سیدنا عبداللہ بن عباس رضی اللہ عنہما سے روایت ہے کہ سیدہ ام ہانی بنت ابی طالب رضی اللہ عنہا نے فرمایا: رسول اللہ صلی اللہ علیہ و آلہ وسلم نے مجھ سے دریافت فرمایا: ”کیا تمہارے پاس کھانے کے لیے کچھ ہے؟“ اور آپ صلی اللہ علیہ و آلہ وسلم بھوکے تھے، میں نے عرض کیا: میرے پاس روٹی کے چند خشک ٹکڑے ہیں اور مجھے آپ صلی اللہ علیہ و آلہ وسلم کے سامنے وہ پیش کرتے ہوئے شرم محسوس ہوتی ہے، آپ صلی اللہ علیہ و آلہ وسلم نے فرمایا: ”انہیں لے آؤ“، تو میں نے وہ ٹکڑے توڑے اور ان پر نمک چھڑک دیا، آپ صلی اللہ علیہ و آلہ وسلم نے فرمایا: ”کیا کوئی سالن ہے؟“ میں نے عرض کیا: یا رسول اللہ! میرے پاس سرکے کے سوا کچھ نہیں، آپ صلی اللہ علیہ و آلہ وسلم نے فرمایا: ”وہی لے آؤ“، جب میں وہ لے آئی تو آپ صلی اللہ علیہ و آلہ وسلم نے اسے کھانے پر ڈالا اور اسے تناول فرمایا، پھر اللہ تعالیٰ کی حمد بیان کی اور فرمایا: ”اے ام ہانی! سرکہ کتنا ہی بہترین سالن ہے، وہ گھر کبھی محتاج نہ ہوگا جس میں سرکہ موجود ہو۔“
عبداللہ بن عمر بن خطاب رضی اللہ عنہما نے بھی ام ہانی سے روایت کی ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7049]

سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ و آلہ وسلم سیدہ ام ہانی رضی اللہ عنہا کے پاس تشریف لائے اور وہاں ایک مشکیزہ لٹکا ہوا تھا، تو آپ صلی اللہ علیہ و آلہ وسلم نے کھڑے ہو کر (اس سے) پانی نوش فرمایا۔
ام ہانی رضی اللہ عنہا کی اولاد نے بھی اپنے آباء کے واسطے سے ان کی احادیث روایت کی ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7050]