سیدنا سمرہ بن جندب رضی اللہ عنہ سے منقول ہے کہ ایک مرتبہ وہ خطبہ دینے کے لیے کھڑے ہوئے، تو انہوں نے اپنے خطبے کے دوران نبی اکرم صلی اللہ علیہ و آلہ وسلم کے حوالے سے حدیث بیان کی، سیدنا سمرہ رضی اللہ عنہ نے یہ بات بیان کی کہ ایک مرتبہ میں اور انصار سے تعلق رکھنے والا ایک لڑکا نبی اکرم صلی اللہ علیہ و آلہ وسلم کے زمانہ اقدس میں نشانے بازی کر رہے تھے، اسی دوران سورج طلوع ہوا تو وہ دیکھنے والے کو ایک نیزے جتنا یا دو نیزے جتنا محسوس ہو رہا تھا، باقی سیاہ تھا، ہم میں سے ایک نے اپنے ساتھی سے کہا: ہم اللہ کے رسول کی مسجد کی طرف چلتے ہیں، اللہ کی قسم! سورج کی یہ حالت نبی اکرم صلی اللہ علیہ و آلہ وسلم کی امت کے لیے کوئی نیا حکم لے کر آئے گی، ہم لوگ مسجد کی طرف آئے، تو نبی اکرم صلی اللہ علیہ و آلہ وسلم اس وقت گھر سے تشریف لائے تھے، آپ صلی اللہ علیہ و آلہ وسلم کھڑے ہوئے، نماز ادا کرنا شروع کی، آپ صلی اللہ علیہ و آلہ وسلم نے ہمیں نماز پڑھائی اور آپ صلی اللہ علیہ و آلہ وسلم نے ہمیں جتنی بھی نمازیں پڑھائی تھیں وہ ان میں سے سب سے طویل تھی، ہم نے آپ صلی اللہ علیہ و آلہ وسلم کی آواز نہیں سنی، پھر آپ صلی اللہ علیہ و آلہ وسلم کھڑے ہوئے اور آپ صلی اللہ علیہ و آلہ وسلم نے دوسری رکعت بھی اسی طرح ادا کی، پھر جب آپ صلی اللہ علیہ و آلہ وسلم بیٹھے تو آپ صلی اللہ علیہ و آلہ وسلم کے بیٹھنے کے دوران ہی گرہن ختم ہو گیا، آپ صلی اللہ علیہ و آلہ وسلم نے سلام پھیرا، نماز مکمل کی، پھر اللہ تعالیٰ کی حمد و ثناء بیان کی اور اس بات کی گواہی دی کہ «لَا إِلٰهَ إِلَّا اللّٰهُ وَأَنَّ مُحَمَّدًا عَبْدُهُ وَرَسُولُهُ» ”اللہ تعالیٰ کے علاوہ اور کوئی معبود نہیں اور محمد صلی اللہ علیہ و آلہ وسلم اللہ کے بندے اور رسول ہیں“ پھر آپ صلی اللہ علیہ و آلہ وسلم نے ارشاد فرمایا: ”اے لوگو! میں ایک انسان ہوں، جسے رسول کے طور پر مبعوث کیا گیا، میں تمہیں اللہ کا واسطہ دے کر پوچھتا ہوں، اگر تم لوگ یہ بات جانتے ہو کہ میں نے اپنے پروردگار کے پیغام کی تبلیغ میں کوئی کوتاہی کی ہے، تو تم مجھے اس بارے میں بتاؤ۔“ لوگوں نے عرض کی: ہم اس بات کی گواہی دیتے ہیں کہ آپ صلی اللہ علیہ و آلہ وسلم نے اپنے پروردگار کے پیغام کو پہنچا دیا ہے اور اپنی امت کی خیر خواہی کی ہے اور جو چیز آپ صلی اللہ علیہ و آلہ وسلم کے ذمے تھی آپ صلی اللہ علیہ و آلہ وسلم نے اسے ادا کر دیا ہے، پھر نبی اکرم صلی اللہ علیہ و آلہ وسلم نے ارشاد فرمایا: ”کچھ لوگ یہ سمجھتے ہیں کہ سورج کا گرہن ہونا، چاند کا گرہن یا ان ستاروں کا اپنے مطلع سے گرنا زمین سے تعلق رکھنے والے کسی بڑے آدمی کے انتقال کی وجہ سے ہوتا ہے، یہ لوگ غلط سمجھتے ہیں، بلکہ یہ اللہ کی نشانیاں ہیں، جن کے ذریعے اللہ تعالیٰ اپنے بندوں کو عبرت دلاتا ہے تاکہ وہ لوگ توبہ کی طرف آئیں۔ اللہ کی قسم! تم نے اپنے دنیا اور آخرت کے معاملے میں جس بھی صورت حال کا سامنا کرنا ہے وہ میں نے ابھی یہاں نماز ادا کرنے کے دوران کھڑے ہوئے دیکھ لی ہے، اللہ کی قسم! قیامت اس وقت تک قائم نہیں ہو گی جب تک تم میں تیس کذابوں کا ظہور نہیں ہو گا، جن میں سے ایک کانا دجال ہو گا، اس کی بائیں آنکھ نہیں ہو گی، وہ ابو تحییٰ کی آنکھ کی مانند ہو گی (یہ انصار کا ایک بوڑھا تھا، اس کے اور سیدہ عائشہ رضی اللہ عنہا کے حجرے کے درمیان ایک لکڑی تھی) دجال کا جب بھی ظہور ہو گا، تو وہ یہی دعویٰ کرے گا کہ وہ اللہ ہے، اور جو اس کی تصدیق کرے گا اور پیروی کرے گا، تو اس کے پہلے کا کوئی بھی نیک عمل اسے فائدہ نہیں دے گا اور عنقریب دجال تمام روئے زمین پر غالب آ جائے گا، صرف حرم کی حدود اور بیت المقدس پر قبضہ نہیں کر سکے گا، وہ مسلمانوں کو بیت المقدس کی طرف جانے پر مجبور کر دے گا، وہ لوگ شدید محاصرہ کریں گے۔“ اسود نامی راوی بیان کرتے ہیں: میرا خیال ہے روایت میں یہ الفاظ بھی ہیں کہ اسی دوران سیدنا عیسیٰ بن مریم علیہ السلام ان کے درمیان آئیں گے، تو اللہ تعالیٰ دجال کو اور اس کے لشکروں کو پسپا کر دے گا، یہاں تک کہ دیوار کی بنیاد اور درخت کا تنا بھی یہ پکار کر کہیں گے: ”اے مومن! یہ کافر ہے، جو میرے پیچھے چھپا ہوا ہے، تم آگے آؤ اور اسے قتل کر دو۔“ اور ایسا اس وقت تک نہیں ہو گا، جس وقت تک تم عظیم امور نہیں دیکھو گے، جو تمہیں پریشان کر دیں گے، تم ایک دوسرے سے پوچھو گے: کیا تمہارے نبی نے اس کا ذکر تمہارے سامنے کیا تھا؟ وہ ایسی آزمائش ہو گی کہ پہاڑ اپنی جگہ سے ہل جائیں۔ نبی اکرم صلی اللہ علیہ و آلہ وسلم نے فرمایا: ”پھر اس کے بعد قبض ہوگا۔“ پھر انہوں نے اپنی انگلیوں کے کناروں کو بند کیا، پھر انہوں نے دوسری مرتبہ یہ کہا: نبی اکرم صلی اللہ علیہ و آلہ وسلم نے جو بات ارشاد فرمائی تھی وہ میں نے دیکھی ہے، پھر انہوں نے یہی چیز ذکر کی اور اس میں کوئی ایک لفظ بھی اپنی جگہ سے پہلے یا بعد میں بیان نہیں کیا۔ [صحیح ابن حبان/كِتَابُ الصَّلَاةِ/حدیث: 2856]