Mustadrak al-Hakim

سیدنا اسامہ بن زید اپنے والد سے روایت کرتے ہیں کہ جب رسول اللہ صلی اللہ علیہ و آلہ وسلم غزوہ بدر سے فارغ ہوئے تو آپ صلی اللہ علیہ و آلہ وسلم نے اہل مدینہ کی طرف دو خوشخبری سنانے والے بھیجے: زید بن حارثہ رضی اللہ عنہ کو نشیبی علاقے (سافلہ) والوں کی طرف اور عبداللہ بن رواحہ رضی اللہ عنہ کو بالائی علاقے (عالیہ) والوں کی طرف روانہ کیا تاکہ وہ لوگوں کو اللہ کی طرف سے اپنے نبی صلی اللہ علیہ و آلہ وسلم کو عطا کردہ فتح کی خوشخبری سنائیں، پس زید بن حارثہ رضی اللہ عنہ اس وقت پہنچے جب ان کے بیٹے اسامہ رسول اللہ صلی اللہ علیہ و آلہ وسلم کی صاحبزادی سیدہ رقیہ رضی اللہ عنہا کی قبر پر مٹی برابر کر چکے تھے، اسامہ سے کہا گیا کہ وہ دیکھو تمہارے والد آگئے ہیں، اسامہ کہتے ہیں کہ میں آیا تو وہ لوگوں کے سامنے کھڑے (فتح کا اعلان کرتے ہوئے) کہہ رہے تھے: ”عتبہ بن ربیعہ، شیبہ بن ربیعہ، ابوجہل بن هشام، نبہیہ، منبہ اور امیہ بن خلف قتل کر دیے گئے ہیں،“ میں نے پوچھا: ”اے ابا جان! کیا یہ سچ ہے؟“ انہوں نے کہا: ”ہاں اللہ کی قسم اے میرے پیارے بیٹے!“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5025]