Mustadrak al-Hakim

سیدنا اسماعیل بن محمد بن ثابت انصاری اپنے والد سے روایت کرتے ہیں کہ سیدنا ثابت بن قیس رضی اللہ عنہ نے عرض کیا: اے اللہ کے رسول! مجھے ڈر ہے کہ کہیں میں ہلاک نہ ہو گیا ہوں، رسول اللہ صلی اللہ علیہ و آلہ وسلم نے دریافت فرمایا: ”کیوں؟“ انہوں نے عرض کیا: اللہ تعالیٰ نے ہمیں اس بات سے منع فرمایا ہے کہ ہم اس کام پر اپنی تعریف پسند کریں جو ہم نے کیا ہی نہ ہو اور میں پاتا ہوں کہ میں تعریف کو پسند کرتا ہوں، اور اللہ نے ہمیں تکبر و خود پسندی سے منع فرمایا ہے جبکہ میں جمال و خوبصورتی کو پسند کرتا ہوں، اور ہمیں اس بات سے منع کیا گیا ہے کہ اپنی آواز آپ کی آواز سے بلند کریں جبکہ میں «جَهِيرُ الصَّوتِ» ”بلند آواز والا“ آدمی ہوں، تو رسول اللہ صلی اللہ علیہ و آلہ وسلم نے فرمایا: ”اے ثابت! کیا تم اس بات پر راضی نہیں ہو کہ تم قابلِ تعریف زندگی گزارو، شہید کر دیے جاؤ اور جنت میں داخل ہو؟“ انہوں نے عرض کیا: کیوں نہیں اے اللہ کے رسول! چنانچہ انہوں نے قابلِ تعریف زندگی گزاری اور مسیلمہ کذاب کے خلاف (جنگِ یمامہ میں) شہید ہوئے۔
یہ حدیث شیخین کی شرط پر صحیح ہے لیکن انہوں نے اس سیاق کے ساتھ اسے روایت نہیں کیا، البتہ امام مسلم نے اکیلے حماد بن سلمہ اور سلیمان بن مغیرہ کی روایت سے انس رضی اللہ عنہ کے واسطے سے یہ حدیث مختصراً روایت کی ہے کہ جب یہ آیت ﴿لَا تَرْفَعُوا أَصْوَاتَكُمْ فَوْقَ صَوْتِ النَّبِيِّ﴾ [سورة الحجرات: 2] نازل ہوئی تو ثابت بن قیس آئے (اور پھر پورا قصہ بیان کیا)۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5105]