سیدنا عبداللہ بن ابی رزین اپنے والد ابو رزین سے اور وہ سیدنا علی رضی اللہ عنہ سے روایت کرتے ہیں، انہوں نے کہا: میں نے عباس رضی اللہ عنہ سے کہا: آپ نبی کریم صلی اللہ علیہ و آلہ وسلم سے درخواست کریں کہ وہ آپ کو صدقے (کی وصولی) پر مقرر فرما دیں۔ چنانچہ انہوں نے آپ صلی اللہ علیہ و آلہ وسلم سے درخواست کی، تو آپ صلی اللہ علیہ و آلہ وسلم نے فرمایا: ”میں آپ کو لوگوں کے گناہوں کے دھوون (یعنی زکوٰۃ و صدقات) پر مقرر کرنے والا نہیں ہوں۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5518]

اسی سابقہ سند کے ساتھ سیدنا علی رضی اللہ عنہ سے روایت ہے، انہوں نے کہا: میں نے عباس رضی اللہ عنہ سے کہا: ہمارے لیے نبی کریم صلی اللہ علیہ و آلہ وسلم سے (کعبہ کی) دربانی طلب کریں۔ تو آپ صلی اللہ علیہ و آلہ وسلم نے فرمایا: ”میں تمہیں اس سے بہتر چیز دیتا ہوں، یعنی (حاجیوں کو) پانی پلانا، اس میں تم مال خرچ کرو گے اور اس سے کماؤ گے نہیں۔“
یہ دونوں حدیثیں صحیح الاسناد ہیں لیکن شیخین نے انہیں روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5519]

حجیۃ بن عدی سیدنا علی رضی اللہ عنہ سے روایت کرتے ہیں کہ سیدنا عباس بن عبدالمطلب رضی اللہ عنہ نے رسول اللہ صلی اللہ علیہ و آلہ وسلم سے اپنا صدقہ (زکوٰۃ) اس کا وقت مقرر ہونے سے پہلے (پیشگی) ادا کرنے کے بارے میں دریافت کیا، تو آپ صلی اللہ علیہ و آلہ وسلم نے انہیں اس کی اجازت دے دی۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5520]