Mustadrak al-Hakim

سیدنا عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ و آلہ وسلم نے غزوہ بدر کے دن فرمایا: ”تم میں سے جس کی ملاقات (میرے چچا) عباس سے ہو وہ انہیں قتل نہ کرے کیونکہ وہ مجبور کر کے نکالے گئے ہیں۔“ یہ سن کر سیدنا ابوحذیفہ بن عتبہ رضی اللہ عنہ نے کہا: کیا ہم اپنے باپوں، بھائیوں اور قبیلے والوں کو تو قتل کریں اور عباس کو چھوڑ دیں؟! اللہ کی قسم، اگر وہ مجھے ملے تو میں انہیں اپنی تلوار کی خوراک بنا دوں گا۔ یہ بات رسول اللہ صلی اللہ علیہ و آلہ وسلم تک پہنچی تو آپ صلی اللہ علیہ و آلہ وسلم نے عمر بن خطاب رضی اللہ عنہ سے فرمایا: ”اے ابوحفص!“ سیدنا عمر رضی اللہ عنہ کہتے ہیں کہ یہ پہلا دن تھا جب آپ صلی اللہ علیہ و آلہ وسلم نے مجھے میری کنیت ابوحفص سے پکارا، آپ صلی اللہ علیہ و آلہ وسلم نے فرمایا: ”کیا رسول اللہ کے چچا کے چہرے پر تلوار ماری جائے گی؟“ سیدنا عمر رضی اللہ عنہ نے عرض کیا: (اے اللہ کے رسول!) مجھے چھوڑئیے کہ میں اس کی گردن اڑا دوں کیونکہ یہ منافق ہو گیا ہے۔ سیدنا ابوحذیفہ رضی اللہ عنہ (بعد میں ندامت سے) کہا کرتے تھے کہ میں اس جملے کی وجہ سے جو میں نے اس دن کہا تھا، خود کو کبھی مامون نہیں سمجھتا اور مسلسل ڈرتا رہتا ہوں یہاں تک کہ اللہ تعالیٰ شہادت کے ذریعے اس کا کفارہ فرما دے، چنانچہ وہ جنگِ یمامہ کے دن شہید ہو گئے۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5058]