Mustadrak al-Hakim

سیدنا انس بن مالک رضی اللہ عنہ سے روایت ہے کہ جب سیدنا عثمان کی اہلیہ سیدہ رقیہ بنت رسول اللہ صلی اللہ علیہ و آلہ وسلم کی وفات ہوئی تو سیدنا عمر بن خطاب رضی اللہ عنہ کا گزر سیدنا عثمان بن عفان رضی اللہ عنہ کے پاس سے ہوا، انہوں نے انہیں سلام کیا اور انہیں غمزدہ پایا، تو انہوں نے پوچھا: ”کیا رسول اللہ صلی اللہ علیہ و آلہ وسلم کی صاحبزادی رقیہ کی وفات نے آپ کو غمگین کر دیا ہے؟ کیا آپ (میری صاحبزادی) حفصہ بنت عمر سے نکاح کرنا چاہیں گے؟“ انہوں نے کوئی جواب نہ دیا، چنانچہ سیدنا عمر رضی اللہ عنہ نبی کریم صلی اللہ علیہ و آلہ وسلم کی خدمت میں حاضر ہوئے اور آپ کو مطلع کیا، تو رسول اللہ صلی اللہ علیہ و آلہ وسلم نے فرمایا: ”اے عمر! شاید اللہ تعالیٰ تمہیں ایسا داماد عطا فرمائے جو تمہارے لیے عثمان سے بہتر ہو (یعنی میں خود)۔“ پھر رسول اللہ صلی اللہ علیہ و آلہ وسلم نے عمر رضی اللہ عنہ کی صاحبزادی سے نکاح فرما لیا، اور رسول اللہ صلی اللہ علیہ و آلہ وسلم نے سیدہ ام کلثوم کا نکاح سیدنا عثمان سے کر دیا، اس سے قبل سیدنا ابوبکر اور سیدنا عمر رضی اللہ عنہما نے بھی نکاح کا پیغام دیا تھا مگر آپ صلی اللہ علیہ و آلہ وسلم نے ان سے نکاح نہیں کیا تھا، رسول اللہ صلی اللہ علیہ و آلہ وسلم نے فرمایا: ”عثمان کے لیے بہترین سفارشی (اللہ ہے)، میں اپنی بیٹیوں کا نکاح (اپنی مرضی سے) نہیں کرتا بلکہ اللہ تعالیٰ ہی ان کا نکاح فرماتا ہے۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7032]