موطا امام مالک (روایۃ یحیی)

سیدنا جابر بن عبداللہ انصاری رضی اللہ عنہ سے روایت ہے کہ ہم رسول اللہ صلی اللہ علیہ و آلہ وسلم کے ساتھ نکلے غزوہ بن انمار(1) میں، تو ہم ایک درخت کے تلے اترے ہوئے تھے، اتنے میں رسول اللہ صلی اللہ علیہ و آلہ وسلم دکھائی دیئے، میں نے کہا: یا رسول اللہ صلی اللہ علیہ و آلہ وسلم ! سائے میں آیئے۔ آپ صلی اللہ علیہ و آلہ وسلم آکر اترے، میں اپنی زنبیل کو دیکھنے گیا، اس میں ڈھونڈنے لگا تو ایک ککڑی ملی، میں اس کو توڑ کر رسول اللہ صلی اللہ علیہ و آلہ وسلم کے سامنے لے گیا، آپ صلی اللہ علیہ و آلہ وسلم نے پوچھا: ”یہ کہاں سے آئی؟“ سیدنا جابر رضی اللہ عنہ نے کہا: یا رسول اللہ صلی اللہ علیہ و آلہ وسلم ! مدینہ سے ہم اس کو لے کر نکلے تھے، پھر سیدنا جابر رضی اللہ عنہ کہتے ہیں: ہمارے ساتھ ایک شخص تھا جس کا سامانِ سفر ہم نے کر دیا تھا، وہ ہمارے جانور چراتا تھا، جب وہ پیٹھ موڑ کر جانور چرانے جانے لگا تو وہ چادریں اوڑھے ہوئے تھا جو پھٹ کر چندی چندی (پرانی) ہوگئی تھیں۔ رسول اللہ صلی اللہ علیہ و آلہ وسلم نے اس کو دیکھ کر فرمایا: ”کیا اور کپڑے اس کے پاس نہیں ہیں؟“ سیدنا جابر رضی اللہ عنہ نے کہا: یا رسول اللہ صلی اللہ علیہ و آلہ وسلم ! ہیں، گٹھری میں بندھے ہیں، میں نے اس کو پہننے کے لئے دئیے ہیں۔ آپ صلی اللہ علیہ و آلہ وسلم نے فرمایا: ”اس سے کہو کہ وہ کپڑے پہن لے۔“ میں نے اس کو بلایا، اس نے وہ کپڑے گٹھری سے نکال کر پہن لئے، جب پھر جانے لگا تو رسول اللہ صلی اللہ علیہ و آلہ وسلم نے فرمایا: ”اس کو کیا ہوگیا تھا (جو کپڑے موجود ہوتے ہوئے پھٹی پرانی چادریں اوڑھے ہوئے تھا)، اللہ اس کی گردن مارے، اب کیا اچھا معلوم نہیں ہوتا اس کو۔“ اس شخص نے یہ سن کر کہا: یا رسول اللہ صلی اللہ علیہ و آلہ وسلم ! کیا اللہ کی راہ میں میری گردن ماری جائے؟ آپ صلی اللہ علیہ و آلہ وسلم نے فرمایا: ”ہاں، اللہ کی راہ میں۔“ پھر وہ شخص شہید ہوا اللہ کی راہ میں(2)۔ [موطا امام مالك رواية يحييٰ/كِتَابُ الْجَامِعِ/حدیث: 1646]