Mustadrak al-Hakim

ابوانس مالک بن ابی عامر بیان کرتے ہیں کہ میں سیدنا طلحہ بن عبید اللہ رضی اللہ عنہ کے پاس موجود تھا کہ ایک شخص داخل ہوا اور کہنے لگا: ”اے ابومحمد! اللہ کی قسم ہمیں معلوم نہیں کہ یہ یمنی (ابوہریرہ) رسول اللہ صلی اللہ علیہ و آلہ وسلم کے بارے میں آپ لوگوں سے زیادہ علم رکھتا ہے یا کیا بات ہے؟ وہ رسول اللہ صلی اللہ علیہ و آلہ وسلم کے حوالے سے وہ باتیں کہتا ہے جو آپ صلی اللہ علیہ و آلہ وسلم نے نہیں فرمائیں —یعنی اس کا اشارہ سیدنا ابوہریرہ رضی اللہ عنہ کی طرف تھا—!“ تو سیدنا طلحہ رضی اللہ عنہ نے فرمایا: ”اللہ کی قسم! ہمیں اس میں کوئی شک نہیں کہ انہوں نے رسول اللہ صلی اللہ علیہ و آلہ وسلم سے وہ کچھ سنا ہے جو ہم نے نہیں سنا، اور وہ کچھ جانا ہے جو ہم نے نہیں جانا، کیونکہ ہم مالدار لوگ تھے، ہمارے گھر بار اور اہل و عیال تھے، ہم دن کے دونوں حصوں میں نبی کریم صلی اللہ علیہ و آلہ وسلم کی خدمت میں حاضر ہوتے اور پھر واپس چلے جاتے، جبکہ سیدنا ابوہریرہ رضی اللہ عنہ مسکین تھے، نہ ان کے پاس مال تھا، نہ اہل و عیال اور نہ اولاد، ان کا ہاتھ تو بس نبی کریم صلی اللہ علیہ و آلہ وسلم کے ہاتھ میں رہتا تھا اور وہ آپ صلی اللہ علیہ و آلہ وسلم کے ساتھ ہر جگہ موجود رہتے تھے، اس لیے ہمیں کوئی شک نہیں کہ انہوں نے وہ کچھ جانا جو ہم نہ جان سکے اور وہ کچھ سنا جو ہم نہ سن سکے، اور ہم میں سے کسی نے بھی ان پر یہ الزام نہیں لگایا کہ وہ رسول اللہ صلی اللہ علیہ و آلہ وسلم کے ذمے ایسی بات لگائیں جو آپ صلی اللہ علیہ و آلہ وسلم نے نہیں فرمائی۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6296]