ام المومنین سیدہ میمونہ رضی اللہ عنہا سے روایت ہے کہ میری ایک لونڈی تھی جسے میں نے آزاد کر دیا، پھر رسول اللہ صلی اللہ علیہ و آلہ وسلم میرے پاس تشریف لائے تو میں نے آپ صلی اللہ علیہ و آلہ وسلم کو اس کی خبر دی، آپ صلی اللہ علیہ و آلہ وسلم نے فرمایا: ”اللہ تمہیں اس کا اجر دے، لیکن اگر تم وہ لونڈی اپنے ننھیال (ماموں وغیرہ) کو دے دیتیں تو یہ تمہارے اجر کے لحاظ سے زیادہ بڑی بات ہوتی۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الزَّكَاةِ/حدیث: 1527]

سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ و آلہ وسلم نے صدقہ کا حکم دیا، تو ایک شخص نے عرض کیا: ”اے اللہ کے رسول! میرے پاس ایک دینار ہے“، آپ صلی اللہ علیہ و آلہ وسلم نے فرمایا: ”اسے اپنی ذات پر خرچ کرو“، اس نے عرض کیا: ”میرے پاس ایک اور ہے“، آپ صلی اللہ علیہ و آلہ وسلم نے فرمایا: ”اسے اپنے بچے پر خرچ کرو“، اس نے عرض کیا: ”میرے پاس ایک اور ہے“، آپ صلی اللہ علیہ و آلہ وسلم نے فرمایا: ”اسے اپنی بیوی پر خرچ کرو“، اس نے عرض کیا: ”میرے پاس ایک اور ہے“، آپ صلی اللہ علیہ و آلہ وسلم نے فرمایا: ”اسے اپنے خادم پر خرچ کرو“، اس نے عرض کیا: ”میرے پاس ایک اور ہے“، آپ صلی اللہ علیہ و آلہ وسلم نے فرمایا: ”تم خود زیادہ بہتر جانتے ہو (کہ اسے کہاں خرچ کرنا ہے)۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الزَّكَاةِ/حدیث: 1528]