Mustadrak al-Hakim

سیدنا زید بن ارقم رضی اللہ عنہ سے روایت ہے کہ ایک شخص نبی کریم صلی اللہ علیہ و آلہ وسلم کے پاس آیا جایا کرتا تھا، اس نے آپ صلی اللہ علیہ و آلہ وسلم پر جادو کر دیا اور (دھاگے میں) گرہیں لگا دیں، پھر اس نے اسے ایک انصاری شخص کے کنویں میں ڈال دیا۔ چنانچہ آپ صلی اللہ علیہ و آلہ وسلم کے پاس دو فرشتے آپ صلی اللہ علیہ و آلہ وسلم کی عیادت کے لیے آئے، ان میں سے ایک آپ صلی اللہ علیہ و آلہ وسلم کے سرہانے بیٹھ گیا اور دوسرا قدموں کی طرف، ایک نے پوچھا: کیا آپ جانتے ہیں کہ آپ صلی اللہ علیہ و آلہ وسلم کو کیا تکلیف ہے؟ دوسرے نے کہا: فلاں شخص جو آپ صلی اللہ علیہ و آلہ وسلم کے پاس آتا تھا اس نے آپ صلی اللہ علیہ و آلہ وسلم پر گرہیں لگا کر جادو کیا ہے اور اسے فلاں انصاری کے کنویں میں پھینک دیا ہے، اگر آپ صلی اللہ علیہ و آلہ وسلم کسی کو بھیجیں تو وہ وہاں سے ان گرہوں کو نکال لائے۔ (چنانچہ ایسا ہی کیا گیا) تو دیکھا کہ وہاں کا پانی زرد ہو چکا تھا۔ راوی کہتے ہیں کہ آپ صلی اللہ علیہ و آلہ وسلم نے وہ گرہیں لیں اور انہیں کھول دیا (جس سے جادو کا اثر ختم ہو گیا)۔ وہ شخص اس کے بعد بھی نبی کریم صلی اللہ علیہ و آلہ وسلم کی خدمت میں حاضر ہوتا رہا لیکن آپ صلی اللہ علیہ و آلہ وسلم نے کبھی اس سے اس کا ذکر کیا اور نہ ہی اسے ملامت کی۔
یہ حدیث شیخین کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الْحُدُودِ/حدیث: 8273]