل و کرم اور نعمت و رحم والا“، یعنی یہ عذاب اس اللہ کی طرف سے ہے جو ان صفتوں والا ہے، اس کی طرف فرشتے اور روح چڑھتے ہیں۔ روح کی تفسیر میں ابوصالح رحمہ اللہ فرماتے ہیں کہ یہ قسم کی مخلوق ہے انسان تو نہیں لیکن انسانوں سے بالکل مشابہ ہے، میں کہتا ہوں ممکن ہے اس سے مراد جبرائیل علیہ السلام ہوں اور یہ عطف ہو عام پر خاص کا، اور ممکن ہے کہ اس سے مراد بنی آدم کی روحیں ہوں، اس لیے کہ وہ بھی قبض ہونے کے بعد آسمانوں کی طرف چڑھتی ہیں، جیسے کہ سیدنا براء رضی اللہ عنہ والی لمبی حدیث میں ہے کہ { جب فرشتے پاک روح نکالتے ہیں تو اسے لے کر ایک آسمان سے دوسرے پر چڑھتے جاتے ہیں یہاں تک کہ ساتویں آسمان پر پہنچتے ہیں }، گو اس کے بعض راویوں میں کلام ہے لیکن یہ حدیث مشہور ہے اور اس کی شہادت میں سیدنا ابوہریرہ رضی اللہ عنہ والی حدیث بھی ہے جیسے کہ پہلے بروایت امام احمد، ترمذی اور ابن ماجہ گزر چکی ہے جس کی سند کے راوی ایک جماعت کی شرط پر ہیں، پہلی حدیث بھی مسند احمد، ابوداؤد، و نسائی اور ابن ماجہ میں ہے، ہم نے اس کے الفاظ اور اس کے طرق کا بسیط بیان آیت «‏‏‏‏يُثَبِّتُ اللّٰهُ الَّذِيْنَ اٰمَنُوْا بالْقَوْلِ الثَّابِتِ فِي الْحَيٰوةِ الدُّنْيَا وَفِي الْاٰخِرَةِ وَيُضِلُّ اللّٰهُ الظّٰلِمِيْن وَيَفْعَلُ اللّٰهُ مَا يَشَاءُ» ۱؎ [14-ابراھیم:27] ‏‏‏‏ کی تفسیر میں کر دیا ہے۔

روز قیامت کتنا بڑا ہے ٭٭

پھر فرمایا ’ اس دن میں جس کی مقدار پچاس ہزار سال کی ہے ‘، اس میں چار قول ہیں ایک تو یہ کہ ”اس سے مراد وہ دوری ہے جو «أَسْفَلَ سَافِلِينَ» سے عرش معلی تک ہے اور اسی طرح عرش کے نیچے سے اوپر تک کا فاصلہ بھی اتنا ہی ہے اور عرش معلی سرخ یاقوت کا ہے“، جیسے کہ امام ابن ابی شیبہ رحمہ اللہ نے اپنی کتاب ”صفتہ العرش“ میں ذکر کیا ہے۔ ابن ابی حاتم میں ہے سیدنا ابن عباس رضی اللہ عنہما فرماتے ہیں کہ ”اس کے حکم کی انتہاء نیچے کی زمین سے آسمانوں کے اوپر تک کی پچاس ہزار سال کی ہے اور ایک دن ایک ہزار سال کا ہے یعنی آسمان سے زمین تک اور زمین سے آسمان تک ایک دن میں جو ایک ہزار سال کے برابر ہے، اس لیے کہ آسمان و زمین کا فاصلہ پانچ سو سال کا ہے۔‏‏‏‏“ یہی روایت دوسرے طریق سے مجاہد رحمہ اللہ کے قول سے مروی ہے سیدنا ابن عباس رضی اللہ عنہما کے قول سے نہیں، سیدنا ابن عباس رضی اللہ عنہما سے ابن ابی حاتم میں روایت ہے کہ ”ہر زمین کی موٹائی پانچ سو سال کے فاصلہ کی ہے اور ایک زمین سے دوسری زمین تک پانچ سو سال کی دوری ہے تو سات ہزار سال یہ ہو گئے، اسی طرح آسمان، تو چودہ ہزار سال یہ ہوئی اور ساتویں آسمان سے عرش عظیم تک چھتیس ہزار سال کا فاصلہ ہے، یہی معنی ہیں اللہ کے اس فرمان کے کہ ’ اس دن میں جس کی مقدار پچاس ہزار سال کے برابر ہے ‘۔ دوسرا قول یہ ہے کہ ”مراد اس سے یہ ہے کہ جب سے اللہ تعالیٰ نے اس عالم کو پیدا کیا ہے تب سے لے کر قیامت تک کہ اس کی بقاء کی آخر تک مدت پچاس ہزار سال کی ہے“، چنانچہ مجاہد رحمہ اللہ فرماتے ہیں کہ ”دنیا کی کل عمر پچاس ہزار سال کی ہے، اور یہی ایک دن ہے جو اس آیت میں مراد لیا گیا ہے۔‏‏‏‏“ عکرمہ رحمہ اللہ فرماتے ہیں ”دنیا کی پوری مدت یہی ہے لیکن کسی کو معلوم نہیں کہ کس قدر گزر گئی اور کتنی باقی ہے سوائے اللہ تبارک و تعالیٰ کے“ ـ تیسرا قول یہ ہے کہ ”یہ دن وہ ہے جو دنیا اور آخرت میں فاصلے کا ہے“، سیدنا محمد بن کعب رضی اللہ عنہ یہی فرماتے ہیں لیکن یہ قول بہت ہی غریب ہے۔ چوتھا قول یہ ہے کہ ”اس سے مراد قیامت کا دن ہے۔‏‏‏‏“ سیدنا ابن عباس رضی اللہ عنہما سے یہ بہ سند صحیح مروی ہے، عکرمہ رحمہ اللہ بھی یہی فرماتے ہیں، سیدنا ابن عباس رضی اللہ عنہما کا قول ہے کہ ”قیامت کے دن کو اللہ تعالیٰ کافروں پر پچاس ہزار سال کا کر دے گا۔‏‏‏‏“ مسند احمد کی حدیث میں ہے کہ { رسول اللہ صلی اللہ علیہ وسلم سے کہا گیا یہ دن تو بہت ہی بڑا ہے، آپ صلی اللہ علیہ وسلم نے فرمایا: ”اس کی قسم جس کے ہاتھ میں میری جان ہے یہ مومن پر اس قدر ہلکا ہو جائے گا کہ دنیا کی ایک فرض نماز کی ادائیگی میں جتنا وقت لگتا ہے اس سے بھی کم ہو گا“ }، یہ حدیث ابن جریر میں بھی ہے اس کے دو راوی ضعیف ہیں۔ ۱؎ [مسند احمد:75/3:ضعیف] ‏‏‏‏ «وَاللهُ اَعْلَمُ»

بے زکوۃ جانور قیامت کے دن وبال جان ٭٭

مسند کی ایک اور حدیث میں ہے کہ سیدنا ابوہریرہ رضی اللہ عنہ کے پاس سے قبیلہ بنو عامر کا ایک شخص گزرا لوگوں نے کہا حضرت یہ اپنے قبیلے میں سب سے بڑا مالدار ہے آپ نے اسے بلوایا اور فرمایا ”کیا واقع میں تم سب سے زیادہ مالدار ہو؟“، اس نے کہا: ہاں، میرے پاس رنگ برنگ سینکڑوں اونٹ، قسم قسم کے غلام، اعلیٰ اعلیٰ درجہ کے گھوڑے وغیرہ ہیں۔ سیدنا ابوہریرہ رضی اللہ عنہ نے فرمایا: دیکھو خبردار ایسا نہ ہو کہ یہ جانور اپنے پاؤں سے تمہیں روندیں اور اپنے سینگوں سے تمہیں ماریں، باربار یہی فرماتے رہے یہاں تک کہ عامری کے چرے کا رنگ اڑ گیا اور اس نے کہا حضرت یہ کیوں؟ آپ نے فرمایا سنو! میں نے رسول اللہ صلی اللہ علیہ وسلم سے سنا ہے کہ جو اپنے اونٹوں کا حق ادا نہ کرے ان کی سختی میں اور ان کی آسانی میں اسے اللہ تعالیٰ قیامت کے دن ایک چٹیل لمبے چوڑے صاف میدان میں چت لٹائے گا اور ان تمام جانوروں کو خوب موٹا تازہ کر کے حکم دے گا کہ اسے روندتے ہوئے چلو چنانچہ ایک ایک کر کے اسے کچلتے ہوئے گزریں گے جب آخر والا گزر جائے گا تو اول والا لوٹ کر آ جائے گا یہی عذاب اسے ہوتا رہے گا اس دن میں جس کی مقدار پچاس ہزار سال کی ہے یہاں تک کہ لوگوں کے درمیان فاصلہ ہو جائے پھر وہ اپنا راستہ دیکھ لے گا، اسی طرح گائے گھوڑے بکری وغیرہ یہی سینگ دار جانور اپنے سینگوں سے بھی اسے مارتے جائیں گے کوئی ان میں بےسینگ کا یا ٹوٹے ہوئے سینگ والا نہ ہو گا۔ عامری نے پوچھا: اے ابوہریرہ فرمایئے اونٹوں میں اللہ کا حق کیا ہے؟ فرمایا: ”مسکنیوں کو سواری کے لیے تحفتًہ دینا غرباء کے ساتھ سلوک کرنا دودھ پینے کے لیے جانور دینا، ان کے نروں کی ضرورت جنہیں مادہ کے لیے ہو، انہیں مانگا ہوا بے قیمت دینا“، یہ حدیث ابوداؤد اور نسائی میں بھی دسرے سند سے مذکور ہے۔ ۱؎ [سنن ابوداود:1660،قال الشيخ الألباني:حسن لغیره] ‏‏‏‏

زکوۃ کے بغیر مال کی سزا ٭٭

مسند کی ایک حدیث میں ہے کہ { جو سونے چاندی کے خزانے والا اس کا حق ادا نہ کرے اس کا سونا چاندی کی تختیوں کی صورت میں بنایا جائے گا اور جہنم کی آگ میں تپا کر اس کی پیشانی، کروٹ اور پیٹھ داغی جائے گی یہاں تک کہ اللہ اپنے بندوں کے فیصلے کر لے اس دن میں جس کی مقدار تمہاری گنتی سے پچاس ہزار سال کی ہو گی پھر وہ اپنا راستہ جنت کی طرف یا جہنم کی طرف دیکھ لے گا }۔ پھر آگے بکریوں اور اونٹوں کا بیان ہے جیسے اوپر گزرا، اور یہ بھی بیان ہے کہ { گھوڑے تین قسم کے لوگوں کے لیے ہیں، ایک تو اجر دلانے والے، دوسری قسم کے پردہ پوشی کرنے والے، تیسری قسم کے بوجھ ڈھونے والے }۔ یہ حدیث پوری پوری صحیح مسلم شریف میں بھی ہے۔ ۱؎ [صحیح مسلم:987] ‏‏‏‏ ان روایتوں کے پورا بیان کرنے کی اور ان کی سندوں اور الفاظ کے تمام تر نقل کرنے کی مناسب جگہ احکام کی کتاب الزکوٰۃ ہے، یہاں ان کے وارد کرنے سے ہماری غرض صرف ان الفاظ سے ہے کہ یہاں تک کہ اللہ اپنے بندوں کے درمیان فیصلہ کرے گا، اس دن میں جس کی مقدار پچاس ہزار سال کی ہے۔ سیدنا عبداللہ بن عباس رضی اللہ عنہا سے ایک شخص پوچھتا ہے کہ وہ دن کیا ہے، جس کی مقدار ایک ہزار سال کی ہے؟ آپ فرماتے ہیں ”اور وہ دن کیا ہے جو پچاس ہزار سال کا ہے؟“ اس نے کہا حضرت میں تو خود دریافت کرنے آیا ہوں؟ آپ نے فرمایا ”سنو! یہ دو دن ہیں جن کا ذکر اللہ تبارک و تعالیٰ نے اپنی کتاب میں کیا ہے۔ اللہ تعالیٰ ہی کو ان کی حقیقت کا بخوبی علم ہے میں تو باوجود نہ جاننے کے کتاب اللہ میں کچھ کہنا مکروہ جانتا ہوں۔‏‏‏‏“ پھر فرماتا ہے ’ اے نبی! تم اپنی قوم کو جھٹلانے پر اور عذاب کے مانگنے کی جلدی پر جسے وہ اپنے نزدیک نہ آنے والا جانتے ہیں صبر و تحمل کرو ‘۔ جیسے اور جگہ ہے «‏‏‏‏يَسْتَعْجِلُ بِهَا الَّذِيْنَ لَا يُؤْمِنُوْنَ بِهَا وَالَّذِيْنَ اٰمَنُوْا مُشْفِقُوْنَ مِنْهَا وَيَعْلَمُوْنَ اَنَّهَا الْحَقُّ اَلَآ اِنَّ الَّذِيْنَ يُمَارُوْنَ فِي السَّاعَةِ لَفِيْ ضَلٰلٍ بَعِيْدٍ» ۱؎ [42-الشورى:18] ‏‏‏‏، یعنی ’ بے ایمان تو قیامت کے جلد آنے کی تمنائیں کرتے ہیں اور ایماندار اس کے آنے کو حق جان کر اس سے ڈر رہے ہیں ‘۔ اسی لیے یہاں بھی فرمایا کہ ’ یہ تو اسے دور جان رہے ہیں بلکہ محال اور واقع نہ ہونے والا مانتے ہیں لیکن ہم اسے قریب ہی دیکھ رہے ہیں ‘، یعنی مومن تو اس کا آنا حق جانتے ہیں اور سمجھتے ہیں کہ اب آیا ہی چاہتی ہے، نہ جانے کب قیامت قائم ہو جائے اور کب عذاب آ پڑیں، کیونکہ اس کے صحیح وقت کو تو سوائے اللہ کے اور کوئی جانتا ہی نہیں، پس ہر وہ چیز جس کے آنے اور ہونے میں کوئی شک نہ ہو اس کا آنا قریب ہی سمجھا جاتا ہے اور اس کے ہو پڑنے کا ہر وقت کھٹکا ہی رہتا ہے۔

آیات 8–18

عذاب کے طالب عذاب دیئے جائیں گے ٭٭

اللہ تعالیٰ فرماتا ہے کہ ’ جس عذاب کو یہ طلب کر رہے ہیں وہ عذاب ان طلب کرنے والے کافروں پر اس دن آئے گا جس دن آسمان مثل «مُهْلِ» کے ہو جائے ‘، یعنی زیتون کی تلچھٹ جیسا ہو جائے، ’ اور پہاڑ ایسے ہو جائیں جیسے دھنی ہوئی اون ‘، یہی فرمان اور جگہ ہے «‏‏‏‏وَتَكُونُ الْجِبَالُ كَالْعِهْنِ الْمَنفُوشِ» ۱؎ [101-القارعة:5] ‏‏‏‏۔ پھر فرماتا ہے ’ کوئی قریبی رشتہ دار کسی اپنے قریبی رشتہ دار سے پوچھ گچھ بھی نہ کرے گا حالانکہ ایک دوسرے کو بری حالت میں دیکھ رہے ہوں گے لیکن خود ایسے مشغول ہوں گے کہ دوسرے کا حال پوچھنے کا بھی ہوش نہیں، سب آپا دھاپی میں پڑے ہیں ‘۔ سیدنا ابن عباس رضی اللہ عنہما فرماتے ہیں ”ایک دوسرے کو دیکھے گا پہچانے لگا لیکن پھر بھاگ کھڑا ہو گا“، جیسے اور جگہ ہے «لِكُلِّ امْرِئٍ مِّنْهُمْ يَوْمَئِذٍ شَأْنٌ يُغْنِيهِ» [80-عبس:37] ‏‏‏‏ یعنی ’ ہر ایک ایسے مشغلے میں لگا ہوا ہو گا جو دوسرے کی طرف متوجہ ہونے کا موقعہ ہی نہ دے گا ‘۔ ایک اور جگہ فرمان ہے «يَا أَيُّهَا النَّاسُ اتَّقُوا رَبَّكُمْ وَاخْشَوْا يَوْمًا لَّا يَجْزِي وَالِدٌ عَن وَلَدِهِ وَلَا مَوْلُودٌ هُوَ جَازٍ عَن وَالِدِهِ شَيْئًا إِنَّ وَعْدَ اللَّـهِ حَقٌّ» ۱؎ [31-لقمان:33] ‏‏‏‏ ’ لوگو اپنے رب سے ڈرو اور اس دن کا خوف کرو جس دن باپ اپنی اولاد کے اور اولاد اپنے باپ کے کچھ کام نہ آئے گا ‘۔ اور جگہ ارشاد ہے «وَإِن تَدْعُ مُثْقَلَةٌ إِلَىٰ حِمْلِهَا لَا يُحْمَلْ مِنْهُ شَيْءٌ وَلَوْ كَانَ ذَا قُرْبَىٰ» ۱؎ [35-فاطر:18] ‏‏‏‏ ’ کوئی کسی کا بوجھ نہ بٹائے گا، گو قرابت دار ہوں ‘۔ اور جگہ فرمان ہے «فَاِذَا نُفِخَ فِي الصُّوْرِ فَلَآ اَنْسَابَ بَيْنَهُمْ يَوْمَىِٕذٍ وَّلَا يَتَسَاءَلُوْنَ» ۱؎ [23-المؤمنون:101] ‏‏‏‏ یعنی ’ صور پھونکتے ہی سب آپس کے رشتے ناتے اور پوچھ گچھ ختم ہو جائے گی ‘۔ اور جگہ فرمان ہے «يَوْمَ يَفِرُّ الْمَرْءُ مِنْ أَخِيهِ وَأُمِّهِ وَأَبِيهِ وَصَاحِبَتِهِ وَبَنِيهِ لِكُلِّ امْرِئٍ مِّنْهُمْ يَوْمَئِذٍ شَأْنٌ يُغْنِيهِ» ‏‏‏‏۱؎ [80- عبس:34-37] ‏‏‏‏ یعنی ’ اس دن انسان اپنے بھائی، ماں، باپ، بیوی اور فرزند سے بھاگتا پھرے گا ‘۔ ہر شخص اپنی پریشانیوں کی وجہ سے دوسرے سے غافل ہو گا، یہ وہ دن ہو گا کہ اس دن ہر گنہگار دل سے چاہے گا کہ اپنی اولاد کو اپنے فدیہ میں دے کر جہنم کے آج کے عذاب سے چھوٹ جائے اور اپنی بیوی، بھائی، اپنے رشتے کنبے، اپنے خاندان اور قبیلے کو بلکہ چاہے گا کہ تمام روئے زمین کے لوگوں کو جہنم میں ڈال دیا جائے لیکن اسے آزاد کر دیا جائے۔ آہ! کیا ہی دل گداز منظر ہے کہ انسان اپنے کلیجے کے ٹکڑوں کو، اپنی شاخوں، اپنی جڑوں سب کو آج فدا کرنے پر تیار ہے تاکہ خود بچ جائے۔

«فَصِيلَتِهِ» کے معنی ماں کے بھی کئے گئے ہیں، غرض تمام تر محبوب ہستیوں کو اپنی طرف سے بھینٹ میں دینے پر دل سے رضامند ہو گا، لیکن کوئی چیز کام نہ آئے گی کوئی بدلہ اور فدیہ نہ کھپے گا، کوئی عوض اور معاوضہ قبول نہ کیا جائے گا بلکہ اس آگ کے عذاب میں ڈالا جائے گا جو اونچے اونچے اور تیز تیز شعلے پھینکنے والی اور سخت بھڑکنے والی ہے، جو سر کی کھال تک جھلسا کر کھینچ لاتی ہے، بدن کی کھال دور کر دیتی ہے اور کھوپڑی پلپلی کر دیتی ہے، ہڈیوں کو گوشت سے الگ کر دیتی ہے، رگ پٹھے کھنچنے لگتے ہیں، ہاتھ پاؤں اینٹھنے لگتے ہیں، پنڈلیاں کٹی جاتی ہیں، چہرہ بگڑ جاتا ہے، ہر ایک عضو بدل جاتا ہے، چیخ پکار کرتا رہتا ہے، ہڈیوں کا چورا کرتی رہتی ہے، کھالیں جلائی جاتی ہے۔ یہ آگ اپنی فصیح زبان اور اونچی آواز سے اپنے والوں کو جنہوں نے دنیا میں بدکاریاں اور اللہ کی نافرمانیاں کی تھیں پکارتی ہے پھر جس طرح پرند جانور دانہ چگتا ہے اسی طرح میدان محشر میں سے ایسے بدلوگوں کو ایک ایک کر کے دیکھ بھال کر چن لیتی ہے، اب ان کی بداعمالیاں بیان ہو رہی ہیں کہ یہ دل سے جھٹلانے والے اور بدن سے عمل چھوڑ دینے والے تھے، یہ مال کو جمع کرنے والے اور سربند کر کے رکھ چھوڑنے والے تھے، اللہ تعالیٰ کے ضروری احکام میں بھی مال خرچ کرنے سے بھاگتے تھے بلکہ زکوٰۃ تک ادا نہ کرتے تھے۔ حدیث شریف میں ہے { سمیٹ سمیٹ کر سینت سینت کر نہ رکھ ورنہ اللہ تعالیٰ بھی تجھ سے روک لے گا }۔ ۱؎ [صحیح بخاری:1434] ‏‏‏‏ عبداللہ بن حکیم رحمہ اللہ تو اس آیت پر عمل کرتے ہوئے کبھی تھیلی کا منہ ہی نہ باندھتے تھے۔ امام حسن بصری رحمہ اللہ فرماتے ہیں ”اے ابن آدم اللہ تعالیٰ کی وعید سن رہا ہے پھر مال سمیٹتا جا رہا ہے؟“ قتادہ رحمہ اللہ فرماتے ہیں ”مال کو جمع کرنے میں حلال حرام کا پاس نہ رکھتا تھا اور فرمان اللہ ہوتے ہوئے بھی خرچ کی ہمت نہیں کرتا تھا۔‏‏‏‏“

آیات 19–35

انسان بےصبرا، بخیل اور کنجوس بھی ہے ٭٭

یہاں انسانی جبلت کی کمزوری بیان ہو رہی ہے کہ ’ یہ بڑا ہی بے صبرا ہے ‘، مصیبت کے وقت تو مارے گھبراہٹ اور پریشانی کے باؤلا سا ہو جاتا ہے، گویا دل اڑ گیا اور گویا اب کوئی آس باقی نہیں رہی، اور راحت کے وقت بخیل کنجوس بن جاتا ہے اللہ تعالیٰ کا حق بھی ڈکار جاتا ہے۔ { رسول اللہ صلی اللہ علیہ وسلم فرماتے ہیں ”بدترین چیز انسان میں بے حد بخیلی اور اعلیٰ درجہ کی نامردی ہے۔‏‏‏‏“ ۱؎ [سنن ابوداود:2511،قال الشيخ الألباني:صحیح] ‏‏‏‏ پھر فرمایا کہ ’ ہاں اس مذموم خصلت سے وہ لوگ دور ہیں جن پر خاص فضل الٰہی ہے اور جنہیں توفیق خیر ازل سے مل چکی ہے، جن کی صفتیں یہ ہیں کہ وہ پورے نمازی ہیں، وقتوں کی نگہبانی کرنے، واجبات نماز کو اچھی طرح بجا لانے، سکون اطمینان اور خشوع خضوع سے پابندی کے ساتھ نماز ادا کرنے والے ‘۔

جیسے فرمایا «‏‏‏‏قَدْ أَفْلَحَ الْمُؤْمِنُونَ الَّذِينَ هُمْ فِي صَلَاتِهِمْ خَاشِعُونَ» ۱؎ [23-المؤمنون:2-1] ‏‏‏‏، ’ ان ایمان داروں نے نجات پا لی جو اپنی نماز خوف اللہ سے ادا کرتے ہیں ‘۔ ٹھہرے ہوئے بے حرکت کے پانی کو بھی عرب «الْمَاءُ الدَّائِمُ» کہتے ہیں اس سے ثابت ہوا کہ نماز میں اطمینان واجب ہے، جو شخص اپنے رکوع سجدے پوری طرح ٹھہر کر بااطمینان ادا نہیں کرتا وہ اپنی نماز پر دائم نہیں کیونکہ نہ وہ سکون کرتا ہے، نہ اطمینان بلکہ کوئے کی طرح ٹھونگیں مار لیتا ہے اس کی نماز اسے نجات نہیں دلوائے گی، اور یہ بھی کہا گیا ہے کہ اس سے مراد ہر نیک عمل پر مداوت اور ہمیشگی کرنا ہے۔ جیسے کہ نبی علیہ صلوات اللہ کا فرمان ہے کہ { اللہ کو سب سے زیادہ پسند وہ عمل ہے جس پر مداوت کی جائے گو کم ہو }۔ ۱؎ [صحیح بخاری:6464] ‏‏‏‏ خود حضور علیہ السلام کی عادت مبارک بھی یہی تھی کہ جس کام کو کرتے اس پر ہمیشگی کرتے۔

قتادہ رحمتہ اللہ علیہ فرماتے ہیں ”ہم سے ذکر کیا گیا کہ دانیال علیہ السلام پیغمبر نے امت محمد صلی اللہ علیہ وسلم کی تعریف کرتے ہوئے فرمایا کہ ”وہ ایسی نماز پڑھے گی کہ اگر قوم نوح ایسی نماز پڑھتی تو ڈوبتی نہیں اور قوم عاد کی اگر ایسی نماز ہوتی تو ان پر بے برکتی کی ہوائیں نہ بھیجی جاتیں اور اگر قوم ثمود کی نماز ایسی ہوتی تو انہیں چیخ سے ہلاک نہ کیا جاتا، پس اے لوگو! نماز کو اچھی طرح پابندی سے پڑھا کرو مومن کا یہ زیور اور اس کا بہترین خلق ہے۔‏‏‏‏“ پھر فرماتا ہے ’ ان کے مالوں میں حاجت مندوں کا بھی مقررہ حصہ ہے ‘، سائل اور محروم کی پوری تفسیر سورۃ ذاریات میں گزر چکی ہے۔ یہ لوگ حساب اور جزا کے دن پر بھی یقین کامل اور پورا ایمان رکھتے ہیں اسی وجہ سے وہ اعمال کرتے ہیں جن سے ثواب پائیں اور عذاب سے چھوٹیں، پھر ان کی صفت بیان ہوتی ہے کہ وہ اپنے رب کے عذاب سے ڈرتے اور خوف کھانے والے ہیں، جس عذاب سے کوئی عقلمند انسان بے خوف نہیں رہ سکتا ہاں جسے اللہ امن دے اور یہ لوگ اپنی شرمگاہوں کو حرام کاری سے روکتے ہیں جہاں اللہ کی اجازت نہیں اس جگہ سے بچاتے ہیں، ہاں اپنی بیویوں اور اپنی ملکیت کی لونڈیوں سے اپنی خواہش پوری کرتے ہیں سو اس میں ان پر کوئی ملامت اور عیب نہیں، لیکن جو شخص ان کے علاوہ اور جگہ یا اور طرح اپنی شہوت رانی کر لے وہ یقیناً حدود اللہ سے تجاوز کرنے والا ہے۔ ان دونوں آیتوں کی پوری تفسیر «‏‏‏‏قَدْ اَفْلَحَ الْمُؤْمِنُوْنَ» ۱؎ [23-المؤمنون:1] ‏‏‏‏ میں گزر چکی ہے یہاں دوبارہ لانے کی ضرورت نہیں۔ یہ لوگ امانت کے ادا کرنے والے وعدوں اور وعیدوں قول اور قرار کو پورا کرنے والے اور اچھی طرح نباہنے والے ہیں، نہ خیانت کریں نہ بدعہدی اور وعدہ شکنی کریں۔ یہ کل صفتیں مومنوں کی ہیں اور ان کا خلاف کرنے والا منافق ہے۔ جیسے کہ صحیح حدیث میں ہے { منافق کی تین خصلتیں ہیں جب کبھی بات کرے جھوٹ بولے، جب کبھی وعدہ کرے خلاف کرے، جب امانت دیا جائے خیانت کرے } ـ ۱؎ [صحیح بخاری:33] ‏‏‏‏ اور ایک روایت میں { جب کبھی عہد کرے توڑ دے اور جب بھی جھگڑے گالیاں بولے }۔ ۱؎ [صحیح بخاری:33] ‏‏‏‏ یہ اپنی شہادتوں کی بھی حفاظت کرنے والے ہیں ‘ یعنی نہ اس میں کمی کریں نہ زیادتی نہ شہادت دینے سے بھاگیں نہ اسے چھپائیں، «وَمَنْ يَكْتُمْهَا فَإِنَّهُ آثِمٌ قَلْبُهُ» ’ جو چھپا لے وہ گنہگار دل والا ہے ‘۔ ۱؎ [2-البقرة:283] ‏‏‏‏

پھر فرمایا ’ وہ اپنی نماز کی پوری چوکسی کرتے ہیں ‘ یعنی وقت پر ارکان اور واجبات اور مستجات کو پوری طرح بجا لا کر نماز پڑھتے ہیں، یہاں یہ بات خاص توجہ کے لائق ہے کہ ان جنتیوں کے اوصاف بیان کرتے ہوئے شروع وصف میں بھی نماز کی ادائیگی کا بیان کیا اور ختم بھی اسی پر کیا پس معلوم ہوا کہ نماز امر دین میں عظیم الشان کام ہے اور سب سے زیادہ شرافت اور فضیلت والی چیز بھی یہی ہے اس کا ادا کرنا سخت ضروری ہے اور اس کا بندوبست نہایت ہی تاکید والا ہے۔ سورۃ «‏‏‏‏قَدْ اَفْلَحَ الْمُؤْمِنُوْنَ» ۱؎ [23-المؤمنون:1] ‏‏‏‏ میں بھی ٹھیک اسی طرح بیان ہوا ہے اور وہاں ان اوصاف کے بعد بیان فرمایا ہے کہ ’ یہی لوگ ہمیشہ ہمیشہ کے لیے وارث فردوس ہیں ‘ اور یہاں فرمایا ’ یہی لوگ جنتی ہیں اور قسم قسم کی لذتوں اور خوشبوؤں سے عزت و اقبال کے ساتھ مسرور و محفوظ ہیں ‘۔

الركوع السابق → السورة كاملة ← الركوع التالي (2)