Mustadrak al-Hakim

علقمہ بن رمثہ بلوی رضی اللہ عنہ سے روایت ہے کہ رسول اللہ صلی اللہ علیہ و آلہ وسلم نے سیدنا عمرو بن العاص رضی اللہ عنہ کو بحرین روانہ فرمایا، پھر رسول اللہ صلی اللہ علیہ و آلہ وسلم ایک لشکر کے ساتھ نکلے اور ہم بھی آپ صلی اللہ علیہ و آلہ وسلم کے ہمراہ تھے، رسول اللہ صلی اللہ علیہ و آلہ وسلم پر کچھ دیر کے لیے اونگھ طاری ہوئی، پھر جب آپ صلی اللہ علیہ و آلہ وسلم بیدار ہوئے تو فرمایا: ”اللہ تعالیٰ عمرو پر رحم فرمائے۔“ راوی کہتے ہیں کہ ہم آپس میں ہر اس شخص کا نام لینے لگے جس کا نام عمرو تھا، پھر آپ صلی اللہ علیہ و آلہ وسلم کو دوبارہ اونگھ آئی، بیدار ہوئے تو فرمایا: ”اللہ تعالیٰ عمرو پر رحم فرمائے۔“ پھر تیسری بار اونگھ آئی، بیدار ہوئے تو فرمایا: ”اللہ تعالیٰ عمرو پر رحم فرمائے۔“ ہم نے عرض کیا: یا رسول اللہ! وہ کون عمرو ہیں؟ آپ صلی اللہ علیہ و آلہ وسلم نے فرمایا: ”عمرو بن العاص۔“ لوگوں نے پوچھا: ان کا کیا معاملہ ہے؟ آپ صلی اللہ علیہ و آلہ وسلم نے فرمایا: ”مجھے وہ یاد آ گئے، میں جب بھی لوگوں کو صدقہ کی ترغیب دیتا تھا تو وہ بہت کثرت سے صدقہ لایا کرتے تھے، میں ان سے پوچھتا: یہ تمہارے پاس کہاں سے آیا؟ تو وہ جواب دیتے: اللہ کی طرف سے، اور عمرو نے سچ کہا، بے شک عمرو کے پاس بہت زیادہ خیر ہے۔“ زہیر (راوی) کہتے ہیں: چنانچہ جب فتنہ برپا ہوا تو میں نے سوچا کہ میں اس شخص کا ساتھ دوں گا جس کے بارے میں رسول اللہ صلی اللہ علیہ و آلہ وسلم نے یہ کلمات فرمائے تھے، چنانچہ میں ان سے کبھی جدا نہ ہوا۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6029]