Mustadrak al-Hakim

سیدنا جابر رضی اللہ عنہ سے روایت ہے کہ ہم رسول اللہ صلی اللہ علیہ و آلہ وسلم کے ساتھ ایک غزوے میں نکلے، ایک شخص دو پھٹے پرانے کپڑوں میں نکلا جو اونٹ ہانکنا چاہتا تھا، رسول اللہ صلی اللہ علیہ و آلہ وسلم نے اس کے متعلق دریافت فرمایا: ”کیا اس کے پاس ان کے علاوہ دو (کپڑے) اور نہیں ہیں؟“ عرض کیا گیا: اس کے تھیلے میں دو نئے کپڑے موجود ہیں۔ آپ صلی اللہ علیہ و آلہ وسلم نے فرمایا: ”اس کا تھیلا میرے پاس لاؤ۔“ آپ صلی اللہ علیہ و آلہ وسلم نے اسے کھولا تو اس میں دو کپڑے تھے، آپ صلی اللہ علیہ و آلہ وسلم نے اس شخص سے فرمایا: ”یہ دونوں پکڑو اور انہیں پہن لو اور ان پھٹے پرانوں کو پھینک دو۔“ اس نے ایسا ہی کیا اور اونٹ ہانکنے لگا، رسول اللہ صلی اللہ علیہ و آلہ وسلم اس کے پیچھے اس طرح دیکھتے رہے جیسے اس کے اپنے نفس پر اس بخل سے تعجب کر رہے ہوں، پھر آپ صلی اللہ علیہ و آلہ وسلم نے فرمایا: ”اللہ تمہاری گردن مارے۔“ تو وہ شخص آپ صلی اللہ علیہ و آلہ وسلم کی طرف متوجہ ہوا اور عرض کیا: (اے اللہ کے رسول! کیا) اللہ کی راہ میں؟ تو وہ یمامہ کی جنگ میں شہید کر دیے گئے۔
یہ حدیث امام مسلم کی شرط پر صحیح ہے کیونکہ انہوں نے کئی مقامات پر ہشام بن سعد سے استدلال کیا ہے، لیکن شیخین نے اسے روایت نہیں کیا، البتہ امام مالک کے ہاں یہ حدیث زید بن اسلم کے واسطے سے سیدنا جابر رضی اللہ عنہ سے مروی ہے۔ [المستدرك على الصحيحين/كِتَابُ اللِّبَاسِ/حدیث: 7556]