Mustadrak al-Hakim

عائشہ بنت طلحہ سیدہ عائشہ ام المؤمنین رضی اللہ عنہا سے روایت کرتی ہیں، انہوں نے فرمایا: میں نے اٹھنے بیٹھنے، عادات و اطوار، طرزِ زندگی اور سیرت و کردار میں فاطمہ بنت رسول اللہ رضی اللہ عنہا سے بڑھ کر کسی کو رسول اللہ صلی اللہ علیہ و آلہ وسلم کے مشابہ نہیں دیکھا۔ سیدہ عائشہ رضی اللہ عنہا فرماتی ہیں: جب وہ نبی کریم صلی اللہ علیہ و آلہ وسلم کے پاس تشریف لاتیں تو آپ صلی اللہ علیہ و آلہ وسلم ان کے لیے کھڑے ہو جاتے، ان کا بوسہ لیتے اور انہیں اپنی جگہ پر بٹھاتے، اور جب نبی کریم صلی اللہ علیہ و آلہ وسلم ان کے پاس تشریف لے جاتے تو وہ اپنی جگہ سے کھڑی ہو جاتیں، آپ صلی اللہ علیہ و آلہ وسلم کا بوسہ لیتیں اور آپ صلی اللہ علیہ و آلہ وسلم کو اپنی جگہ پر بٹھاتیں۔ پھر جب نبی کریم صلی اللہ علیہ و آلہ وسلم بیمار ہوئے تو سیدہ فاطمہ رضی اللہ عنہا حاضر ہوئیں اور آپ صلی اللہ علیہ و آلہ وسلم پر جھک کر آپ صلی اللہ علیہ و آلہ وسلم کا بوسہ لیا، پھر انہوں نے اپنا سر اٹھایا تو وہ رونے لگیں، پھر دوبارہ آپ صلی اللہ علیہ و آلہ وسلم پر جھکیں اور سر اٹھایا تو وہ ہنسنے لگیں۔ (سیدہ عائشہ رضی اللہ عنہا فرماتی ہیں) میں نے (دل میں) کہا: میں تو سمجھتی تھی کہ یہ ہماری عورتوں میں سب سے زیادہ سمجھدار ہیں، مگر یہ بھی عورتوں جیسی ہی (جذباتی) نکلیں۔ جب نبی کریم صلی اللہ علیہ و آلہ وسلم کی وفات ہو گئی تو میں نے ان سے پوچھا: میں نے دیکھا تھا کہ جب آپ نبی کریم صلی اللہ علیہ و آلہ وسلم پر جھکیں اور سر اٹھایا تو آپ روئیں، پھر دوبارہ جھکیں اور سر اٹھایا تو آپ ہنس دیں، آپ کو اس پر کس چیز نے آمادہ کیا تھا؟ انہوں نے جواب دیا: ”تب تو میں (راز) فاش کرنے والی ٹھہرتی؛ (بات یہ تھی کہ) آپ صلی اللہ علیہ و آلہ وسلم نے مجھے بتایا کہ وہ اپنی اسی بیماری میں رحلت فرما جائیں گے تو میں (یہ سن کر) رونے لگی، پھر آپ صلی اللہ علیہ و آلہ وسلم نے مجھے بتایا کہ میں آپ صلی اللہ علیہ و آلہ وسلم کے اہل خانہ میں سب سے پہلے آپ صلی اللہ علیہ و آلہ وسلم سے جا ملوں گی، تو اس وقت میں (خوشی سے) ہنس پڑی۔“
یہ حدیث شیخین کی شرط پر صحیح ہے لیکن انہوں نے اسے اس سیاق کے ساتھ روایت نہیں کیا، ان دونوں نے صرف مسروق کی سیدہ عائشہ رضی اللہ عنہا سے مروی شعبی والی حدیث پر اتفاق کیا ہے۔ [المستدرك على الصحيحين/كِتَابُ الْأَدَبِ/حدیث: 7908]