Mustadrak al-Hakim

سیدہ عائشہ رضی اللہ عنہا سے روایت ہے، انہوں نے فرمایا: جب ہم نے رسول اللہ صلی اللہ علیہ و آلہ وسلم کو غسل دینے کا ارادہ کیا تو لوگوں میں طریقہ کار پر اختلاف ہوا، بعض نے کہا: کیا ہم رسول اللہ صلی اللہ علیہ و آلہ وسلم کے کپڑے اسی طرح اتاریں گے جیسے ہم اپنے مردوں کے اتارتے ہیں یا انہیں لباس سمیت غسل دیں گے؟ اسی دوران اللہ نے ان پر ایسی غنودگی طاری کر دی کہ ان میں سے ہر شخص کی ٹھوڑی اس کے سینے پر لٹک گئی (یعنی سب سو گئے)، پھر گھر کے ایک کونے سے کسی غیبی پکارنے والے نے پکار کر کہا: کیا تم نہیں جانتے کہ رسول اللہ صلی اللہ علیہ و آلہ وسلم کو ان کے لباس سمیت غسل دیا جانا چاہیے؟ چنانچہ صحابہ نے آپ کو قمیص سمیت غسل دیا، وہ آپ پر پانی ڈالتے تھے اور قمیص کے اوپر سے ہی جسم مبارک کو ملتے تھے، سیدہ عائشہ رضی اللہ عنہا فرماتی ہیں: اللہ کی قسم! اگر مجھے پہلے وہ بات معلوم ہو جاتی جو بعد میں معلوم ہوئی (یعنی غسل کا یہ طریقہ) تو رسول اللہ صلی اللہ علیہ و آلہ وسلم کو ان کی ازواج کے سوا اور کوئی غسل نہ دیتا۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الْمَغَازِي وَالسَّرَايَا/حدیث: 4446]