Mustadrak al-Hakim

کہیل بن حرملہ سے روایت ہے کہ سیدنا ابوہریرہ رضی اللہ عنہ دمشق آئے اور ابوکلثوم سدوسی کے ہاں قیام فرمایا، ہم ان کے پاس حاضر ہوئے اور ہمارے درمیان صلاۃِ وسطیٰ (درمیانی نماز) کے بارے میں تذکرہ ہوا تو اس میں ہمارا اختلاف ہو گیا، ابوہریرہ رضی اللہ عنہ نے فرمایا: تمہاری طرح ہمارا بھی اسی وقت اختلاف ہوا تھا جب ہم رسول اللہ صلی اللہ علیہ و آلہ وسلم کے گھر کے سامنے صحن میں موجود تھے، ہم میں ایک صالح شخص ابو ہاشم بن عتبہ بن ربیعہ بھی موجود تھے، وہ اٹھے اور رسول اللہ صلی اللہ علیہ و آلہ وسلم کی خدمت میں حاضر ہوئے کیونکہ وہ آپ صلی اللہ علیہ و آلہ وسلم کے سامنے (سوال کرنے میں) دلیر تھے، پھر وہ باہر تشریف لائے اور ہمیں بتایا کہ اس سے مراد نمازِ عصر ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6836]