سیدنا ابوہریرہ رضی اللہ عنہ نے کہا: رسول اللہ صلی اللہ علیہ و آلہ وسلم کے پاس ایک شخص آیا اور کہنے لگا: میں تباہ و برباد ہو گیا، آپ صلی اللہ علیہ و آلہ وسلم نے فرمایا: ”کس چیز نے تمہیں تباہ کیا؟“ عرض کیا: میں نے اپنی بیوی سے ماہ رمضان میں صحبت کر لی۔ آپ صلی اللہ علیہ و آلہ وسلم نے فرمایا: ”ایک غلام آزاد کر دو“، عرض کیا: مجھے اس کی طاقت نہیں، آپ صلی اللہ علیہ و آلہ وسلم نے فرمایا: ”تو دو مہینے لگاتار روزے رکھ لو“، عرض کیا: اتنی استطاعت بھی نہیں، فرمایا: ”اچھا ساٹھ مسکینوں کو کھانا کھلا دو“، عرض کیا: میرے پاس کھانا نہیں ہے۔ سیدنا ابوہریرہ رضی اللہ عنہ نے کہا: اچانک رسول اللہ صلی اللہ علیہ و آلہ وسلم کے پاس ایک بڑی تھیلی لائی گئی جس میں کھجوریں تھیں، آپ صلی اللہ علیہ و آلہ وسلم نے دریافت کیا کہ ”وہ سائل پوچھنے والا کدھر ہے؟“ پھر آپ صلی اللہ علیہ و آلہ وسلم نے اس سے کہا: ”جاؤ اس کو صدقہ کر دو“، عرض کیا: اے اللہ کے رسول! کیا اپنے اہل سے زیادہ محتاج پر صدقہ کر دوں؟ قسم اللہ کی ان دونوں پتھریلے میدانوں کے درمیان کوئی بھی گھرانہ میرے گھر سے زیادہ محتاج نہیں، رسول اللہ صلی اللہ علیہ و آلہ وسلم ہنس پڑے یہاں تک کہ آپ کے دانت دیکھے جا سکے، فرمایا: ”ایسا ہے تو جاؤ تم ہی اسے لے جاؤ۔“ [سنن دارمي/من كتاب الصوم/حدیث: 1754]

اس سند سے سیدنا ابوہریرہ رضی اللہ عنہ نے روایت کیا کہ ایک آدمی نے رمضان میں روزہ توڑ دیا .... «فذكر الحديث» ۔ [سنن دارمي/من كتاب الصوم/حدیث: 1755]

سیدہ عائشہ رضی اللہ عنہا فرماتی ہیں کہ ایک آدمی نے نبی کریم صلی اللہ علیہ و آلہ وسلم سے عرض کیا کہ میں تو (جہنم کی آگ میں) جل گیا، آپ صلی اللہ علیہ و آلہ وسلم نے اس سے پوچھا: ”کیا ماجرا ہے؟“ تو اس نے آپ صلی اللہ علیہ و آلہ وسلم کو بتایا کہ اس نے رمضان میں اپنی بیوی سے صحبت کر لی ہے، پھر رسول اللہ صلی اللہ علیہ و آلہ وسلم کے پاس ایک تھیلی لائی گئی جس کو عذق (یا عروق) کہا جاتا تھا، اس میں کھجوریں تھیں، آپ صلی اللہ علیہ و آلہ وسلم نے فرمایا: ”جلنے والا کہاں ہے؟“ وہ آدمی کھڑا ہوا تو آپ صلی اللہ علیہ و آلہ وسلم نے فرمایا: ”اس کو صدقہ کر دو۔“ [سنن دارمي/من كتاب الصوم/حدیث: 1756]