سیدنا انس بن مالک رضی اللہ عنہ سے روایت ہے کہ جب نبی کریم صلی اللہ علیہ و آلہ وسلم نے خیبر فتح کیا تو آپ صلی اللہ علیہ و آلہ وسلم نے سیدہ صفیہ بنت حیی رضی اللہ عنہا کو اپنے لیے منتخب فرما لیا، آپ صلی اللہ علیہ و آلہ وسلم انہیں اپنے پیچھے سواری پر بٹھا کر نکلے، سیدنا انس کہتے ہیں کہ میں نے دیکھا کہ رسول اللہ صلی اللہ علیہ و آلہ وسلم اپنا پاؤں رکھتے تاکہ وہ اس پر قدم رکھ کر سوار ہو سکیں، جب آپ صلی اللہ علیہ و آلہ وسلم مقام سد الصہباء پہنچے تو وہاں رات گزاری اور چمڑے کے دسترخوان پر ”حیس“ (کھجور، پنیر اور گھی کا مجموعہ) تیار کیا اور مجھے حکم دیا تو میں نے آس پاس کے لوگوں کو دعوت دی، یہی رسول اللہ صلی اللہ علیہ و آلہ وسلم کا ولیمہ تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6953]

سیدنا ابوہریرہ رضی اللہ عنہ سے روایت ہے کہ جب رسول اللہ صلی اللہ علیہ و آلہ وسلم نے سیدہ صفیہ رضی اللہ عنہا کے ساتھ شب باشی فرمائی تو سیدنا ابو ایوب انصاری رضی اللہ عنہ نے تلوار تھام کر نبی کریم صلی اللہ علیہ و آلہ وسلم کے دروازے پر پہرہ دیتے ہوئے رات گزاری، جب صبح ہوئی اور انہوں نے رسول اللہ صلی اللہ علیہ و آلہ وسلم کو دیکھا تو نعرہ تکبیر بلند کیا، آپ صلی اللہ علیہ و آلہ وسلم نے پوچھا کہ یہ کیا ہے؟ تو انہوں نے عرض کی: یا رسول اللہ، یہ ایک ایسی نوجوان خاتون تھیں جن کا ابھی نیا نکاح ہوا تھا جبکہ آپ نے ان کے والد، بھائی اور شوہر کو قتل کیا تھا، اس لیے میں ان کی طرف سے آپ کی جان کے بارے میں مطمئن نہ تھا، یہ سن کر رسول اللہ صلی اللہ علیہ و آلہ وسلم مسکرا دیے اور ان کے حق میں کلمات خیر فرمائے۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6954]