Mustadrak al-Hakim

سیدنا عبداللہ بن عباس رضی اللہ عنہما سے روایت ہے کہ جب اہل مکہ نے نبی کریم صلی اللہ علیہ و آلہ وسلم کو (وہاں سے) نکالا تو سیدنا ابوبکر صدیق رضی اللہ عنہ نے فرمایا: ”انا للہ وانا الیہ راجعون، انہوں نے اپنے نبی صلی اللہ علیہ و آلہ وسلم کو نکال دیا، اب یہ ضرور ہلاک ہوں گے۔“ ابن عباس رضی اللہ عنہما فرماتے ہیں کہ تب یہ آیت نازل ہوئی: ﴿أُذِنَ لِلَّذِينَ يُقَاتَلُونَ بِأَنَّهُمْ ظُلِمُوا وَإِنَّ اللَّهَ عَلَى نَصْرِهِمْ لَقَدِيرٌ﴾ ”اجازت دے دی گئی ہے ان لوگوں کو جن سے جنگ کی جا رہی ہے اس لیے کہ ان پر ظلم کیا گیا، اور یقیناً اللہ ان کی مدد کرنے پر پوری طرح قادر ہے۔“ [سورة الحج: 39] اور ابن عباس رضی اللہ عنہما اسے (أُذِنَ) پڑھتے تھے۔ سیدنا ابوبکر صدیق رضی اللہ عنہ نے فرمایا: ”تب مجھے علم ہوا کہ اب قتال (جنگ) ہو کر رہے گی۔“ ابن عباس رضی اللہ عنہما فرماتے ہیں کہ قتال کے بارے میں نازل ہونے والی یہ پہلی آیت ہے۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ: الْجِهَادِ/حدیث: 2407]