Mustadrak al-Hakim

سیدنا جابر بن سمرہ رضی اللہ عنہ سے روایت ہے کہ رسول اللہ صلی اللہ علیہ و آلہ وسلم سیدنا ابو ایوب رضی اللہ عنہ کے ہاں فروکش ہوئے، جب آپ صلی اللہ علیہ و آلہ وسلم کھانا کھا لیتے تو اپنا بچا ہوا کھانا ان کی طرف بھیج دیتے، وہ رسول اللہ صلی اللہ علیہ و آلہ وسلم کے دستِ مبارک کے نشانات تلاش کرتے اور وہیں اپنا ہاتھ رکھتے جہاں آپ صلی اللہ علیہ و آلہ وسلم کی انگلیاں لگی ہوتیں، ایک دن انہوں نے آپ صلی اللہ علیہ و آلہ وسلم کی خدمت میں کھانا بھیجا لیکن اس میں رسول اللہ صلی اللہ علیہ و آلہ وسلم کی انگلیوں کے نشانات نہ پائے، وہ نبی کریم صلی اللہ علیہ و آلہ وسلم کی خدمت میں حاضر ہوئے اور عرض کیا: یا رسول اللہ! میں نے آپ کی انگلیوں کے نشانات نہیں دیکھے، آپ صلی اللہ علیہ و آلہ وسلم نے فرمایا: ”اس میں لہسن تھا“، شعبہ کی روایت میں ہے کہ انہوں نے پوچھا: کیا یہ حرام ہے؟ رسول اللہ صلی اللہ علیہ و آلہ وسلم نے فرمایا: ”نہیں“، جبکہ حماد کی روایت میں ہے کہ انہوں نے عرض کیا: یا رسول اللہ! آپ نے مجھے وہ کھانا واپس بھیج دیا جو آپ نے تناول نہیں فرمایا، تو آپ صلی اللہ علیہ و آلہ وسلم نے فرمایا: ”بے شک تم میری مثل نہیں ہو، میرے پاس فرشتہ آتا ہے (جسے لہسن کی بو ناگوار گزرتی ہے)۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6051]