Mustadrak al-Hakim

سیدنا جابر رضی اللہ عنہ سے روایت ہے کہ سیدنا طفیل بن عمرو رضی اللہ عنہ نے نبی کریم صلی اللہ علیہ و آلہ وسلم سے عرض کیا: ”کیا آپ کو ایک مضبوط قلعہ اور تحفظ کی ضرورت ہے؟ وہ قبیلہ دوس کا قلعہ ہے“، تو رسول اللہ صلی اللہ علیہ و آلہ وسلم نے انکار فرما دیا کیونکہ یہ شرف انصار کے لیے مقدر تھا۔ راوی کہتے ہیں: پھر طفیل نے ہجرت کی اور ان کی قوم کے ایک شخص نے بھی ان کے ساتھ ہجرت کی، وہ شخص بیمار ہو گیا اور گھبراہٹ (یا اسی طرح کا کوئی لفظ) کا شکار ہو کر ایک تیر کے بھالے کے پاس گیا اور اس سے اپنی انگلیوں کے جوڑ کاٹ ڈالے جس سے وہ مر گیا، پھر طفیل نے اسے خواب میں دیکھا اور پوچھا: تمہارے ساتھ کیا معاملہ ہوا؟ اس نے کہا: نبی کریم صلی اللہ علیہ و آلہ وسلم کی طرف ہجرت کی برکت سے میری مغفرت کر دی گئی، طفیل نے پوچھا: تمہارے ہاتھوں کا کیا معاملہ ہے؟ اس نے جواب دیا: مجھ سے کہا گیا کہ جس چیز کو تم نے خود بگاڑا ہے ہم اسے درست نہیں کریں گے۔ طفیل نے یہ واقعہ نبی کریم صلی اللہ علیہ و آلہ وسلم کو سنایا تو آپ صلی اللہ علیہ و آلہ وسلم نے اپنے دونوں ہاتھ اٹھا کر دعا فرمائی: «اللَّهُمَّ وَلِيَدَيْهِ فَاغْفِرْ» ”اے اللہ! اس کے ہاتھوں کی بھی مغفرت فرما۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7139]