اشعث بن عبدالملک حمرانی، حسن سے اور وہ سیدنا ابوبکرہ رضی اللہ عنہ سے روایت کرتے ہیں کہ: ”نبی کریم صلی اللہ علیہ و آلہ وسلم نے خوف کی حالت میں لوگوں کو مغرب کی نماز تین رکعتیں پڑھائیں، پھر آپ صلی اللہ علیہ و آلہ وسلم پھر گئے، اور دوسرے لوگ آئے تو آپ صلی اللہ علیہ و آلہ وسلم نے انہیں (بھی) تین رکعتیں پڑھائیں۔“ میں نے ابوعلی حافظ کو فرماتے ہوئے سنا: ”یہ حدیث غریب ہے، اشعث حمرانی نے اسے صرف اسی سند کے ساتھ لکھا ہے۔“ امام حاکم نے فرمایا: ”اور یہ شیخین کی شرط پر صحیح ہے۔“ [المستدرك على الصحيحين/كِتَابُ صَلَاةِ الْخَوْفِ/حدیث: 1266]

مجاہد، ابوعیاش زرقی رضی اللہ عنہ سے روایت کرتے ہیں، انہوں نے فرمایا: ہم عسفان میں رسول اللہ صلی اللہ علیہ و آلہ وسلم کے ساتھ تھے اور مشرکین کی قیادت خالد بن ولید کر رہے تھے، پس ہم نے ظہر کی نماز پڑھی تو مشرکین نے کہا: ہم نے ایک موقع گنوا دیا، ہم نے ایک غفلت کا لمحہ گنوا دیا، کاش ہم ان پر اس وقت حملہ کرتے جب وہ نماز میں تھے! تو ظہر اور عصر کے درمیان نماز قصر (خوف) کی آیت نازل ہوئی، پس جب عصر کا وقت ہوا تو رسول اللہ صلی اللہ علیہ و آلہ وسلم قبلہ رخ کھڑے ہوئے اور مشرکین آپ صلی اللہ علیہ و آلہ وسلم کے سامنے تھے، تو رسول اللہ صلی اللہ علیہ و آلہ وسلم کے پیچھے ایک صف بنی اور اس صف کے پیچھے ایک اور صف بنی، پھر رسول اللہ صلی اللہ علیہ و آلہ وسلم نے رکوع کیا تو ان سب نے رکوع کیا، پھر آپ صلی اللہ علیہ و آلہ وسلم نے سجدہ کیا تو وہ صف جس نے آپ صلی اللہ علیہ و آلہ وسلم کے ساتھ رکوع کیا تھا اس نے سجدہ کیا جبکہ دوسرے کھڑے ہو کر ان کی حفاظت کرتے رہے، پس جب ان لوگوں نے دو سجدے کر لیے اور کھڑے ہو گئے تو ان کے پیچھے والوں نے سجدہ کیا، پھر ساتھ والی صف پیچھے ہٹ کر دوسروں کی جگہ چلی گئی اور پچھلی صف آگے آ کر پہلی صف کی جگہ آ گئی، پھر رسول اللہ صلی اللہ علیہ و آلہ وسلم نے رکوع کیا تو ان سب نے رکوع کیا، پھر آپ صلی اللہ علیہ و آلہ وسلم کے ساتھ والی صف نے سجدہ کیا اور دوسرے کھڑے ہو کر ان کی حفاظت کرتے رہے، پس جب رسول اللہ صلی اللہ علیہ و آلہ وسلم اور آپ صلی اللہ علیہ و آلہ وسلم کے ساتھ والی صف بیٹھ گئی تو دوسروں نے سجدہ کیا، پھر وہ سب بیٹھ گئے تو آپ صلی اللہ علیہ و آلہ وسلم نے ان سب پر سلام پھیرا، پس آپ صلی اللہ علیہ و آلہ وسلم نے یہ نماز عسفان میں بھی پڑھی اور بنو سلیم کے دن بھی پڑھی۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ صَلَاةِ الْخَوْفِ/حدیث: 1267]

ابوالاسود سے روایت ہے کہ انہوں نے عروہ بن زبیر کو مروان بن حکم سے بیان کرتے ہوئے سنا، انہوں نے سیدنا ابوہریرہ رضی اللہ عنہ سے پوچھا: کیا آپ نے رسول اللہ صلی اللہ علیہ و آلہ وسلم کے ساتھ نماز خوف پڑھی ہے؟ سیدنا ابوہریرہ رضی اللہ عنہ نے فرمایا: ”ہاں۔“ مروان نے پوچھا: کب؟ تو سیدنا ابوہریرہ رضی اللہ عنہ نے فرمایا: ”غزوہ نجد کے سال؛ رسول اللہ صلی اللہ علیہ و آلہ وسلم نماز، یعنی نماز عصر کے لیے کھڑے ہوئے، تو ایک گروہ آپ صلی اللہ علیہ و آلہ وسلم کے ساتھ کھڑا ہوا اور دوسرا گروہ دشمن کے سامنے کھڑا ہوا جبکہ ان کی پیٹھ قبلے کی طرف تھی، پس رسول اللہ صلی اللہ علیہ و آلہ وسلم نے تکبیر کہی تو ان سب نے تکبیر کہی، ان لوگوں نے بھی جو آپ صلی اللہ علیہ و آلہ وسلم کے ساتھ تھے اور انہوں نے بھی جو دشمن کے سامنے تھے، پھر رسول اللہ صلی اللہ علیہ و آلہ وسلم نے ایک رکعت میں رکوع کیا تو آپ صلی اللہ علیہ و آلہ وسلم کے پیچھے والے گروہ نے بھی رکوع کیا، پھر آپ صلی اللہ علیہ و آلہ وسلم نے سجدہ کیا تو آپ صلی اللہ علیہ و آلہ وسلم کے ساتھ والے گروہ نے بھی سجدہ کیا، جبکہ دوسرے دشمن کے سامنے کھڑے رہے، پھر رسول اللہ صلی اللہ علیہ و آلہ وسلم کھڑے ہوئے اور آپ صلی اللہ علیہ و آلہ وسلم کے ساتھ والا گروہ بھی کھڑا ہوا اور وہ دشمن کی طرف چلے گئے اور ان کے سامنے ہو گئے، اور وہ گروہ جو دشمن کے سامنے تھا وہ آیا تو انہوں نے رکوع کیا اور سجدہ کیا جبکہ رسول اللہ صلی اللہ علیہ و آلہ وسلم ویسے ہی کھڑے رہے، پھر وہ کھڑے ہوئے تو رسول اللہ صلی اللہ علیہ و آلہ وسلم نے دوسری رکعت کا رکوع کیا اور انہوں نے آپ صلی اللہ علیہ و آلہ وسلم کے ساتھ رکوع کیا، اور آپ صلی اللہ علیہ و آلہ وسلم نے سجدہ کیا تو انہوں نے آپ صلی اللہ علیہ و آلہ وسلم کے ساتھ سجدہ کیا، پھر وہ گروہ جو دشمن کے سامنے تھا وہ آیا تو انہوں نے رکوع کیا اور سجدہ کیا جبکہ رسول اللہ صلی اللہ علیہ و آلہ وسلم اور آپ صلی اللہ علیہ و آلہ وسلم کے ساتھ والے بیٹھے رہے، پھر سلام پھیرا گیا، پس رسول اللہ صلی اللہ علیہ و آلہ وسلم نے سلام پھیرا اور ان سب نے سلام پھیرا، تو رسول اللہ صلی اللہ علیہ و آلہ وسلم کی دو رکعتیں ہو گئیں، اور دونوں گروہوں میں سے ہر آدمی کی ایک ایک رکعت ہوئی۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [یہاں سے کتاب الجنائز کا آغاز ہے] [المستدرك على الصحيحين/كِتَابُ صَلَاةِ الْخَوْفِ/حدیث: 1268]