سیدنا ابوہریرہ رضی اللہ تعالیٰ عنہ سے روایت ہے کہ رسول اللہ صلی اللہ علیہ و آلہ وسلم نے فرمایا: ”جو شخص جمعہ کے دن غسلِ جنابت کی طرح غسل کرے، پھر مسجد میں پہلی ساعت میں پہنچے تو گویا اس نے ایک اُونٹ صدقہ دیا، اور جو جائے دوسری ساعت میں تو گویا اس نے ایک بیل یا ایک گائے کا صدقہ دیا، اور جو جائے تیسری ساعت میں تو گویا اس نے ایک سینگ دار مینڈھے کا صدقہ دیا، اور جو جائے چوتھی ساعت میں تو گویا اس نے ایک مرغ کا صدقہ دیا، اور جو جائے پانچویں ساعت میں تو گویا اس نے ایک انڈا صدقہ دیا۔ پھر جس وقت امام خطبہ کے لئے نکلتا ہے تو فرشتے خطبہ سننے آتے ہیں۔“ [موطا امام مالك رواية يحييٰ/كِتَابُ الْجُمُعَةِ/حدیث: 224]

سیدنا ابوہریرہ رضی اللہ تعالیٰ عنہ کہتے تھے: جمعہ کے دن غسل کرنا واجب ہے ہر بالغ پر مثل غسلِ جنابت کے۔ [موطا امام مالك رواية يحييٰ/كِتَابُ الْجُمُعَةِ/حدیث: 225]

حضرت سالم بن عبداللہ سے روایت ہے، انہوں نے کہا: رسول اللہ صلی اللہ علیہ و آلہ وسلم کے اصحاب میں سے ایک شخص جمعہ کے دن مسجد میں آئے اور سیدنا عمر بن خطاب رضی اللہ تعالیٰ عنہ خطبہ پڑھ رہے تھے، تو سیدنا عمر رضی اللہ تعالیٰ عنہ بولے: ”کیا وقت ہے یہ آنے کا؟“ اس شخص نے جواب دیا: میں بازار سے پھرا تو میں نے اذان سنی، پس میں نے وضو کیا اور چلا آیا، تو سیدنا عمر رضی اللہ تعالیٰ عنہ نے فرمایا: یہ دوسرا قصور ہے تم نے صرف وضو کیا، حالانکہ تم کو معلوم ہے کہ رسول اللہ صلی اللہ علیہ و آلہ وسلم غسل کا حکم فرماتے تھے۔ [موطا امام مالك رواية يحييٰ/كِتَابُ الْجُمُعَةِ/حدیث: 226]

سیدنا ابوسعید خدری رضی اللہ تعالیٰ عنہ سے روایت ہے کہ رسول اللہ صلی اللہ علیہ و آلہ وسلم نے فرمایا: ”جمعہ کا غسل واجب ہے ہر بالغ شخص پر۔“ [موطا امام مالك رواية يحييٰ/كِتَابُ الْجُمُعَةِ/حدیث: 227]

سیدنا عبداللہ بن عمر رضی اللہ تعالیٰ عنہما سے روایت ہے کہ رسول اللہ صلی اللہ علیہ و آلہ وسلم نے فرمایا: ”جو شخص جمعہ کو آئے تو غسل کر کے آئے، یا جو شخص نمازِ جمعہ کا ارادہ کرے تو غسل کرے۔“ [موطا امام مالك رواية يحييٰ/كِتَابُ الْجُمُعَةِ/حدیث: 228]