Mustadrak al-Hakim

سیدنا ابن عمر رضی اللہ عنہما کے واسطے سے سیدہ ام حبیبہ رضی اللہ عنہا بیان کرتی ہیں: میں نے خواب میں اپنے شوہر عبید اللہ بن جحش کو انتہائی بری اور بدصورت شکل میں دیکھا، میں گھبرا گئی اور میں نے کہا: اللہ کی قسم! اس کا حال بدل گیا ہے، چنانچہ جب صبح ہوئی تو اس نے مجھ سے کہا: اے ام حبیبہ! میں نے ادیان پر غور کیا تو عیسائیت سے بہتر کوئی دین نہیں پایا، میں پہلے اسی پر تھا پھر میں محمد ( صلی اللہ علیہ و آلہ وسلم ) کے دین میں داخل ہوا، اب میں دوبارہ نصرانیت کی طرف رجوع کر رہا ہوں۔ میں نے اس سے کہا: اللہ کی قسم! اس میں تمہارے لیے کوئی خیر نہیں ہے، اور میں نے اسے اپنا وہ خواب بھی سنایا جو میں نے دیکھا تھا، مگر اس نے اس کی کوئی پرواہ نہ کی اور شراب نوشی میں مگن رہا یہاں تک کہ اسی حال میں مر گیا۔ پھر میں نے خواب میں دیکھا کہ کوئی آنے والا مجھے کہہ رہا ہے: ”اے ام المومنین“، میں گھبرا گئی اور میں نے اس کی تعبیر یہ لی کہ رسول اللہ صلی اللہ علیہ و آلہ وسلم مجھ سے نکاح فرمائیں گے۔ سیدہ ام حبیبہ رضی اللہ عنہا فرماتی ہیں: ابھی میری عدت مکمل ہی ہوئی تھی کہ مجھے پتا چلا کہ نجاشی کا قاصد میرے دروازے پر اجازت مانگ رہا ہے، وہ اس کی ایک لونڈی تھی جسے ”ابرہہ“ کہا جاتا تھا اور وہ بادشاہ کے لباس اور خوشبو کا انتظام کرتی تھی، وہ میرے پاس آئی اور کہا: بادشاہ کہتا ہے کہ رسول اللہ صلی اللہ علیہ و آلہ وسلم نے مجھے خط لکھا ہے کہ میں آپ کا نکاح ان سے کر دوں۔ میں نے کہا: اللہ تمہیں خیر کی بشارت دے۔ اس نے کہا: بادشاہ کہتا ہے کہ آپ کسی کو اپنا وکیل بنا دیں جو آپ کا نکاح پڑھائے، پس میں نے خالد بن سعید بن العاص رضی اللہ عنہ کو پیغام بھیجا اور انہیں اپنا وکیل مقرر کر دیا، اور میں نے اس خوشخبری کی خوشی میں ابرہہ کو چاندی کا ایک کنگن، اپنی دونوں پازیبیں اور چاندی کی وہ انگوٹھیاں بھی دے دیں جو میری انگلیوں میں تھیں پاوؤں کی۔ جب شام ہوئی تو نجاشی نے جعفر بن ابی طالب رضی اللہ عنہ اور وہاں موجود دیگر مسلمانوں کو بلایا، نجاشی نے خطبہ پڑھا: «الْحَمْدُ لِلَّهِ الْمَلِكِ الْقُدُّوسِ السَّلَامِ الْمُؤْمِنِ الْمُهَيْمِنِ الْعَزِيزِ الْجَبَّارِ» ”تمام تعریفیں اللہ کے لیے ہیں جو بادشاہ، نہایت مقدس، سلامتی والا، امن دینے والا، نگہبان، غالب اور زبردست ہے“، میں اللہ کی ویسی ہی حمد بیان کرتا ہوں جیسی اس کی حمد کا حق ہے، اور میں گواہی دیتا ہوں کہ اللہ کے سوا کوئی معبود نہیں اور محمد صلی اللہ علیہ و آلہ وسلم اس کے بندے اور رسول ہیں، اور وہی وہ ہستی ہیں جن کی بشارت عیسیٰ ابن مریم علیہ السلام نے دی تھی، اما بعد: رسول اللہ صلی اللہ علیہ و آلہ وسلم نے مجھے لکھا ہے کہ میں ان کا نکاح ام حبیبہ بنت ابی سفیان سے کر دوں، پس میں نے رسول اللہ صلی اللہ علیہ و آلہ وسلم کی اس دعوت کو قبول کیا اور میں نے ان کا حق مہر چار سو دینار مقرر کیا ہے۔ پھر اس نے وہ دینار لوگوں کے سامنے انڈیل دیے۔ اس کے بعد خالد بن سعید رضی اللہ عنہ نے کلام کیا اور کہا: «الْحَمْدُ لِلَّهِ أَحْمَدُهُ وَأَسْتَعِينُهُ وَأَسْتَنْصِرُهُ» ”تمام تعریفیں اللہ کے لیے ہیں، میں اسی کی حمد کرتا ہوں، اسی سے مدد چاہتا ہوں اور اسی سے نصرت طلب کرتا ہوں“، اور میں گواہی دیتا ہوں کہ اللہ کے سوا کوئی معبود نہیں اور محمد صلی اللہ علیہ و آلہ وسلم اس کے بندے اور رسول ہیں، جنہیں اللہ نے ہدایت اور دینِ حق کے ساتھ بھیجا تاکہ اسے تمام ادیان پر غالب کر دے خواہ مشرکین کو برا ہی کیوں نہ لگے، اما بعد: میں نے رسول اللہ صلی اللہ علیہ و آلہ وسلم کی اس دعوت کو قبول کیا اور ام حبیبہ بنت ابی سفیان کا نکاح ان سے کر دیا، اللہ تعالیٰ اپنے رسول کے لیے اس میں برکت فرمائے۔ انہوں نے وہ دینار خالد بن سعید کو دے دیے اور انہوں نے انہیں وصول کر لیا، پھر جب لوگوں نے اٹھنے کا ارادہ کیا تو نجاشی نے کہا: بیٹھ جائیے، کیونکہ انبیاء علیہم السلام کی سنت یہ ہے کہ جب وہ نکاح کریں تو اس پر کھانا کھلایا جائے، چنانچہ اس نے کھانا منگوایا اور سب نے کھانا کھایا، پھر وہ سب رخصت ہوئے۔ ام حبیبہ رضی اللہ عنہا کہتی ہیں: جب وہ مال میرے پاس پہنچا تو میں نے ابرہہ کو بلایا جس نے مجھے بشارت دی تھی، میں نے اس سے کہا: میں نے تمہیں اس دن جو کچھ دیا تھا وہ اس وقت دیا تھا جب میرے پاس مال نہیں تھا، اب یہ پچاس مثقال (سونا) ہے اسے لے لو اور اپنی ضرورت پوری کرو، اس نے ایک ڈبی نکالی جس میں وہ تمام چیزیں موجود تھیں جو میں نے اسے دی تھیں، اس نے وہ سب مجھے واپس کر دیں اور کہا: بادشاہ نے مجھے تاکید کی ہے کہ میں آپ سے کچھ نہ لوں، اور میں وہی ہوں جو ان کے لباس اور خوشبو کا خیال رکھتی ہوں، اور میں نے رسول اللہ صلی اللہ علیہ و آلہ وسلم کے دین کی پیروی اختیار کر لی ہے اور میں اللہ کے لیے اسلام لا چکی ہوں، اور بادشاہ نے اپنی تمام بیویوں کو حکم دیا ہے کہ ان کے پاس جتنی بھی خوشبوئیں ہیں وہ سب آپ کے پاس بھیج دیں، چنانچہ اگلے دن وہ میرے پاس عود، ورس، عنبر اور کثیر مقدار میں زباد (خوشبو) لے کر آئی، میں وہ سب کچھ لے کر رسول اللہ صلی اللہ علیہ و آلہ وسلم کی خدمت میں حاضر ہوئی، آپ صلی اللہ علیہ و آلہ وسلم وہ خوشبو مجھ پر لگی دیکھتے تھے تو منع نہیں فرماتے تھے۔ پھر ابرہہ نے کہا: میری آپ سے یہ حاجت ہے کہ آپ رسول اللہ صلی اللہ علیہ و آلہ وسلم کو میرا سلام پہنچائیں اور انہیں بتائیں کہ میں نے ان کے دین کی پیروی اختیار کر لی ہے، وہ میرے ساتھ بہت مہربانی سے پیش آتی رہی اور اسی نے میرا سامان تیار کیا تھا، وہ جب بھی میرے پاس آتی تو کہتی: میری وہ حاجت (سلام والی) نہ بھولیے گا۔ ام حبیبہ رضی اللہ عنہا کہتی ہیں: جب ہم رسول اللہ صلی اللہ علیہ و آلہ وسلم کے پاس پہنچے تو میں نے آپ صلی اللہ علیہ و آلہ وسلم کو نکاح کے پیغام کی ساری تفصیل اور ابرہہ کے حسنِ سلوک کے بارے میں بتایا، تو رسول اللہ صلی اللہ علیہ و آلہ وسلم مسکرا دیے اور میں نے آپ صلی اللہ علیہ و آلہ وسلم کو اس کا سلام پہنچایا، تو آپ صلی اللہ علیہ و آلہ وسلم نے فرمایا: ”اور اس پر بھی سلام ہو اور اللہ کی رحمت ہو۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6926]