Mustadrak al-Hakim

ہشام بن عروہ اپنے والد سے روایت کرتے ہیں کہ جب سیدہ اسماء بنت ابوبکر رضی اللہ عنہما نے رسول اللہ صلی اللہ علیہ و آلہ وسلم کی طرف ہجرت کی تو وہ سیدنا عبداللہ بن زبیر رضی اللہ عنہما سے حاملہ تھیں، پس ان کی ولادت ہوئی تو وہ انہیں نبی کریم صلی اللہ علیہ و آلہ وسلم کی خدمت میں لائیں تاکہ آپ صلی اللہ علیہ و آلہ وسلم ان کی تحنیک فرمائیں، رسول اللہ صلی اللہ علیہ و آلہ وسلم نے انہیں اپنی گود میں لیا اور ایک کھجور منگوائی، اسے چبایا اور پھر اپنے دہن مبارک سے نکال کر ان کے منہ میں ڈال دی اور اس کے ذریعے ان کی تحنیک فرمائی، پس ان کے پیٹ میں جانے والی سب سے پہلی چیز رسول اللہ صلی اللہ علیہ و آلہ وسلم کا لعابِ دہن مبارک تھا، راوی بیان کرتے ہیں کہ پھر رسول اللہ صلی اللہ علیہ و آلہ وسلم نے ان پر اپنا ہاتھ پھیرا اور ان کا نام عبداللہ رکھا، پھر وہ سات یا آٹھ سال کی عمر میں نبی کریم صلی اللہ علیہ و آلہ وسلم کی بیعت کے لیے حاضر ہوئے جبکہ ان کے والد سیدنا زبیر رضی اللہ عنہ نے انہیں اس کا حکم دیا تھا، پس جب نبی کریم صلی اللہ علیہ و آلہ وسلم نے انہیں آتے دیکھا تو تبسم فرمایا اور ان سے بیعت لی، اور وہ رسول اللہ صلی اللہ علیہ و آلہ وسلم کی مدینہ تشریف آوری کے بعد مدینہ میں پیدا ہونے والے پہلے بچے تھے، اور یہودی (حسد کی وجہ سے) کہا کرتے تھے کہ ہم نے ان پر جادو کر دیا ہے اب مدینہ میں ان کے ہاں کوئی لڑکا پیدا نہیں ہوگا، پس جب عبداللہ پیدا ہوئے تو رسول اللہ صلی اللہ علیہ و آلہ وسلم کے اصحاب نے نعرہ تکبیر بلند کیا، اور سیدنا عبداللہ بن عمر بن خطاب رضی اللہ عنہما نے اس وقت فرمایا جب انہوں نے اہل شام کی تکبیروں کی آواز سنی جنہوں نے عبداللہ بن زبیر کو قتل کیا تھا: ”جن لوگوں نے ان کی پیدائش پر تکبیر کہی تھی وہ ان لوگوں سے بہتر تھے جنہوں نے ان کے قتل پر تکبیر کہی ہے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6466]