Mustadrak al-Hakim

سیدنا ابوہریرہ رضی اللہ عنہ سے مروی ہے، انہوں نے کہا: میں سیدنا عثمان رضی اللہ عنہ کی اہلیہ اور رسول اللہ صلی اللہ علیہ و آلہ وسلم کی صاحبزادی سیدہ رقیہ رضی اللہ عنہا کے پاس گیا، ان کے ہاتھ میں کنگھی تھی، انہوں نے بتایا: رسول اللہ صلی اللہ علیہ و آلہ وسلم ابھی میرے پاس سے نکلے ہیں، میں نے ان کے سر مبارک میں کنگھی کی تھی، تو آپ صلی اللہ علیہ و آلہ وسلم نے مجھ سے پوچھا تھا: ”تم عثمان کو کیسا پاتی ہو؟“ میں نے عرض کی: بہتر، آپ صلی اللہ علیہ و آلہ وسلم نے فرمایا: ”ان کا اکرام کرو، کیونکہ وہ میرے صحابہ میں اخلاق کے لحاظ سے میرے سب سے زیادہ مشابہ ہیں۔“
امام حاکم رحمہ اللہ فرماتے ہیں: میرا گمان ہے بلکہ مجھے یقین ہے کہ سیدنا ابوہریرہ رضی اللہ عنہ نے یہ حدیث کسی قدیم صحابی سے روایت کی ہے جو سیدہ رقیہ رضی اللہ عنہا کے پاس گئے تھے، لیکن میں نے بہت کوشش کی مگر اس وقت مجھے وہ (سند) نہیں مل سکی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7028]