Mustadrak al-Hakim

سیدنا خباب رضی اللہ عنہ سے روایت ہے کہ میں رسول اللہ صلی اللہ علیہ و آلہ وسلم کی خدمت میں حاضر ہوا جبکہ آپ صلی اللہ علیہ و آلہ وسلم ایک درخت کے نیچے اپنا دستِ مبارک سر کے نیچے رکھ کر آرام فرما رہے تھے، میں نے عرض کیا: اے اللہ کے رسول! کیا آپ ان لوگوں (کفار) کے خلاف اللہ سے دعا نہیں فرمائیں گے جن کے متعلق ہمیں یہ اندیشہ ہے کہ وہ ہمیں ہمارے دین سے پھیر دیں گے؟ آپ صلی اللہ علیہ و آلہ وسلم نے تین مرتبہ مجھ سے اپنا چہرہ مبارک پھیر لیا، میں ہر بار یہی عرض کرتا رہا اور آپ صلی اللہ علیہ و آلہ وسلم اعراض فرماتے رہے، تیسری مرتبہ آپ صلی اللہ علیہ و آلہ وسلم بیٹھ گئے اور ارشاد فرمایا: ”اے لوگو! اللہ سے ڈرو اور صبر سے کام لو؛ اللہ کی قسم! تم سے پہلے مومنین میں سے کسی شخص کے سر پر آرا رکھ دیا جاتا اور اسے چیر کر دو ٹکڑے کر دیا جاتا تھا، مگر یہ آزمائش بھی اسے اس کے دین سے نہیں پھیر سکتی تھی، پس اللہ سے ڈرو، یقیناً اللہ تمہیں فتح عطا فرمانے والا اور (تمہارے حق میں) بہتر کرنے والا ہے“۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5743]