Mustadrak al-Hakim

سیدہ عائشہ رضی اللہ عنہا بیان کرتی ہیں کہ سیدنا صفوان بن معطل رضی اللہ عنہ نے سیدنا حسان بن ثابت رضی اللہ عنہ پر حملہ کر کے انہیں تلوار ماری، اور مارتے وقت یہ اشعار پڑھے: ”میری تلوار کی دھار کا مزہ چکھو کیونکہ میں ایسا نوجوان ہوں جو اگرچہ شاعر نہیں ہے لیکن جب مجھ پر (بہتان) لگایا جائے تو میں اپنی عزت کا دفاع کرنا جانتا ہوں، اور میں اس بہتان تراش سے اپنا بدلہ لیتا ہوں جو پاک دامن اور بے گناہ لوگوں پر تہمت لگاتا ہے۔“ سیدہ عائشہ رضی اللہ عنہا فرماتی ہیں کہ صفوان وہاں سے بھاگ نکلے اور حسان رسول اللہ صلی اللہ علیہ و آلہ وسلم کی خدمت میں فریاد لے کر آئے، تو رسول اللہ صلی اللہ علیہ و آلہ وسلم نے ان سے خواہش کی کہ وہ صفوان کی اس ضرب کو معاف کر دیں، چنانچہ انہوں نے اسے رسول اللہ صلی اللہ علیہ و آلہ وسلم کی خاطر بخش دیا، تو رسول اللہ صلی اللہ علیہ و آلہ وسلم نے اس کے عوض انہیں کھجوروں کا ایک بہت بڑا باغ اور ایک رومی لونڈی عطا فرمائی جن کا نام سیرین تھا، بعد ازاں حسان نے وہ باغ سیدنا معاویہ بن ابوسفیان رضی اللہ عنہ کے دورِ حکومت میں ان کے ہاتھ بھاری قیمت پر فروخت کر دیا۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6332]