خیثمہ بن ابی سبرہ جعفی سے روایت ہے، انہوں نے کہا: میں مدینہ آیا تو میں نے اللہ سے دعا کی کہ وہ مجھے کوئی نیک ہم نشین عطا فرمائے، تو اللہ نے میرے لیے سیدنا ابوہریرہ رضی اللہ عنہ کو میسر فرما دیا، میں ان کے پاس بیٹھ گیا اور کہا: میں نے اللہ سے نیک ساتھی کی دعا کی تھی تو اس نے مجھے آپ سے ملوا دیا، انہوں نے مجھ سے پوچھا: تم کہاں سے ہو؟ میں نے کہا: کوفہ کی سرزمین سے، میں علم اور خیر کی تلاش میں آیا ہوں، تو انہوں نے فرمایا: ”کیا تمہارے درمیان سیدنا سعد بن مالک (سعد بن ابی وقاص) نہیں ہیں جن کی دعا قبول ہوتی ہے، اور عبداللہ بن مسعود جو رسول اللہ صلی اللہ علیہ و آلہ وسلم کے وضو کے پانی اور نعلین مبارک کے نگران تھے، اور حذیفہ بن یمان جو رسول اللہ صلی اللہ علیہ و آلہ وسلم کے رازدار تھے، اور عمار بن یاسر جنہیں اللہ نے اپنے نبی صلی اللہ علیہ و آلہ وسلم کی زبانِ مبارک سے شیطان سے پناہ (امان) عطا فرمائی تھی، اور سلمان (فارسی) جو دو کتابوں کے عالم تھے؟“ قتادہ کہتے ہیں کہ دو کتابوں سے مراد انجیل اور قرآن مجید (فرقان) ہیں۔
اس حدیث کی سند صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5783]

سیدنا عبداللہ بن مسعود رضی اللہ عنہ سے روایت ہے کہ نبی کریم صلی اللہ علیہ و آلہ وسلم نے فرمایا: ”عمار (کے رگ و ریشے اور) ہڈیوں کے جوڑوں تک ایمان بھرا ہوا ہے۔“
یہ حدیث شیخین کی شرط پر صحیح ہے، اگر محمد بن ابی یعقوب نے اسے عبدالرحمن بن مہدی سے (صحیح طرح) محفوظ رکھا ہو۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5784]