سیدنا عبداللہ بن عمر رضی اللہ عنہما بیان کرتے ہیں: نبی کریم صلی اللہ علیہ و آلہ وسلم خانہ کعبہ کے اندر تشریف لے گئے، پھر آپ صلی اللہ علیہ و آلہ وسلم باہر تشریف لائے، سیدنا بلال رضی اللہ عنہ آپ صلی اللہ علیہ و آلہ وسلم کے پیچھے تھے، میں نے سیدنا بلال رضی اللہ عنہ سے دریافت کیا: کیا نبی کریم صلی اللہ علیہ و آلہ وسلم نے (خانہ کعبہ کے اندر) نماز ادا کی ہے؟ انہوں نے جواب دیا: نہیں! راوی بیان کرتے ہیں: اگلے دن نبی کریم صلی اللہ علیہ و آلہ وسلم پھر خانہ کعبہ کے اندر تشریف لے گئے، میں نے پھر سیدنا بلال رضی اللہ عنہ سے دریافت کیا: کیا نبی کریم صلی اللہ علیہ و آلہ وسلم نے خانہ کعبہ کے اندر نماز ادا کی ہے؟ انہوں نے جواب دیا: جی ہاں! نبی کریم صلی اللہ علیہ و آلہ وسلم نے دو رکعت ادا کی ہیں، آپ صلی اللہ علیہ و آلہ وسلم نے درخت کے تنے کی طرف رخ کیا تھا اور دوسرے ستون کو اپنے دائیں طرف رکھا تھا۔ [سنن الدارقطني/ كِتَابُ الْعِيدَيْنِ/حدیث: 1747]

سیدنا عبداللہ بن عمر رضی اللہ عنہما بیان کرتے ہیں: نبی کریم صلی اللہ علیہ و آلہ وسلم خانہ کعبہ کے اندر گئے، آپ صلی اللہ علیہ و آلہ وسلم کے ساتھ سیدنا بلال رضی اللہ عنہ بھی تھے، راوی بیان کرتے ہیں: ہم نے سیدنا بلال رضی اللہ عنہ سے اس بارے میں دریافت کیا، تو انہوں نے ہمیں بتایا: نبی کریم صلی اللہ علیہ و آلہ وسلم نے دو ستونوں کے درمیان نماز ادا کی ہے۔ [سنن الدارقطني/ كِتَابُ الْعِيدَيْنِ/حدیث: 1748]

سیدنا عبداللہ بن عباس رضی اللہ عنہما بیان کرتے ہیں: نبی کریم صلی اللہ علیہ و آلہ وسلم خانہ کعبہ کے اندر تشریف لے گئے، آپ صلی اللہ علیہ و آلہ وسلم نے دو ستونوں کے درمیان دو رکعت ادا کیں، پھر آپ باہر تشریف لائے اور آپ صلی اللہ علیہ و آلہ وسلم نے خانہ کعبہ کے دروازے اور حجر اسود کے درمیان دو رکعت ادا کی، پھر آپ نے ارشاد فرمایا: ”یہ قبلہ ہے۔“ اس کے بعد آپ دوسری مرتبہ خانہ کعبہ کے اندر تشریف لے گئے، تو آپ صلی اللہ علیہ و آلہ وسلم نے اس کے اندر کھڑے ہو کر دعا مانگی اور باہر تشریف لے آئے (اس مرتبہ آپ صلی اللہ علیہ و آلہ وسلم نے خانہ کعبہ کے اندر نماز ادا نہیں کی)۔ [سنن الدارقطني/ كِتَابُ الْعِيدَيْنِ/حدیث: 1749]