Mustadrak al-Hakim

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ و آلہ وسلم نے کبھی کسی مسلمان پر (اس کا نام لے کر یا اسے خاص کر کے) لعنت نہیں بھیجی، اور نہ ہی کبھی اپنے ہاتھ سے کسی کو مارا سوائے اس کے کہ وہ اللہ کی راہ میں جہاد ہو، اور آپ صلی اللہ علیہ و آلہ وسلم سے جب بھی کسی چیز کا سوال کیا گیا تو آپ نے کبھی منع نہیں فرمایا سوائے اس کے کہ وہ گناہ کا کام ہو، کیونکہ اگر وہ گناہ ہوتا تو آپ اس سے سب سے زیادہ دور رہنے والے ہوتے، اور آپ صلی اللہ علیہ و آلہ وسلم نے اپنی ذات کے لیے کبھی کسی سے انتقام نہیں لیا الا یہ کہ اللہ کی حدود پامال کی جا رہی ہوں، ایسی صورت میں آپ اللہ کی خاطر انتقام لیتے تھے، اور آپ صلی اللہ علیہ و آلہ وسلم کو جب بھی دو کاموں کے درمیان اختیار دیا گیا تو آپ نے ہمیشہ آسان تر کو اختیار فرمایا، اور جب بھی جبرائیل علیہ السلام آپ سے ملاقات اور دورہ قرآن کرتے تو آپ صلی اللہ علیہ و آلہ وسلم خیر و بھلائی کی سخاوت میں تیز چلنے والی ہوا سے بھی زیادہ بڑھ کر ہوتے تھے۔
یہ حدیث شیخین کی شرط پر صحیح ہے لیکن انہوں نے اسے اس سیاق کے ساتھ روایت نہیں کیا، اور ایوب سختیانی کی یہ روایت نہایت غریب ہے۔ [المستدرك على الصحيحين/كِتَابِ: آيَاتِ رَسُولِ اللهِ صَلَّى اللهُ عَلَيْهِ وَسَلَّمَ الَّتِي فِي دَلَائِلِ النُّبُوَّةِ/حدیث: 4269]