Mustadrak al-Hakim

سیدنا ابوبکرہ رضی اللہ عنہ سے روایت ہے کہ ہم نبی کریم صلی اللہ علیہ و آلہ وسلم کے پاس موجود تھے کہ بنو تمیم کا وفد آپ صلی اللہ علیہ و آلہ وسلم کی خدمت میں حاضر ہوا، جن میں قیس بن عاصم، عمرو بن اہتم اور زبرقان بن بدر شامل تھے، تو نبی کریم صلی اللہ علیہ و آلہ وسلم نے عمرو بن اہتم سے پوچھا: ”تم زبرقان بن بدر کے بارے میں کیا کہتے ہو؟“ انہوں نے عرض کی: یا رسول اللہ! وہ اپنے قریبی لوگوں میں مطاع (صاحبِ حکم) ہیں، فصیح اللسان ہیں اور اپنے قبیلے کے محافظ ہیں، تو زبرقان نے کہا: یا رسول اللہ! اللہ کی قسم وہ میرے بارے میں اس سے کہیں زیادہ جانتے ہیں جتنا انہوں نے بیان کیا ہے لیکن محض حسد کی وجہ سے خاموش رہے، اس پر عمرو نے کہا: اللہ کی قسم یا رسول اللہ! یہ مروت سے خالی ہیں، تنگ دل ہیں، ان کا ننھیال کمینہ ہے اور ان کا باپ احمق ہے، اللہ کی قسم میں نے پہلے جھوٹ نہیں بولا تھا اور اب میں نے سچ کہا ہے، لیکن میں جب خوش ہوا تو وہ بہترین بات کہی جو میں جانتا تھا اور جب میں ناراض ہوا تو وہ بدترین بات کہی جو میں جانتا تھا، تو نبی کریم صلی اللہ علیہ و آلہ وسلم نے ارشاد فرمایا: ”بے شک کچھ بیان جادو کی طرح (اثر رکھنے والے) ہوتے ہیں اور بے شک کچھ اشعار سراسر حکمت ہوتے ہیں۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6714]